SAS Nuummut timmisartuussisalerniarpoq. Taama tusagassiivik InsideFlyer marlunngornermi allaaserisaqarnermini allappoq.
Tusagassiorfik naapertorlugu timmisartortitseqatigiiffiup siunissaa pillugu ataatsimeersuartitsinermi SAS-ip pisortaanera Anko van der Werrf taama oqarpoq, SAS-ip Star Alliancemit aninerata kingorna timmisartortitseqatigiiffinnut SkyTeamimut ilanngunnerata kingorna.
SAS Nuummut timmisartuussisalerniarpoq. Taama tusagassiivik InsideFlyer marlunngornermi allaaserisaqarnermini allappoq.
Tusagassiorfik naapertorlugu timmisartortitseqatigiiffiup siunissaa pillugu ataatsimeersuartitsinermi SAS-ip pisortaanera Anko van der Werrf taama oqarpoq, SAS-ip Star Alliancemit aninerata kingorna timmisartortitseqatigiiffinnut SkyTeamimut ilanngunnerata kingorna.
„SkyTeam timmisartortitseqatigiiffinni siullersaalluni Kalaallit Nunaannut timmisartuussisalissaaq, SAS-ilu Nuummut timmisartuussisalissaaq,“ InsideFlyer allappoq.
Ilumuunnginneraanianngitsoq
SAS-ip paasissutissat taakku uppernarsarnianngilai, ilumuunnginnerarnianngilaali.
- Ajoraluartumik suli pisortatigoortumik nalunaarutigineqanngimmat maannakkut paasissutissiisinnaanngilagut. Attaveqatigiissutaasinnaasumik pisoqassappat tusagassiuutinut nalunaaruteqassaagut, SAS-imi tusagassiortunik sullissisoq Sermitsiaq.AG-mut allappoq.
Allaaserisaq InsideFlyer-imiittoq ullup ataatsip ingerlanerani Facebookimi allarpassuarnut siammarterneqarsimavoq. 1998 sioqqullugu Københavnimit Kangerlussuarmut SAS-ip kisimi timmisartuussisarneranik inuppassuit suli eqqaamasaqarput.
Kalaallit Nunaanni aallarniisoq
SAS-ip Air Greenlandillu ukiuni arlalinni unammilleqatigiinnerisa kingorna Skandinaviami timmisartortitseqatigiiffiup Kalaallit Nunaannut timmisartuussisarnini unitsippaa, 2002-mi sipaarniarluni aalajangernermut atatillugu.
1954-imi København-Kangerlussuaq-Winnipeg-Los Angeles-imut timmisartuussineqalermat, SAS siullerpaamik Kangerlussuarmut mippoq. Tamanna SAS-ip nunarsuaq tamakkerlugu tusaamasaaneranut pissutaavoq.
SAS ukiorpassuarni Star Alliancemi siuttuulluni ilaasortaasimavoq, maannali USA-mi akiliisinnaajunnaarnermi illersuisoqarnissaanik qinnuteqareerluni timmisartuutileqatigiiffiup aaqqissuuteqqinneqarneranut atatillugu ilaasortaajunnaarpoq. SAS maanna SkyTeamimut ilaasortanngorpoq, timmisartortitseqatigiiffiit annerusut soorlu Air Francep, KLM-ip, Delta Airlinep Virgin Atlanticillu ilaasortaaffigisaanni.
