Regine ilisimatusartunik unammisitsinermi ajugaavoq
Paasisavut 2024-mi ph.d.-nngorniartup Regine Møllerip nunaqarfimmut Isortumut tikeraarnermini paasisani, tassa piniartut tatineqaqqasut, pillugit saqqummiussaa ajugaasuuvoq.
Regine Møller ajugaanermini 50.000 koruuninik akissarsivoq, tamannalu Paasisavut 2024-mi Nuummi Katuami pivoq.
Emil Stach/Arctic Hub
Ilisimatusartut inuusuttut tallimat Nuummi Kalaallit Nunaannilu tamarmi tv-kkut malinnaasunut pingasunngornerup unnukkuani saqqummiillaqqinneqqusaapput: Issittoq pillugu ph.d.-liap minutsit tallimat atorlugit saqqummiunnerani kina torrallaanerusinnaava?
Regine Møllerip Tunumi Isortumi inuiaqatigiinnik ilisimatusarnini pillugu oqaluttuani Paasisavut 2024-mi ajugaassutigaa. Reginap suliaminik pimoorussinera naliliisartut pingasut maluginiarpaat.
Regine ajugaaninni pilluarit. Ilisimatusarnerit Isortumi piniartunut tunngassuteqassasoq qanoq aalajangerpiuk?
- Nalaatsornerinnakkut. Puisit amiinik tunisineq qanoq pitsanngorsarneqarsinnaanersoq paasiniarlugu suliniut aallartippara. Isortumeereernermali kingorna Isortoq samminiarlugu aalajangerpunga, Regine Møller oqarpoq.
Piniartut aallaavigalugit
Regine Møller Nuummiuuvoq Aalborgillu Universitetiani ph.d.-nngorniutini suliaralugu.
- Paasisat pingaarutillit ilaat tassaapput nunatta ineriartornera Isortumi qanoq misigineqarnersoq. Piniarnermik inuuniuteqartut sunniuteqarsinnaanatik. Taakku isiginnittaasaat aallaavigalugu pingaarnersiorneqanngillat - aningaasaqarneq kulturilu eqqarsaatigalugit, oqarpoq.
Tatineqarnerit taakku marluk imminnut ataqatigiissinnaasut Regine oqarpoq.
- Assersuutigalugu arfernik nannunilluunniit pisaqaraangamik neqaannik agguaassinissaq pingaartittarpaat, tamannali ajornartorsiutaalersinnaavoq piniartut aningaasatigut ajornartorsiulerpata allaniillu arsaartorneqartutut misigippata.
Sammisat politikkikkut assigiinngitsunik isummerfiusut
Ineriartorneq assigiinngitsunik isumaqarfigineqarnera Regine Møllerip ilisimatusarnermini erseqqissarpaa. Aamma inuiaqatigiinni pineqartuni misigissuserpassuarnik pinngortitsisartuni, soorlu Kalaallit Nunaanni ineriartorneq nunaqarfinni mikisuni unammilligassanik nassataqarpoq aamma piniarnermik inuussutissarsiuteqarnermut. Taakkuuppullu kalaallit oqaluttuarisaaneranni kinaassusaannullu pingaaruteqartut.
Apeqqut politikkimut attuumasorujussuuvoq. Ilisimatusarnerup politikkillu immikkoortinnissaat ajornakusuulersinnaava?
- Taama ernumatiginngilara, nunasiaateqarunnaarnissamik ilisimatusarnermik sammisaqarlunga suliniuteqarniarlunga aalajangernikuuvunga. Tassanilu suliniutigisakka tassaapput Isortumi kulturi aamma nunap inoqqaavisa ilisimasaat misilittagaallu, taakku inuiaqatigiinni qimataasutut immata. Ilisimatuussutsikkulli suli suliniutaavoq, ilisimatusarnermi periutsit toeriillu atorakkit, Regina Møller akivoq.
Paasisavut 2024 ilisimatusarnermik suliaqartunit Arctic Hubimit aaqqissuunneqarpoq, ph.d.-liortullu unammisinneqarnerisa aappassaralugu. 2026-mi unammisitsisoqaqqikkumaartoq Arctic Hub ilisimatitsivoq.
