Qitornavissiartaarineqarsimasunut suliap itigartitsissutigineqarnera Naalakkersuisup qisuariarfigaa – nalilersoqqinneqartariaqarpoq
Naalakkersuisup Mads Pedersenip kalaallit qitornavissiartaarineqarsimasut taarsiivigeqqullutik piumasaqarnerannut suliaq Danmarkimi isumaginninnermut ministerimut suliareqqoqquaa.
- Qanga meeravissianngortitsisarnermut ileqquusimasut naapertuutinngitsut qitornavissianngortinneqarsimasut anniaatissaannik kinguneqarnikuupput. Taamaattumik qallunaat naalagaaffiat qitornavissianngortinneqarsimasunut ilaqutaannullu pisimasut nassuerutiginerisigut iperaanissaannut aqqutissiuussisussaavoq. Aningaasatiguinnaanngitsoq aammali iliuutsitigut, naalakkersuisoq Mads Pedersen isumaginninnermut ineqarnermullu ministerimut allappoq.
Assi: Jensine Berthelsen
Kalaallit qitornavissiartaarineqarsimasut taarsiivigineqaqqullutik Naalagaaffimmut qinnuteqaataat Isumaginninnermut Ineqarnermullu ministeriaqarfiup itigartitsissutiginera pakatsinartorujussuuvoq, suliarlu ammaqqinneqartariaqarlunilu nalilersorneqaqqittariaqarpoq.
Taama meeqqanut, inuusuttunut, ilaqutariinnullu naalakkersuisoq Mads Pedersen (IA) Danmarkimi isumaginninnermut ineqarnermut ministerimut Sophie Hæstorp Andersenimut ammasumik allakkamini kajumissaarivoq.
Meeravissiartaarineqarnikut inuunerminni aqqusaarsimasaat itigartitsissutigineqartut naalakkersuisup nalilerpaa:
- Meeqqat angajoqqaavi akuersiteqqaarnagit meeravissianngortinneqarsimanerannut takussutissaqarluarpoq, pisullu ilaanni angajoqqaajusut ilisimasimanngilaat qitornatik tigoqqittussaanagit.
- Suliat ilaanni meeqqat piffissami aalajangersimasumi paaqqutarineqassasut angajoqqaat isumaqarsimapput. Tamanna angajoqqaat meeqqallu pisinnaatitaaffiinik unioqqutitsineruvoq, Mads Pedersen allakkani ammasuni allappoq.
Iliuuseqarnikkut aningaasatigullu akisussaaffik
Kalaallit meerartaat amerlasuut piffissami 1950-imit 1979-imut inatsisitigut tunngavissaqarluanngitsumik Kalaallit Nunaannit Danmarkimut meeravissianngortinneqarsimanerannut suliaq tunngassuteqarpoq.
Qitornavissianngortinneqarsimasut sisamat naalagaaffik eqqartuussivimmut suliassanngortitsissallugu siorna aalajangiuppaat, taarsiivigineqarnissaminnilli qinnuteqaataat itigartinneqarpoq.
Itigartitsinermi taamani malittarisassat malinneqarsimanerat tunngavilersuutigineqarnera pakatsinartoq naalakkersuisoq Mads Pedersen isumaqarpoq.
Naalagaaffik eqqugaasunut iliuuserisimasaminik akisussaaffimmik tigusisariaqartoq taanna isumaqarpoq, taamattumillu kukkussuteqarsimaneq nassuerutigineqartariaqarluni:
- Qanga meeravissianngortitsisarnermut ileqquusimasut naapertuutinngitsut qitornavissianngortinneqarsimasut anniaatissaannik kinguneqarnikuupput. Taamaattumik qallunaat naalagaaffiat qitornavissianngortinneqarsimasunut ilaqutaannullu pisimasut nassuerutiginerisigut iperaanissaannut aqqutissiuussisussaavoq. Aningaasatiguinnaanngitsoq aammali iliuutsitigut.
