Rutte russit timmisartuinik pisariaqalissappat nakkartitsinissamik akuersisoq
Trumpip russit timmisartui Natomi nunat ilaasortat qulaaqqullugit ingerlaartut aallaarsaralugit nakkartinneqarsinnaanerannik pingasunngornermi kajumissaarutigaa.
NATO-p generalsekretæriata Mark Ruttep USA-p præsidentiata kaammatuutaa isumaqatigaa. Tassa Nato-mi nunat ilaasortat russit timmisartuinik qulaanneqartut aallaarsaralugit nakkartitsisinnaaqqullugit.
Assi: John Thys/Ritzau Scanpix
Nato-p generalsekretæriata russit timmisartui Natomi nunat ilaasortat qulaallugit angalaartut pisariaqalissappat nakkartinneqarsinnaanerat akueraa.
Generalsekretær Mark Rutte Fox News-imit sisamanngornermi apersorneqarluni oqarpoq.
Reuters taama allappoq.
- Pisariaqassappat. Præsident Trump isumaqatigeqaara. Pisariaqassappat, Rutte apersorneqarnermini oqarpoq.
Natomi sulisut navianartoqarneranik nalilersuinissamut sungiusarsimasut, russillu timmisartui iligiit silaannaanni angalaartut qimagutsinneqarsinnaanerannik imaluunniit iliuuseqartoqarnerusariaqarneranik pisariaqarnersoq nalilersuisuinnaasut aamma oqaatigaa.
Nutaarsiassaqartitsivik AFP naapertorlugu Rutte Nato-p pissaanermik atuinermut tunngatillugu najoqqutassiaanik malinnippoq. Nato-mi ilaasortat timmisartoq ulorianartorsiortitsisorigunikku aallaanissamut piareersimapput.
USA-p præsidentiata Donald Trumpip Nato-mi ilaasortat russit timmisartui Nato-p silaannaaniittut nakkartinneqarsinnaanerannik Naalagaaffiit Peqatigiit pingasunngornermi ataatsimeersuarneranni kajumissaarutigaa.
USA-mit timmisartumik taama nakkartitsisoqarsinnaanera tapersersorneqarnersoq Trump aperineqarami pissutsit apeqqutaanerarlugit akivoq. Reuters allappoq.
Nato-miit oqariartuutigineqartoq ersarikkaluartoq nunat iligiit assigiinngitsunik isumaqarput.
Nunamut killissamik qaangiisoqarpat "sakkortuumik qisuariartoqassasoq" Polenip ministeriunerata Donald Tuskip erseqqissarpaa. Timmisartui sorsuutit nakkartinneqarpata Ruslandimiit "maalaarutigineqassanngitsoq" Polenip nunanut allanut ministeriata Ruslandimut mianersoqqussutigaa.
Litauenimi illersornissamut ministeri Dovile Sakariane aamma taamatut isumaqarpoq, taassumalu Nato-mut ilaasortaq Tyrkia eqqaavaa. Nunami tassani russit timmisartui qulaaqqullutik killissamik qaangiillutik angalaartut aallaarsaralugit nakkartinneqarnikut eqqarsaatigalugit "taamaaliortoqarsinnaaneranik takussutissiisut" taanna oqarpoq.
Tysklandip illersornissamut ministeriata Boris Pistoriusip Nato-mi ilaasortat "qisuariartinneqarniarsarinermik" pisarineqaqqunagit mianersoqquai, Frankrigillu præsidentia Emmanuel Macron Nato "suli annerusumik iliuuseqartariaqartoq" oqarpoq.
Taamaakkaluartoq Frankrigip præsidentiata Ruslandimit misilinneqaruni "sakkulersorunnaratik“ naqissuserpaa.
/ritzau/AFP
