Sapaatit-akunneri ukiuni qulikkuutaani pisoqarfiunerpaat

Kalaallit Nunaat Issittumi Siunnersuisoqatigiinni Naalagaaffeqatigiit sinnerlugit siuttuussaaq.Mette Frederiksen (S) taama naqissusiivoq, taassumalu nunat tamalaat siunnersuisoqatigiivi allat aamma eqqarsaatigai.

- Nunat Avannarliit Siunnersuisoqatigiivi pillugit qallunaat naalakkersuisunit akerlilersorneqanngillat. Taamaattoqanngilluaasarpoq. Kalaallit Nunaat Savalimmiullu ilaasortaanerat naligiinnerallu tapersersorpavut, ministeriuneq Múte B. Egedep ataatsimiinnernut peqataaniarnani aalajangernera pillugu siorna oqarpoq.

Folketingimi apeqqarissaarnermi sivitsoqqitami Mette Frederiksen taama oqarpoq, tassani partiit siulittaasuinit Atlantikullu avannaaneersunit ilaasortanit, Aki-Matilda Høegh-Dam Kalaallit Nunaanni qineqqusaartoq kisimi pinnani, apeqqarissaarfigineqarluni.

Nunarsuarmi maannakkut pisut pillugit Enhedslistenimeersup Pelle Dragstedip apeqqarissaarneq sinaakkusertutut ippaa:

- Ukiuni qulikkuutaani pisoqanngeriarluni sapaatip-akunnerinisa ingerlaneranni pisartoqartartoq oqartoqartoqartarpoq.

Mette Frederiksen naapertorlugu nunat tamat oqartussaaqataanerat tunngavigalugu aqutsisut avataaneersunit sunnerniarneqartarnerat aarlerinartut ilagaat:

- Tamanna Danmarkip kissaatiginngilluinnarpaa. Taamaattumik Folketingimi amerlanerussuteqartut nunanit allanit partiinut tapiissutit inerteqqutigerusunnerat nuannaarutigaara. Siunnersuut assingusoq Kalaallit Nunaanni akuerineqareerpoq, Frederiksen oqarpoq, Danmarkimilu isumassarsiorfigineqarsinnaasoq oqaatigalugu.

Apeqqarissaarnermi Kalaallit Nunaanni qinersisoqarnissaa ataqqiniarlugu apeqqutit aalajangersimasut tunuarsimaarfiginiarlugit aallarniutigalugu erseqqissarpaa.

Isiginnittaatsit assigiinngitsut

Savalimmiormiut folketingimut ilaasortaatitaat aamma Kalaallit Nunaanni pisut sunnerteqqassutigigaat folketingip ataatsimiittarfiani erserpoq:

- Kalaallit Nunaata Danmarkillu attaveqatigiinnerat soorunami ulluni makkunani sammineqangaarpoq, soorunami aamma taamaattariaqarpoq. Savalimmiunili Danmarkip Kalaallit Nunaatalu akornanni oqallinnerup kingunerisaanik aamma pisoqarpoq, pingaaruteqarporlu ataatsimoorluta iliuuseqartarnissarput, Anna Falkenberg oqarpoq.

Qallunaat naalakkersuisuisa naalagaaffeqatigiinneq assut pingaartikkaat Mette Frederiksen oqarpoq.

- Iligiinneq aatsaat taama upperitigaara. Takorloortigu Danmark — Danmark kisiat eqqarsaatigivara — EU-mut NATO-mullu ilaasortaanngitsoq. Tamanna kukkunerujussuussaaq – kukkuneq annertooq, oqarpoq.

Kalaallit Nunaanni oqallinnermut atatillugu Savalimmiut avissaarnissamik sooq piumasaqaateqannginnersoq Savalimmiuni Folketingimut ilaasortaq Sjúrður Skaale aperineqartarluni oqarpoq.

- Isumaqarpunga suleqatigiikkaanni illuatungerlu pinngitsoorneqarsinnaanani nammineerusukkaanni aatsaat avissaartoqartartoq. Savalimmiummi tassaniikkunnaarnikuupput. Isumaqarpunga suleqatigiikkaanni aatsaat tassanngaanniit nikeriarsinnaanngikkaanni avissaarusuttoqalersartoq. Aamma tassaniinngilagut, Sjudur oqarpoq.