Sermip tiffasinneruleriartornera Nuup Kangerluani iluliarasaarnerulerneranik kinguneqarsinnaasoq

Nuummiut kangerlummi iluliarasaarnera alutornartoq ukioq manna takuaat. Kassut Narsap Sermianeersut umiatsiaaqqanut umiarsuarnullu kangerlummiittunut talittarfimmiittunullu ajornakusoortitsipput.

Ilisimatusartut allaaserisaat nutaaq naapertorlugu kangerlummi iluliarmerngit ukiuni tulliuttuni takussaanerulersinnaapput.

Pinngortitaleriffimmi Silap Pissusianik Ilisimatusarfimmeersunit allaaserineqarpoq atuagassiamilu ”Journal of Geophysical Research: Oceans”-imi saqqummersinneqarluni, Pinngortitaleriffik tusagassiuutinut nalunaarummi ilisimatitsivoq.

2003-miit tiffariarujussuartoq

Narsap Sermia ukiut 20-t sinnilaarlugit ingerlaneranni allanngoriartornera pillugit allaaserisaavoq. Ukiuni hunnorujukkuutaani aalaakkaariarluni sermeq 2003-miit 2023-p tungaanut 6,7 kilometerinik tiffariarujussuarsimavoq, taamatullu 2023-miit maannamut kilometerinik marlunnik tiffarsimalluni.

ATUARUK AAMMA

Ukiukkut qaqutigoortoq: Nuup eqqaani sikualoqaqisoq

Taamaattoqarnera pingasunik patsiseqartoq ilisimatusartut paasivaat, tiffariartorneranullu sermip aakkiartornera pissutaalluni erngup sermip naqqaniilersup annertusiartornera uukkaalersitsisarluni.

Sermip uukkartarfia 64 meteri missaanni itissusilimmi ikkannersamiilernissaminut kilometeri ataasiinnaq maanna amigaatigaa. Ikkannersalli iluaniippoq 600 meterinik itissusilik 30 kilometerinillu takissusilik, ilisimatusartuuneq John Mortensen nassuiaavoq:

Ukiut 24-t missaannik sivisussuseqartumik tiffariartorsinnaasoq

- Sikup ataani immap ilusaa sukumiisumik ilisimanngikkaluarlutigu taamaattoq Narsap Sermiata uukkartarfia taamak ititigisumiilissaguni sunnguamik allannguuteqartillugu annertuumik tiffariartupiloorsinnaanissaa pisinnaassavoq.

- Taamaasilluni sermimik aniatitsinera sukkanerulerlunilu annertunerulersinnaasussaavoq. Tiffariartupiloorneralu ukiuni 2010-2012-imisulli alaatsinaanneqartutulli pissappat (ukiumut kilometerit 1,2 missaanniittassapput), Taava ukiut 24-t missaannik sivisussuseqartumik Narsap Sermia tiffariartussaaq nunap qaani isuliffeqalernissami tungaanut. 

- Ukiunilu taakkunani Nuup Kangerlua ukioq kaajallallugu tupinnaannartumik annertuumik ukioq kaajallallugu iluliarasaartuartartussaassaq, John Mortensen nassuiaavoq.