RG-p aningaasaqarnerata ingerlalluaqqilernissaa anguniarlugu atorfiit 100-t atorunnaarsinneqassapput
Ingerlatseqatigiiffiup aningaasaqarniarnera iluarsiniarniarlugu Kalaallit Nunaanni Europamilu sulisut arlallit soraarsikkumaarlugit Royal Greenlandip pisortaa oqarpoq.
Atorfiit 100-t missaanniittut atorunnaarsinneqarumaartut Royal Greenlandimi pisortaaneq Susanne Arfelt Rajamand oqarpoq.
Royal Greenland
Royal Greenlandip aningaasaqarnerata ingerlalluaqqilernissaa anguniarlugu ingerlatseqatigiiffimmi maanna arlalinnik iliuuseqartoqarpoq, ilaatigut atorfiit 100-t missaanniittut atorunnaarsinneqassallutik.
Suliffiit pingajorarterutaat inuttaqanngimmata soraarsitsinerinnaanatik atorfinnik atorunnaarsitsinerussapput, sulisulli 65-it missaat soraarsitaassallutik.
Royal Greenlandip Kalaallit Nunaanni immikkoortortaqarfiani inuit qulit inorlugit soraarsinneqarumaarput, sinnerilu Europami Royal Greenlandip tuniniaasui nittarsaassisuilu soraarsinneqarumaarput.
Royal Greenlandip pisortaa Susanne Arfelt Rajamand Sermitsiamut oqarpoq.
Aalajangerneq oqitsuinnaanngitsoq
Royal Greenland 2023-mi 211 millionit koruuninik amigartooruteqareersorlu taamatut nalunaaruteqartoqarpoq.
Suliffeqarfimmi Namminersorlutik Oqartussanit pigineqartumi maannakkut suut tamarmik allanngortinneqarlutillu soraarsitsinerit oqitsuinnaanngikkaluartut pisariaqartut pisortap oqaatigaa:
- Aalajangernerput oqitsuinnaanngilaq, eqqarsaatigilluareerluguli aalajangerpugut, Susanna Arfelt Rajamand oqarpoq, nangipporlu:
- Aningaasaqarnitta iluarsiniarnera, niuernitta ingerlalluarnissaa sullitattalu pisariaqartitaannik matussusiinissaq eqqarsaatigalugit tamanna aalajangiisariaqarsimavugut.
Allannguerujussuartoqarnissaanut atatillugu ukiumut minnerpaamik 100 millionit koruuninik sipaarniutigineqassasut pisortap siusinnerusukkut paasissutissiissutiginikuuaa.
