Royal Arctic Linep ukiumut angusai naatsorsuutiginngisamik sinneqartooruteqarfiusut

Royal Arctic Line (RAL) 2024-mut angusatigut amigartooruteqassangareerluni akileraannginnermi 6 millionit koruuninik sinneqartooruteqarpoq.

RAL tusagassiorfinnut nalunaarummini taama allappoq.

Suliffeqarfiup ukiumut angusani naammagisimaarnartutut nammineq taavai. 2024-mimi ukiup affaani siullermi 15 millionit koruunit 20 millionit koruunillu akornanni amigartooruteqarnissi naatsorsuutigisimagaluarpaa.

Umiarsuaatileqatigiiffik immikkoortortatut ingerlatseqatigiiffiutimi Arctic Umiaq Linep aningaasarsiornikkut ingerlanerliornera pissutigalugu amigartooruteqassangasimagaluarpoq, tamannali Royal Arctic Linemi Arctic Umiaq Linemilu arlalinik suliniuteqarnikkut aaqqiissinnaasimallugu.

- Ukioq 2024 naammassilluaraluartoq ingerlatseqatigiiffiup aningaasaqarnerata nukittorsaqqinnissaa Royal Arctic Linep pisariaqartippaa nunatta pilersorneqarnera siunissamut qularnaarsinnaajumallugu, tusagassiorfinnut nalunaarummi allapput.

Umiarsuaatileqatigiiffik 2023-mi 4,5 millionit koruuninik sinneqartooruteqarpoq, ukiullu taassuma siuliani 9,9 millionit koruuninik amigartooruteqarluni.

AAMMA ATUARUK

RAL-imi naatsorsuutit: Annertuumik amigartooruteqarnermit annikitsumik sinneqartooruteqarnermut

Ukiup tulliani sinneqartooruteqarnerussangasoq

2025-mi akileraannginnermi 15 millionit koruunit 25 millionit koruunillu akornanni sinneqartooruteqarnissi naatsorsuutigigini, Royal Arctic Line allappoq.

RAL-ip umiarsuarnut, umiaasaaqqanut, ullutsinnut naleqqunnerusumik assartugaleriaaseqalernissamut umiarsualivinnilu sulinermi atukkanik pitsanngorsaanissamut aningaasaliisinnaajumalluni ukiuni aggersuni isertitaqarluaannarnissi pisariaqartippaa.

Assartukkat amerlassusaat suliffeqarfiup angusaanut pingaaruteqarput. 2024-mi assartukkami annertoqataanik 2025-mi assartugaqarumaarnissi neriuutigaa, naak pingasunik nutaanik mittarfeqalertussaagaluartoq aalisakkanillu avammut nioqqutissanik tunisassiortukinnerulertussaagaluartoq.

Sinneqartooruuteqartooruteqassanganerminik piviusunngortitsiumalluni assartuinermi akinik qaffaareerpoq, umiarsuaatileqatigiiffimmilu ingerlatsinermut aningaasartuuteqarnermik aningaasaliissuteqarnermilu aqutsineq sukateriffigissallugu.

Angalanissamut pilersaarutit allanngortut

Angalanissamut pilersaarutit aamma sammineqarput, Atlantikoq ikaarlugu sinersortaatinillu angallassinerit tamatumani pineqarlutik.

 Atlantikoq ikaarlugu angallassinermi ilaasut kissaataannik oqimaaqatigiissaarinissaq aalajangersimasumillu angallassinissaq 2024-mi pingaarnerutinneqarsimapput.

 Arctic Umiaq Line takornariartitsinermi siorna aamma siuarsaavoq. Sinersortaammilli angalasartut najukkami pisariaqartitaat pingaarnerutinneqarnissaat politikkikkut kissaatigineqarmat, Sarfaq Ittuk Qaqortup Ilulissallu akornanni 2025-mi sapaatit akunneranut ataasiarluni angalassisalerpoq, tikiffigineqartuniit ingerlaqqittoqarsinnaalluni.

Arctic Umiaq Linemut kiffartuussinissamut isumaqatigiissut ukiup naanerani atorunnaassaaq, ingerlatseqatigiiffiullu immikkoortortaqarfiata siunissaa Namminersorlutik Oqartussat oqaloqatiginerisigut ukiup affaata tulliani paasinarsissaaq.