Naalakkersuisunut ilaasortaasimasoq maannalu aalisartut piniartullu kattuffianni KNAPK-mi pisortaq Vittus Qujaukitsoq marsip aqqarngani Inatsisartunut qinersinermi qinigassat akornanniinnissani naatsorsuutigaa.
- Takorluuisinnaassuseqartoqanngilaq siulersuisoqaranilu. Tamannalu qinersinermi allanngortittariaqarparput, Vittus Qujaukitsoq allakkatigut oqaaseqarpoq.
Naalakkersuisunut ilaasortaasimasoq maannalu aalisartut piniartullu kattuffianni KNAPK-mi pisortaq Vittus Qujaukitsoq marsip aqqarngani Inatsisartunut qinersinermi qinigassat akornanniinnissani naatsorsuutigaa.
- Takorluuisinnaassuseqartoqanngilaq siulersuisoqaranilu. Tamannalu qinersinermi allanngortittariaqarparput, Vittus Qujaukitsoq allakkatigut oqaaseqarpoq.
Partiit avataanni qinigassanngortinniarluni, partiimili Nunatta Qitornaata suliniutaa tunuliaqutaralugu politikeri Sermitsiamit apersorneqarnermini itisiliivoq.
- Partiinut allanut qinigassanngortinnissaq takorloorsinnaanngilara, oqarpoq.
40-nik atsiornernik pisariaqartitsisoq
Nunatta Qitornai qinersinermi kingullermi qinigaatitaqanngilaq, partiilu qinigassanngortissinnaanngoqqissaguni qinersisinnaasut 1/31-iannik atsiornernik katerseqqaartussaavoq.
Partiimilli tunuliaqutaqarani qinigassanngortissaguni qinersisinnaasut atsiorneri 40-t kisiisa pisariaqartippai, tamannalu Vittus Qujaukitsup anguniarpaa.
Qujaukitsup politikkikkut anguniakkamini inuuniarnermi atukkat pitsaanerujussuanngortinnissaat pingaaruteqarluinnartutut oqaatigaa, tamannalu anguniarlugu nunap avammut tunisassiaani pingaarnerpaami isertitat qaffassarnissaat sulissutiginiarpaa: Aalisakkat.
- Inuiaqatigiittut qanoq aalisagartassiissutit amerlinissaat taamaalillutalu nunap aalisakkanit iluanaarutaat annertusinissaat pillugu aalajangertariaqakkat aajangiiffigisariaqarpagut, aningaasallu taakku atuarfeqarfinnut, napparsimmavinnut, utoqqaat illuinut pitsanngorsaatigalugit il.il.,Vittus Qujaukitsoq oqarpoq.
Sinerissap qanittuani aalisarneq nutaanngorsarneqassaaq
Kalaallit Nunaata aningaasaqarnikkut imminut napatissinnaanerulernissaa anguniarlugu iliuuseqartoqarpallaanngitsoq isumaqarpoq, siuarsaanissarlu sinerissap qanittuani aalisarnerup nutarterneratigut pisssaaq. Taannami isumaqarpoq tamanna iluanaarutigineqarnerusinnaasoq:
- Aalisakkat maanna pisat aningaasaqarnerup nukittunerulernissaanut naammapput, oqarpoq. Tamanna anguniarlugu sinerissap qanittuani aalisarnerup iluaqutigisassaanik aalisarnermut inatsisit nalilersorneqaqqittariaqarpoq.
- Tamannami Aningaasaqarnermut Siunnersuisoqatigiit inassuteqaataannut, annertuumik aningaasartuutaasunik ingerlatsinermik siuarsaaniarnerusunut, akerliulluinnaraluarpoq?
- Aap, isumaqatiginngilluinnarpakkali.
- Tamanna tunngavissaqanngilaq, pisassiissutinik atugassarititaanillu pitsaanerulersitsinikkut sinerissap qanittuani aalisarneq nutarterneqartariaqarpoq.
Amerikamiut asuli oqaluppat?
USA-p præsidentiata Donald Trumpip Kalaallit Nunaat oqartussaaffigilerusullugu pigerusunneranut Vittus Qujaukitsoq aamma isumaqarpoq.
Oqaloqatigiinneq pisortatigoortumik ingerlanneqartariaqartoq, præsidentip oqaasii sioorasaarinertut paasineqarsinnaasut aqqutiginagit isumaqarpoq.
Tamatuma saniatigut USA-p sakkutooqarfiit amerlanerusut pilersinniarunigit pilersinnianngikkunigilluunniit nunatsinnut aningaasatigut iluaqutaanerunissaa pingaaruteqartoq Qujaukitsoq oqarpoq.
Maanna Amerikamiut Kalaallit Nunaanni aningaasaliiniarlutik aalajangersimasumik iliuuseqarusunngillat:
- Amerikamiunik aningaasaliisussarsiorneq ajornaatsuinnaanngilaq.
- Amerikamiut aningaasaleerusunnertik pillugu erseqqinnerusunik tigussaanerusunillu paasititsisariaqarpagut, oqariartuutaat oqaasiinnaassanngippata, Vittus Qujaukitsoq oqarpoq.
2021-mi Inatsisartunut qinersinermi Nunatta Qitornai 639-nit taaneqarput, taakkunannga Vittus Qujaukitsoq 269-init qinerneqarluni, tamannalu Inatsisartunut ilaasortanngornissaminnut naammassimanani.
