RAL-ip tapiliuttagaq akitsuut 8 procentimik 10 procentimut qaffappaa
Uuliap akiisa aningaasallu nalingisa qaffalaarsimanerat pissutigalugu Royal Arctic Linep uuliamut aningaasallu nalinginut tapiliuttagaq qaffappaa.
Royal Arctic Linekkut nassiussineq decembarip aallaqqaataanit akisunerulissaaq.
Assiliisoq: Royal Arctic Line
Uuliamut aningaasallu nalinganut tapiliussaq maannamut 8 procentiusimavoq, decembarip aallaqqaataaniilli 10 procentinngortinneqassalluni, umiarsuaatileqatigiiffik nittartakkamini allappoq.
- Royal Arctic Linep uuliamut aningaasallu nalinginut tapiliuttagaq iluanaaruteqarfigineq ajorpaa, tapiliuttagarmi uuliamut akit aningaasallu nalingisa allanngoriartornerisa sunniutaannut ingerlatseqatigiiffik qajannaarsarniarlugu atortarmat, Namminersorlutik Oqartussat ingerlatseqatigiiffiutaata erseqqissarpaa.
CO2-mut tapiliussaq appartinneqarpoq
ETS-imut tapiliussap 1,38 procentimit 1,27 procentimut appartinneqarumaarneranik ilisimatitsissuteqarneq RAL-imi atuisunut qiimmassaataalaarpoq.
ETS-imut tapiliussaq tassaavoq EU-p umiarsualiviinut tulannermi CO2-mut akitsuut EU-mut akilerneqartartoq.
- ETS-imut akitsuut EU-mut akilerneqassaaq, taamaattumillu akitsuut akilerneqartoq Royal Arctic Linemut akiliutaanngilaq, erseqqissaatigineqarpoq.
Ineriartorneq malittareqqissaarneqartoq, januaarillu aallaqqaataani 2025-mi qanoq nalimmassaasoqassanersoq decembarip ingerlanerani nalilersuiffigineqassasoq, umiarsuaatileqatigiiffik ilisimatitsivoq.
