Sanaartornissaq ataatsimiititaliamit akuerineqarpoq
Naalakkersuisut Nuummi kollegialiornissamut aningaasaliissuteqarnissamik qinnuteqaataat Inatsisartut Aningaasaqarnermut Akileraartarnermullu Ataatsimiititaliaata akuersissutigaa.
Neqerooruteqarnermi akigititamik appasinnerusumik angusaqarniarluni suliassami arlalinnik naleqqussaasoqartoq, naleqqussaanerullu kingunerisaanik Nuummi ilinniartunut inissiat imm. 2-mut atatillugu taamaallaat Nuummi Kongevej-imi sanasoqassasoq, Naalakkersuisut ilisimatitsipput. Assi toqqorsivimmit.
Assiliisoq Leiff Josefsen
Ilinniartunut inissialiornissaq aallaqqaammut 2023-mi juunimi taamaatinneqarpoq, neqerooruteqartut isumaqatiginninniarfigineqarnerini aki naammaginartoq anguneqanngitsoormat.
Maanna illoqarfiit pingaarnersaanni sanaartornermik suliaqartitsisoqarsinnaanerulermat sanaartorneq aallarteqqinneqarpoq.
KOLLEGIEP SANANERANUT TUNNGASUT
ilinniartunut inissiat illutaasa amerlassusii tallimaniit sisamanut ikilineqarput, inillu quleriit amerlassusii amerlanerpaaffissaannut allanngortinneqarlutik.
Ilinniartunut inissiat illutaat sisamat ”Inissiaq +/++”-tut nalinginnaasutut sananeqassapput, minnerusunik inissiartaqassallutik, aammalu ilinniartunut aappalinnut ilaqutalinnulluunniit atorneqartussatut eqqarsaatigineqassallutik.
Illut sisamaasut ilinniartunut inissianik katillugit 52-inik, ataatsimut 224-nik siniffittalinnik inissiartaqassapput.
Najoqqutaq: Naalakkersuisut
Inatsisartut Aningaasaqarnermut Akileraartarnermullu Ataatsimiititaliaata akuersineratigut maanna sanaartornermut isumaqatigiissutit inaarutaasumik atsiorneqalersut, sanaartornerlu aggustimi 2024-mi aallartinneqassasoq, Naalakkersuisut tusagassiutinut nalunaarummi ilisimatitsipput.
Ilinniartunut inissiat 2027 tikillugu ingerlaavartumik tunniunneqartarnissaat atulertarnissaallu naatsorsuutigineqarpoq.
- Nuummi ilinniartunut inissaqartitsinerup annertusineqarnissaanut pilersaarutit maanna piviusunngortissinnaaleratsigit nunatsinni inuusuttunut nutaarsiassaavoq nuannersoq, Ilinniartitaanermut Naalakkersuisoq Aqqaluaq B. Egede oqarpoq.
- Inuusuttut ilinniarnerminni ineqarnertik pillugu annilaangannginnissaat toqqissisimanartumillu aallaaveqarnissaat toqqissisimanissaannut isumalerujussuusoq ilisimavarput.
Suliniummik naleqqussaaneq
Ilinniartunut inissiat suliassamut ‘Ilinniartunut inissiat nalinginnaasut’ imm. 2-mut, illoqarfinni ilinniartoqarfiusuni pingaarnerni tallimani: Ilulissat, Aasiaat, Sisimiut, Qaqortoq aamma Nuuk, ilinniartunut inissiat naammannissaannik qulakkeerinissamut siunertaqarfiusumut ilagitillugu sanaartorneqassapput.
Sanaartugassanut neqerooruteqartitseqqinnissaq aallaqqaammut ukiunik marlunnik - pingasunik kinguartinneqarpoq, kisianni Ineqarnermut Attaveqaasersuutinullu Naalakkersuisoqarfik sanaartugassanik suliaqartunit, taamatullu siunnersuisarnermik inuussutissarsiuteqartunit arlalinnit saaffiginnissutinik arlalinnik tigusaqarpoq, 2024-mi pisinnaasanik atunngisaqarnissamik aammalu namminersorluni suliassat ikilinissaannik nalunaaruteqarfiusunik.
- 2023-mi neqerooruteqartitsinerup siulliup taamaatinneqarnera eqqortumik aalajangiinerusoq isumaqatiginninniarnerit inernerini takutinneqarpoq. Nuummi ilinniartunut inissiat amerlinerisigut nunatsinni ilinniartut atugaasa pitsaanerulernissaat, nunattalu namminiilernissaanut ataatsimoorluta anguniakkatsinnut iluaqutaanissaa neriuutigaarput, Ineqarnermut Attaveqaasersuutinullu Naalakkersuisoq Hans Peter Poulsen oqarpoq.
Neqerooruteqarnermi akigititamik appasinnerusumik angusaqarniarluni suliassami arlalinnik naleqqussaasoqartoq, naleqqussaanerullu kingunerisaanik Nuummi ilinniartunut inissiat imm. 2-mut atatillugu taamaallaat Nuummi Kongevej-imi sanasoqassasoq, Naalakkersuisut ilisimatitsipput.
