Sakkutuut sungiusartut 100-t Nunatsinnut tikittut
Sakkutuut attaveqaasersuutit pingaarutillit qanoq paarineqarnissaat sungiusassavaat, ullunilu tulliuttuni sumiiffinni arlalinni takussaassapput.
Sakkutuut Slesvigske Fodregimentimeersut 100-t missaanniittut sungiusarnermi Issittumi Sakkutooqarfimmit siulersorneqarput.
Assi: Jesper Hansen
Ullut tulliuttut sakkutuut 100-t missaanniittut, XIII Lette Infanteribataljonimi Slesvigske Fodregimentimeersut, sumiiffinni arlalinni takuneqarsinnaassapput.
Sakkutuut Nuummi Nuup Timersortarfissuaniillutillu, Kangerluarsunnguami nukissiorfimmiissallutillu Nordafarimil Polar Oilimiissapput.
Issittumi Sakkutooqarfik taamatut Facebookimi allappoq.
Sakkutuut Kangerlussuarmut sapaatiummat tikipput sapaatillu akunnerini marlunni sungiusartussaallutik, tassani attaveqaasersuutit pingaarutillit qanoq paarineqarnissaat sungiusassavaat.
Illersornissamut ministeri Troels Lund Poulsen juunip aallartinnerani nalunaarpoq sakkutuut Kalaallit Nunaanni eqqaanilu suliaqarnerat aasamut annertusineqarumaartoq. Isumannaallisaanissaq annertusarniarlugu taamaaliortoqassaaq, ministeri oqarpoq.
Issittumi Sakkutooqarfik naapertorlugu sungiusarneq manna Kalaallit Nunaanni oqartussaasut suleqatigalugit ingerlanneqarpoq.
Haderslevimeersuusut
SUNGIUSARNEQ
Issittumi Sakkutooqarfik sungiusarneq pillugu ima paasissutissiivoq:
Sakkutuut XIII Lette Infanteribataljonimeersut marlunngornermi Nuummut nuunneqassapput, tassaniillu assigiinngitsutigut Kangerluarsunnguami nukissiorfimmut Nordafarillu eqqaani Polar Oilimut ingerlaartinneqassapput.
Sakkutuut sungiusarnerminni annermik nakkutilliisarput, Kalaallit Nunaalli nunamigut imaannaanngimmat sakkutuut nuunnissaat nutaanik misilittagaqartitsissasoq naatsorsuutigineqarpoq.
Sakkutuut sungiusarnermi peqataasut ulluinnarni Danmarkimi Haderslevimeersuupput. Sapaatit akunnerini tulliuttuni Kalaallit Nunaanni sungiusartoqassaaq, tassanilu sakkutuut nunatta nunataa ilusaa pissutigalugu qamutinik motoorilinnik atuisinnaanngillat:
- Suliassaq tamanna uagutsinnut tulluarpoq. Sakkutuuuvugut ulluinnarni qamutinik motoorilinnik ingerlatsineq ajortut, taamaammat timitta atornissaa sungiusimavarput, Kalaallit Nunaannilu nunami suliaqarnissarput qilanaaraarput, kaptajn Youkhanis, sakkutuut immikkoortuisa siullianni pisortaq oqarpoq.
Slesvigske Fodregimentip sakkutuui sungiusarnermi Issittumi Sakkutooqarfimmit siulersorneqartut Issittumi Sakkutooqarfik nangilluni allappoq.
Sakkutuut sungiusarnermi sakkutuunit imarsiortunit timmisartortartunillu, maannakkut aamma tamaani sakkutooqartunit, tapersersorneqassapput. Issittumi tunngaviusumik ilinniarnermi ilinniartut suleqatigissagaat aamma pilersaarutaavoq, taakkua Illersornissaqarfiup Issittumi annertunerusumik peqataalernerani ilinniagaqarnerminni pissarsiaqangaarnissartik naatsorsuutigigaat, Issittumi Sakkutooqarfik allappoq.
