Ruslandip Kina peqatigalugu Issittoq ulorianartorsiortinnginnerarpaa
USA-p Issittoq pillugu periusissiaani nutaami Danmarki, Kalaallit Nunaat Natomilu ilaasortaasut Issittumi sakkulersornerulernissaannik kajumissaarneqarput.
Nato-mut nunat ilaasortaasut Ruslandimut Kinamullu akiuussutissanik piaartumik nunap immikkoortuani sakkulersortariaqartut, USA Issittoq pillugu periusissiamini nutaami allappoq.
Ida Guldbæk Arentsen/Ritzau Scanpix
Ruslandip Kinallu Issittumi suleqatiginninnerujartornerat nunap immikkoortuani patajaatsuunermut sunniuteqarsinnaanerarlugu USA-p unnerluutiginninnera pingasunngormat Ruslandip naalakkersuisuisa ilumuunnginneraraat, Reuters allappoq.
USA-p tamanna periusissiami nutaami allaaseraa, tassanilu Nato-mut ilaasortaasut Issittumi sakkulersornerulernissaannik kajumissaarneqarput. Pingaartumik Danmark Kalaallit Nunaallu kajumissaarneqarput.
- Periusissiami tassani Issittumi pissutsit ilungersunarnerulersinnissaat siunertaavoq, Ruslandip nunanut allanut ministereqarfiani oqaaseqartartoq Maria Zakharova oqarpoq.
Danmarkip nunallu Nato-mi ilaasortaasut allat Issittumi suleqatigiinnissaat, nakkutilliinissaat sakkussiornerunissaallu pisariaqartoq, USA-p illersornissamut ministeriaqarfiata periusissiaani nutaami allassimavoq. Nato-mi nunat arfineq-marluk Issittumi soqutigisallit russit Issittumiitinnaveersaarnissaannut iliuuseqarnerunissaat periusissiami nutaami USA-p kissaatigaa, DR.dk allappoq.
- Issittumi pissutsit USA-p isumannaatsuuneranut pingaaruteqarluinnarput. Sermersuup aakkiartornera Kinamut Ruslandimullu soqutiginninnerulersitsisumik aqqutinik nutaanik ammaassivoq, DR.dk naapertorlugu illersornissamut ministerip tulliata Kathleen Hicksip, periusissiaq nutaaq saqqummiukkamiuk, oqarpoq.
