Sermersooq inuit attaveqaqatigiittarfiini orniginarsarniarpoq
Kommuneqarfik Sermersooq inuusuttunut piginnaanilinnut orniginartitsiumallunilu attassiinnarumalluni inuit attaveqaqatigiittarfiisigut videolianik “isikkumikkut kusanartunik ilumoortuunillu aamma kommunimi suliassaqarfinnik assigiinngitsunik takutitsisunik” pilersitsinikkut periusissiorniarpoq.
Kommuneqarfik Sermersooq
Assiliisoq: Leiff Josefsen
Illoqarfiit pingaarnersaanni kommunip nittarsaassinermut sullissivia naapertorlugu kommuni suliffittut pitsaasutut ilisaritinniarlugu inuit attaveqaqatigiittarfii atorneqarnerusariaqarput.
Kommunip suliffeqarfittut suliffimmillu misiliiffissatut soqutiginarnerulernissaanut Facebookimi Instagramimilu videoliat atussanersut, marlunngorpat kommunalbestyrelsip ataatsimiinnerani politikkerit aalajangertussaavaat.
- Kommuneqarfik Sermersuup
suliffissatut aamma suliffimmik misiliiffissatut orniginartuunissaanut ilisarnaataanik patajaallisaaneq
suliniummi siunertaavoq. Kommunimi suliat inuaqatigiinnut iluaqutaanerisa aamma qanoq sulisut
pingaartinneqartiginersut takutinneqarnissaa kissaatigineqarpoq, politikkerinut inassuteqaammi vicekommunaldirektøri Marie Fleischer allappoq.
Kinguneqarluarnersoq ataavartumik nalilersorneqartassaaq
Aaqqissuussaanermut ineriartortitsinermullu immikkoortortaqarfiup "sulisunit oqaluttuanik isumassarsiorfiusunik
katersinissaa pilersaarutaavoq, aamma sulisut ulluinnatik,
unammilligassatik aamma iluatsittut pillugit oqaluttuaanik naatsunik isiginnaagassiortoqarnissaa" pilersaarutaavoq.
- Innuttaasut ulluinnaanni sulisut allanngueqataasinnaanerat aamma suleriaatsinik atorfeqarnermilu periarfissat pillugit
ammasuunermik pilersitsineq ersersinniarneqarpoq, periusissiorneq tunngavilersorneqarpoq.
Tamatuma kingorna imarisaasa annertussusaat kajuminnarnerallu
naliliiffigineqartassasut, aamma utertitsiffigineqarneq paasissutissallu tunngavigalugit periusissiaq
naleqqussarneqartassasoq ilisimatitsissutaavoq.
Suliniutip iluatsinneranut ilaatigut kommunimi atorfinnut inuttaqanngitsunut qinnuteqaatit aamma suliffimmi misiliisussat
amerlinerisigut uuttorneqassaaq.
