Royal Greenland Asiami aatsaat taama tunisaqartigaaq

Obs: Ingerlatseqatigiiffiup ataatsimeersuarnissaanut ulloritinneqartoq kukkusumik allassimammat, maanna naqqinneqarpoq.

Royal Greenlandip 2023-mi akileraarutit suli ilanngaatiginagit aatsaat taama amigartooruteqartigigaluartoq niuernermi siumut aallartoqarpoq.

Kaaviiaartitat 160 millionit koruuninik qaffariaateqarlutik Asiami 2 milliardit koruunit sinnerlugit 2023-mi kaaviaartinneqarput. Kinami tunisat amerleriaateqarnermut pingaartumik pissutaapput, tassami raajat qalerallillu tunineqarluarsimapput.

- Ukiup ingerlanerani qaammatini kingullerni niuerfiit Kinamiittut pisisinnaassuseqarluaraluartut ingerlanerliulerput, taamaammallu piumaneqarneri kiisalu niuerfinni akit annikitsumik apparput, Royal Greenlandip ukiumut nalunaarutaani atuarneqarsinnaavoq. Nalunaarut ingerlatseqatigiiffiup ataatsimeersuarnerani maajip 17-ianni pisussami akuerineqassaaq.

Kinami niuerneq ukioq manna qaammatini siullerni pitsaanerulersimava?

- Kinami niuernermi allanngorartoqarnera tusagassiuutitigut oqallisigineqangaatsiarpoq. Pisiniarfinni atuisut tunuarsimaalersimanerat nalunaarutigineqarpoq. Atuisugulli pingaarnertut tunisassiornermi qaffasinnerusumik inissisimapput, tassanilu aalisakkat pitsaasut piumaneqarluarput akillu ilimagisatsitut inissisimallutik, Royal Greenlandimi pisortaaneq Susanne Arfelt Rajamand Sermitsiamut oqarpoq. Taassuma "Kinami niuerneq piffissamik atuiffiulluarpoq qanimullu malinnaaffigineqartoq" erseqqissarpaa.

Japan russinit tiguarneqarpoq

Japanimi niuerneq aamma unammilligassaqarpoq. Ruslandip Japanimut saattuanik tunisaqarnerujartornera pissutigalugu tunisat 11 procentimik qaffariarput, taamaalillunilu akii 30 procentimik appariarlutik.

- Niuerfiit Amerikamiittut saattuanik Rulandimeersunik eqqussuinissamut matusinikuummata tamanna Ruslandip saattuanik qerisunik Japanimut taamaallaat tunisisinnaaneranik peqquteqarpoq, russit Japanimut tunisinerulernerannut taama nassuiaasoqarpoq.

Royal Greenlandip kaaviiaartitai nunanut assigiinngitsunut agguataarneqartillugit Asiami tunisat 2022-mut sanilliullugu 2 procentpontinik qaffariarsimapput. Asiami tunisat maanna kaaviiaartitanit tamarmiusunit 35 procentiupput, 2023-mi 5,796 milliardit koruuniullutik.

Akerliani Skandinaviami Europamilu tunisassiat 19 procentpointimik 26 procentpointimillu appariarput.

Ukiualuit matuma siorna Europamiut 31 procentit kaaviaartinneqartarput — 5 pointinik amerlanerusut.

USA-mi niuerneq pitsanngoriartortoq

Pisuni pitsaasuni allani amerikami niuerneq eqqaaneqarpoq.

- USA-mi saattuanik niuerfik 2022-mi ajalusoornermi kingorna nalinginnaasumik ingerlaqqilermat isertitat qaffallutillu periuseqarluni tuniniaanikkut saattuarniarfiup ingerlanerani tunisassiat 60-70 %-ii tunineqartarput.

2023-mi ikerinnarsiorluni aalisarneq Royal Greenlandip oqaluttuarisaanerani aatsaat taamak angusarissaarfiutigaaq aamma paasissutissiissutigineqarpoq.

- Aningaasaqarneq ammassanniarnermik isumalluuteqangaatsiarpoq, aammali ammassannik, saarullernanik, avaleraasartuunik ammassassuarnillu aalisarnikkut ukioq naallugu aalisarneq pilersinneqarpoq. Aalisagaqatigiilli nunatta imartaaniinngimmata aalisarneq tamarmi nunat allat imartaanni ingerlanneqarpoq.