QINERSINEQ 2025
Qinersisartunik peqatiserinninneq aallartippoq
Nuummi Inuit Ataqatigiit (NIA) sapaammi ullaakkut ilaasortaminnik allanillu soqutiginnittunik ullaakkorsiutitortitsivoq, aaqqissuussap qulequtaraa "qinersinissamut piareersarnerit aallarnisarneqarnerat". Immikkoortortaqarfimmi siulittaasup, Ludvig Larsenip nalunaarutigaa qinigassanngortittut allattorsimaffiannut nalunaarsuineq maanna aallartittoq.
Pilutaq Nuuk-imi NIA-p aaqqissuussaanik brunch-ertitsinermi sapaatip akunnerata naanerani nuannarineqarluarpoq. Nerineq oqalugiartoqarpoq kommunimi qinikkat aamma nunap inatsisartuinik qinersisartunit, aammalu piumasaqaatit tigummisaa, Inuit Ataqatigiit siulittaasuat, Múte Bourup Egede (IA)-mit.
Assiliisoq: Leiff Josefsen
Ukiup affaa ataallugu qaangiuppat Kalaallit Nunaanni qinersisoqassaaq. Inatsisartunut aamma Kommunalbestyrelsenut kiisalu nunaqarfinni aqutsisunut.
Kisianni ulloq suna Kalaallit Nunaanni qinersisoqassava? Inatsisartunut, Kommunalbestyrelsenut aamma Nunaqarfinni Aqutsisunut qinersinerit ullormi ataatsimi ingerlanneqassappat, soorlu taamak pisoqarsimasoq apriilip arferngani 2021-mi? Imaluunniit qinersinerit immikkut ingerlanneqassappat?
Aap qinersisoqassaaq, tamannali aappaagu ingerlanneqassaaq, Múte Bourup Egede oqarpoq.
Assiliisoq: Leiff Josefsen
Inuit Ataqatigiinni siulittaasup aamma Naalakkersuisuni siulittaasup, Múte Bourup Egede (IA), qinersinerit qaqugu pinissaannut attataasamik tigumminnittup apeqqutivut akissuteqarfigai:
- Aap, qinersisoqassaaq, kisianni aappaaguussaaq.
- Suli saqqummiunianngilara qinersinerit ullormi ataatsimi ingerlanneqassanersut imaluunniit immikkut ingerlanneqassanersut, Múte Bourup Egedep oqaatigaa.
Immikkoortortaqarfiit piareersarnerat pissusissamisoortoq
Qaqugu qinersisoqarnissaanik aquummik tigumminnittup, piffissap imaalinerani qanoq ingerlanneqarumaarnersoq erseqqissumik oqaaseqarfigiumanngikkallarpaa, taassumali nuannaarutigaa partiip immikkoortortaqarfii maanna aallartimmata qinersinernut piareersarlutik, ilisimaneqartutullu qinersinerit kingusinnerpaamik pissapput apriilip 6-anni 2025.
- Pissusissamisoorpoq immikkoortortaqarfitta Ataqatigiiffeqarfiit piareersarnerit maanna aallartimmatigit aammalu taamaalillutik qinigassanngortittut aqqinik katersillutik aallartimmata, taakkununnga ilaallutik Inatsisartunut, Kommunalbestyrelsenut imaluunniit nunaqarfimmi aqutsisunut sassarumaartussat, aamma maluginiarpara partii allat aamma piareersaateqalersimasut, taamaalilluni piffisami aggersumi takussaalerumaarput ataatsimiitsitsisarnerit akulikinnerusut immikkoortortaqarfitta aaqqissugaat, tamannalu qilanaaraara, Inuit Ataqatigiit aamma Naalakkersuisut siulittaasuat, Múte Bourup Egede Sermitsiamut oqarpoq.
NIA-mi siulittaasoq, Ludvig Larsen qinersinissamut piareersimalluarpoq
Qularnanngitsumik inatsisartuni qinigassanngortittut allattorsimaffiini inuit qinikkatut ullumikkut sulisut takuneqarsinnaassapput, kisianni aamma nutaat sassarumaartut qularnanngilaq.
IA-p Nuummi immikkoortortaqarfiani siulittaasoq, Ludvig Larsen, Inatsisartunut sassarnissamut eqqarsaateqarpoq.
leiff@sermitsiaq.gl
Inatsisartunut qinigassanngortittut nutaat akornanni, NIA-mi siulittaasoq Ludvig Larsen qinigassatut ilaajumaartoq ilimanarluinnarpoq:
- Qinigassanngortitsinissatsinnut piareersaavugut, qinigaaffimmi maannakkut atuuttoq naajartuaarpoq, pingaaruteqartunullu ilaavoq qinigaaffimmi anguneqarsimasut anguneqanngitsoorsimasullu nalilersussallutigit, aammalu siunissami suliniutit oqaluuserissallugit pingaaruteqarpoq, Ludvig Larsen, taanna NIA-mi siulittaasoq oqarpoq, taassumattaaq ilisimatitsissutigaa maanna qinigassanngortittussat aqqi katersorlugit aallartinneqartut.
- Maannamut qinigassanngortinniarlutik nalunaartut ikigisassaanngillat, ilai qinikkatut maanna sulipput ilaallu nutaatut sassassamaarlutik, qularisassaanngilarlu qinersinissap qanilliartornerani suli amerlanerusut qinigassanngortikkumaartut, taanna oqarpoq.
Qinigassanngortikkusuppit, taamaassimappallu Inatsisartunut imaluunniit kommunalbestyrelsemut?
- Aap, isumaliutigisakka maanna ingerlappakka, qujanartumillu qaniginerpaassama politikkikkullu suleqatigisat tapersersuilluarput. Sassassagumalu ilimanarluinnarpoq Inatsisartunut sassaqataajumaartunga, Ludvig Larsen Sermitsiamut oqarpoq. Taassuma aalajangivinnissaminut sapaatip akunnerisa marluk ingerlanerani inissiiumaassalluni naatsorsuutigaa.
Aamma NIA-p allattaanera, Naya Pedersen Lyberth Inatsisartuni misilittagaqarusuppoq
Naya Pedersen Lyberth Kommuneqarfik Sermersuumi kommunalbestyrelsemi ilaasortaavoq Inuit Ataqatigiit sinnerlugit. Taamaattumik kommunimi qinikkatut misilittagaqarpoq.
Kommunalbestyrelsimi ilaasortaq, Naya Pedersen Lyberth imaannaanngitsunik eqqarsaateqarpoq. Taassuma kommunalbestyrelsimi sulinini nuannarivaa, illuatungaatigullu Inatsisartuni sulinermik aamma misilittagaqalerusulluni.
Assiliisoq: Jensine Berthelsen
Taannali aamma nunap inatsisartuini misilittagaqarusuppoq, suli aalajangiinngikkaluarluni kommunalbestyrelsemi ingerlaannarnissani siunertaralugu Inatsisartunulluunniit qinigassanngortinniarnerluni:
- Partiitsinni arlariinnik ataatsikkut qinigaaffeqartarneq pillugu nalilersuiuarpugut, taamaattumik Inatsisartunut sassarnissara imaluunniit Kommuneqarfik Sermersuumi kommunalbestyrelsimut qinigassanngortinnissara aalajangerniarlugu ajornakusoortippara.
- Kisianni nassuerutigissavara Inatsisartuni misilittagaqarusullunga, tassani politikeritut ineriartornissamut periarfissaqarnerusarmat kommunalbestyrelsimi sulinermit, tassani sulineq amerlanertigut eqimattakkaarluni ingerlanneqartarmat. Politikkikkut sulinermi qanoq ittuunera takutikkusuppara aamma nuna tamakkerlugu atuuttussanik inatsisiliornernut peqataarusuppunga, kisianni kommunalpolitikkimit tunuarneq ajornakusoortippara, taamaattumik eqqarsaatigeqqittariaqarpara, kisianni qanorluunniit ikkaluarpat, qinikkatut sulineq soqutigisaraara ingerlatiinnarusullugulu, Naya Pedersen Lyberth Sermitsiamut oqarpoq.
