RG-mi pisortaaneq toqoraavissuup siulersuisuini ilaasortanngortoq
Royal Greenlandimi pisortaaneq Susanne Arfelt Rajamand Danish Crown A/S-imi siulersuisunut ilaasortatut nutaatut toqqarneqarpoq.
Susanne Arfelt Rajamand Danish Crownip siulersuisuini ilaasortanngorpoq.
Leiff Josefsen
Malugiuk: Susanne Arfelt Rajamandip oqaaseqaataa ilanngullugu allaaserisaq nutarterneqarpoq.
Royal Greenlandimi pisortaaneq Susanne Arfelt Rajamand misilittakkani pillugit allattorsimaffimminut nutaamik allataqarsinnaanngussaaq.
Qallunaat toqoraavianni Danish Crownimi siulersuisunut ilaasortanngorpoq.
Danish Crownip marlunngornermi tusagassiuutinut nalunaarummini ilisimatitsissutigaa.
Pineqartoq siulersuisunut ilaasortanngornissani qilanaarutigaa:
- Danish Crownip allanngoriartornerani pissanganartumi peqataanissannut qilanaarpunga, neriuppungalu nerisassat pillugit ilisimasakka nunanilu tamalaani misilittakkakka atorlugit Danmarkimi suliffeqarfiit pingaarnersaat nerisassioriaasitoqqamillu ingerlatsiviup siunissaa qulakkeersinnaallugu, oqarpoq.
- Pisariaqartunik piginnaaneqarneq pingaaruteqarpoq
Susanne Arfelt Rajamandip ukiuni 20-ni nunani tamalaani inuussutissalerinermi nerisassanillu sullissinermi aqutsisutut misilittagai Danish Crownip pingaartippai:
- Susanne Arfelt Rajamand Danish Crownip siulersuisuini ilaasortatut avataaneersutut tikilluaqqusinnaallugu nuannaarutigeqaara. Siulersuisuni pisariaqartumik piginnaasalinnik peqarnissaq uagutsinnut pingaaruteqarluinnarpoq, Susannelu siulersuisuni ilaasortaalernerani aqutsisumik misilittagaqarluartumik nunani tamalaani inuussutissanik nioqquteqartartumik suliaqarnermik ingerlatsinermillu ilisimasaqarluartumik suleqateqalerpugut.
- Qularinngilara Danish Crownip ineriartortinneqartuarnissaanut annertuumik tapersersuisinnaassasoq, Danish Crownimi siulersuisuni siulittaasoq, Asger Krogsgaard oqarpoq.
Suliffeqarfissuaq Danish Crown ukiumoortumik nalunaarusiaq kingulleq naapertorlugu ukiumi naatsorsuusiorfiusumi 2022/2023-mi 67 milliarder koruuninik kaaviiaartitaqarpoq 25.000-illu sinnerlugit sulisoqarluni.
Susanne Arfelt Rajamandip Danish Crownimi siulersuisuini akisussaaffini novembarimi 2024-mi tigussavaa.
NGO-nut tunissutiginiarai
Susanne Arfelt Rajamand Royal Greenlandimi pisortaanertut februaarimi 2023-mi atorfinitsinneqarpoq, maannalu Royal Greenlandip aningaasaqarnerata iluarsaannissaanik suliassaqarpoq, ingerlatseqatigiiffimmi 2023-mi akileraarutit suli ilanngaatiginagit 255 millionit koruuninik amigartoormat.
Royal Greenlandimi pisortaaneq Sermitsiamut allakkatigut ilisimatitsivoq siulersuisuni ilaasortaanini Royal Greenlandimi sulinerminut sunniuteqarnavianngitsoq:
- Atuuffik taanna Royal Greenlandimut iluaqutaalluarsinnaasunik ilinniarfiusinnaavoq, tassami Danish Crown Royal Greenlandilu allanngoriartorput, aamma Danish Crownip misilittagai periusissiamik uagut ineriartortitsinitsinni pitsanngorsaataasinnaapput, Susanne Arfelt Rajamand oqarpoq.
Ilaasortaanini ajungitsorsiaqarfiginiarnagu ilanngullugu paasissutissiissutigaa. Kalaallit Nunaannili NGO-nut tunissuteqaatitut tunnissaat anguniarlugu aaqqiissummik suliaqarniarluni.
