Royal Greenlandimiit Nils Duus Kinnerup inuulluaqquaat
Royal Greenland nalunaarpoq suliffeqarfimmi aningaasaqarnermut nutaamik pisortartaassallutik.
Nils Duus Kinnerup, ukiuni 17-ni Royal Greenlandimi sulereerluni, januaarip aallaqqaataa aallarnerfigalugu aningaasaqarnermut pisortatut atorfimminit tunuarnissani aalajangerpaa.
Foto: Royal Greenland
Nils Duus Kinnerup inuttut atugai pissutigalugit Royal Greenlandip Kalaallit Nunaanni aqutsinermik qitiusumik ingerlatsilernissamik pilersaarutaanut malinnaanissaq ajornakusoortippaa, Royal Greenland ilisimatitsivoq:
- Tamanna Royal Greenlandip nunatsinni qullersanik najugaqartitsinissamik siunertaqarnerata malitsigisaanik pivoq, tassami Nils inuttut atukkani peqqutigalugit siunertamut matumunnga peqataasinnaanngilaq
Royal Greenland tusagassiuutitigut nalunaarummi allappoq Nils Duus Kinnerup Royal Greenlandimi sulinermini suliffeqarfiup aningaasaqarnikkut aqunneqarneranut ineriartorneranullu pingaaruteqarsimasoq, matumanilu pissutsit ilungersunartut kingorna suliffeqarfiup piffissami sivisuumi sinneqartooruteqarsimaneranut sunniuteqarluarsimalluni.
Pisortaaneq naleqartinneqartoq
- Nilsip aningaasaqarnikkut ineriartornermut sinneqartooruteqartarnermullu sunniuteqangaatsiarsimanera, aammattaaq ingerlatseqatigiiffik tamaat isigalugu aqutsilluarlunilu pimoorussilluarsimanera ilisimalluarlugulu qujamasuutigaarput, Royal Greenlandip pisortaanera, Susanne Arfelt Rajamand, oqarpoq.
Nilsip nammineerluni aamma suliffeqarfiup nunani tamalaani ingerlanneqarneranut sunniuteqaqataasimanini tulluusimaarutigaa.
- 2008-mi Royal Greenlandimi sulileqqaarninnit aqqusaarsimasakka nuannersorpassuupput. Ingerlatseqatigiiffiup ineriartorneranut niuernikkullu iluatsitsilluarneranut maanna suli atuuttumut Kalaallit Nunaannilu inuiaqatigiinnut iluaqutaasumut peqataasimanera nuannerlunilu pissarsiaqarnaqaaq.
- Suliffeqarfissuarmi tamarmi, kangianiit kitaanut, Kalaallit Nunaanniit Japanimut, USA-miit Canada-mut kulturerpassuarnilu assigiinngitsuni suleriuseq pilersissimasarput tulluusimaarutigaara.
Royal Greenland maanna aningaasaqarnermut pisortamik nutaamik ujaasileruttorpoq, tamannalu sapinngisamik piaarnerpaamik nalunaarutigineqarumaartoq naatsorsuutaavoq. Aningaasaqarnermut pisortaq nutaaq Nuummi allaffeqarumaarpoq.
