Sakkutuut 550-it sungiusartut - ministerit Nuummut ataasinngornermi tikeraassapput
Kalaallit Nunaanni Arctic Light-imik taallugu sungiusarneq nunat Nato-mi ilaasortaasut arlallit sakkutuui peqataassapput. Illersornissamut ministeri Troels Lund Poulsen Norgemi Islandimilu ministerit kiisalu nunanut allanut ilisimatusarnermullu naalakkersuisoq Vivian Motzfeldt (S) ilagalugit sungiusarnermut ataasinngornermi alakkaassapput.
Illersornissaqarfiup Kalaallit Nunaanni suliaqarnini Issittup soqutigineqarnerulernerata kingorna annertusarpaa. Nato-mi suleqatit Illersornissaqarfimmit soorlu sungiusaqatigineqartut.
Assi: Jesper Hansen
Sakkutuut 550-init amerlanerusut Nato-mi nunanit arlalinneersut Kalaallit Nunaanni septembarip 19-iata tungaanut sungiusarput.
Illersornissamut ministeri Troels Lund Poulsen, nunanut allanut tunngasunut naalakkersuisoq Vivian Motzfeldt (S) Norgemi Islandimilu ministerit peqatigalugit Nuup eqqaani sungiusarnermut peqataasut ataasinngornermi tikeraassavaat.
Illersornissamut ministereqarfik tusagassiuutinut nalunaarummi allappoq.
- Kalaallit Nunaanniinnerput eqqaanilu illersornissaqarfimmiit piffissami aggersumi annertusaaffigaarput, Natollu Issittumi piareersimanera annertusarlugu, illersornissamut pisortaq Michael Wiggers Hyldgaard nalunaarummi oqarpoq.
Imaani annaassiniartarneq attaveqaatinillu illersuineq
Atlantikup avannaani Issittumilu siooranartoqalissagaluarpat ataatsimut qisuariarsinnaaneq illersornissaqarfimmiit Nato-milu iligisaniit, sungiusarnermik Arctic Light 2025-mik taallugu, sungiusarneqarpoq.
Sungiusarnermi imaani annaassiniarneq, immap mingutsinneqarneranik iliuuseqarneq attaveqaatinillu pingaarutilinnik illersuineq aamma ilaasut, illersornissamut pisortaq oqarpoq.
Siornatigut aamma taamaaliortarsimapput.
Politikkerit Kalaallit Nunaannut ataasinngornermi tikeraarnerminni umiarsuarmut alapernaarsuummut "Niels Juel"-imut ilaatigut ikissapput.
Tassani qulimiguulimmik timmisartumillu F-16-imik sungiusarnerit malinnaaffigissavaat.
Timmisartut F-16-it qulaatissasut
Timmisarut sorsuutit F-16-it Kalaallit Nunaata imartaa sineriaalu qulaallugu sapaatip-akunnerata ingerlanerani ingerlaassasut, Issittumi Sakkutooqarfik Facebookimi quppernermini allappoq.
- Narsap, Qaqortup Nanortaliullu nalaa septembarip 15-iani aqqusaalerunikku nuna qulaallugu timmissapput, Issittumi Sakkutooqarfik allappoq, aamma ajoqutaasut utoqqatserfigalugit.
Ulluni sorlerni timmisartut qulaatissanersut ataani takuneqarsinnaavoq.
Nunat Natomi ilaasortat arlallit peqataapput
Sungiusarneq septembarip qulingiluaani aallartippoq.
Frankrigimit, Tysklandimit, Sverigemit Norgemiilu suleqatigisat sungiusarnermut peqataapput.
- Kalaallit Nunaanni oqartussat nunanilu tamalaani suleqatigineqartut peqatigalugit Arctic Light aqqutigalugu Kalaallit Nunaanni upalungaarsimaneq tamarmiusoq nukittorsarlugulu sakkutuut Illersornissaqarfimmeersut ulorianartunik assigiinngitsorpassuarnik akiuinissamut piginnaaneri sungiusartarparput, Issittumi Sakkutooqarfimmi pisortaq generalmajor Søren Andersen Illersornissaqarfimmit tusagassiuutinut nalunaarummi oqarpoq.
Issittumi isumannaallisaanerup pingaartinnerulerneqarnerata kingorna Kalaallit Nunaanni eqqaanilu suliaqarneq annertusineqartoq Illersornissaqarfimmit aamma allapput.
Tamanna Issittumi Sakkutooqarfiup Kalaallit Nunaata naalakkersuisui suleqatigalugit aqunneqarpoq.
/ritzau/
