KOKAINIMIK SULIAQ
Sakkortuumik ikiaroornartulerisimasutut unnerluutigineqartut pinngitsuunerartut
Kokain pillugu Nuummi eqqartuussivilersuussinermi suliarujussuaq sisamanngornermi aallartippoq, suliamilu tassani unnerluussisup unnerluutigineqartut marluusut aappaata pineqaatissineqarsimasunut ukiuni qulini inissiisarfimmiittussanngortinneqarnissaa anguniarpaa. Angut taanna S-imik taasarput ikiaroornartulerisimasutut unnerluussutini tamani pinngitsuunerarpoq. Unnerluutigineqartup aappaa N-imik taasarput annikitsumik kokainiuteqarsimanini nassuerutigaa.
Angutit marluk unnerluussutit katillugit arfineq-marluk pillugit Eqqartuussisoqarfik Sermersuumi ulluni tallimani, pisariaqassappallu ulluni arfinilinni, eqqartuussivilersuunneqassapput.
Assi: Morten Okkels
Eqqartuussisoqarfik
Sermersuumi ini eqqartuussivik 3-mi unnerluutigineqartut nunatsinni ikiaroornartulerinermik
pinerluuteqarsimasuni annerpaanut ilaasuunerpat?
Unnerluussisussaatitaasoq taama isumaqarpoq, angutillu unnerluutigineqartut aappaata
44-inik ukiullip S-imik taasatta pineqaatissinneqarsimasunut ukiuni qulini inissiisarfimmiittussanngortinneqarnissaa – tassa pineqaatissiissutit sakkortunerpaat tullianik pineqaatissinneqassasoq, unnerluussisussaatitaasoq
isumaqarpoq - nunatsinnilu pineqaatissiissutaasartut sakkortunersaat tassaavoq piffissaligaanngitsumik paarisassanngortinneqarneq.
S-ili
pisuusoq uppernarsarneqatigani pisuutinneqarsinnaanngilaq. Tassa angutip
taassumi unnerluussissutini sakkortuujusuni ilumut pisuunersoq, unnerluussisup uppernarsarsinnaassaneraa
ulluni tulliuttuni paasinarsissaaq. N suliami tassani aamma
unnerluutigineqarpoq. Unnerluutigineqartut tamarmik immikkut eqqartuussivimmut politiinit
katillugit sisamaasunit eqqunneqarput.
Unnerluussisup
unnerluussut nipituumik atuarpaa. S kokainimik katillugit kiilup affaanik
annertussusilimmik ikiartoornartulerisimasutut arlalitsigut unnerluutigineqarpoq.
Unnerluussisup
S kokainimik Københavnimiit Kangerlussuarmut anngiortumik eqqussuinerni siuttuusimanerarlugulu
kokainimik annertuumik N-imut tunniussaqarsimanerarpaa.
S ikiaroornartumik cannabisimik annertuumik naatitseqataasimasutut
sioorasaarisimasutullu aamma unnerluutigineqarpoq. S-ili unnerluussutini tamani
pisuunnginnerartoq, illersuisua Thomas Wiemann oqarpoq.
N-ip 30
grammiuteqarsimanini nassuerutigigaa
Suliami
unnerluutigineqartup aappaa, N, pineqaatissinneqarsimasunut ukiuni sisamani
inissiisarfimmiittussanngortinneqassasoq, unnerluussisoq isumaqarpoq. N kokainimik
112 grammimik tuniniagassaminik N-imit tigusaqarsimasutut unnerluutigineqarpoq.
N-ip tamanna ilumuunnginnerarpaa, namminerli atugassaminik 30 grammimik kokainiuteqarsimanini
nassuerutigalugu.
N unnerluussutini
allani sioorasaarinermut tarnikkullu innarliinermut tunngasuusuni aamma pinngitsuunerarpoq.
Unnerluussutit taakkua ikiaroornartulerisimasutut unnerluussutinut attuumassuteqanngillat.
Eqqartuussivilersuineq
ullumikkut nanginneqassaaq, unnerluussisup tamatumi suliaq qanoq ingerlanneqarsimanersoq
tassani oqaluttarissallugu. Suliami unnerluutigineqartup aappaa killisiorneqarnera
kingusinnerusukkut tusagaqarfigiumaarparput.
Pinerlunnermik suliani unnerluutigineqarneq oqaaseqarnissamut
pisussaatitaaffiuneq ajorpoq. N-ili killisiorneqarnissaminut akuersinikuuvoq.
