Royal Greenland pisortartaartoq
Maanna Tusassimi pisortaq Toke Binzer allamik atorfittaarluni Royal Greenlandimik pisortanngussaaq.
Nunani tamalaani niuernitta ineriartortinnissaanut Kalaallit Nunaatallu tamarmi iluaqutissaanik naleqarnerulersitsinissamut ingerlatseqatigiiffik suleqatigissallugu qilanaaraara, Toke Binzer oqarpoq.
Assi: Oscar Scott Carl
Royal Greenland Namminersorlutik Oqartussanit pigineqartoq pisortamik atorfinitsitsivoq.
Toke Binzer, 2024-mi marsimili Tusassimi pisortaasimasoq, toqqarneqarpoq.
Toke Binzer decembarip aallaqqaataani Royal Greenlandimi atorfinissaaq, siulersuisunilu siulittaasoq Niels Thomsen atorfinitsitsineq pillugu tusagassiutitigut nalunaarummi ima oqarpoq:
- Royal Greenland-ip nuannaarutigingaarlugu Toke Binzeri tikilluaqquaa. Tokep piginnaasatigut nutaaliornikkullu aqutseriaaseqarsinnaanini uppernarsarsimavaa. Siulersuisullu qilanaarput misilittagaqqortunerata aammalu aqutsinikkut suleriaasaa pissarsiaqaatigissallugu.
- Angusaqarusussutitsigut, suliniuteqarnikkut aammalu Kalaallit Nunaanni nukittuumik tunuliaqutaqarnikkut assigiiffeqarpugut – taamaattumik suleqatigiinnissarput qilanaaraara, siulersuisuni siulittaasoq oqarpoq.
Pisortanngortup Preben Sunke, Susanne Arfelt Rajamandip februaarimi soraarsitaaneraniilli pisortaanerugallartoq, taarsissavaa.
Taanna ukiut marluk pisortaaneruvoq.
Aamma qanittukkut siulersuisuni taarsiisoqarpoq, tassani Niels Thomsen Maliina Abelsenimut siulittaasutut taartaasussanngortinneqarluni Naalakkersuisunit toqqarneqarpoq.
Tusassimi siulersuisuini siulittaasoq: Royal Greenland aamma nukittorsarsinnaavaa
Royal Greenland ukiuni kingullerni aningaasaqarnikkut ajornartorsiuteqarluni amigartooruteqangaartarpoq. Isertitalli pitsanngorsimasut akileraarutillu suli ilanngaatiginagit amigartoorut 11 million koruuniusut 2025-mi ukiup affaanut siullermut nalunaarusiami takuneqarsinnaavoq.
Pisortaanerata allamik atorfinitsitsineratigut Tusassip maanna pisortaanertik annaavaat. Tusassimi siulersuisuni siulittaasoq Ulrik Blidorf allamik atorfininnera pillugu ima oqaaseqarpoq:
- Suliffeqarfiit akornanni suleqatigiinnerup nukittorsarneqarnera aqutsinermilu piginnaasanik paarlaasseqatigiittarneq tamanut iluaqutaavoq. Toke Tusassimi atorfininnerminiilli suliaminut pikkorissusermik, periusissianik paasinnissinnaanermik naammassinnissinnaassutsimillu takutitsiviuvoq – qularutiginngilarpullu Royal Greenlandip nukittorsarneqarnissaa aamma qulakkeersinnaagaa, Ulrik Blidorf oqarpoq.
