Sikorsuaqarnissaa pissutigalugu RAL-ip pilersaarutit allanngortinneqarsinnaanerat misissorpaa
Nunaqarfinnut nioqqutissanik assartuineq ukiukkut upernaakkullu sikoqartillugu ajornakusoortarpoq. Arsuk qaammammi ataatsimi angallavigineqarsimanngitsoq maannali nioqqutissanik pajunneqareersimalersoq RAL-imit ilisimatitsissutigineqarpoq.
Malik Arctica (arkivfoto).
Foto: Royal Arctic Line
Nioqqutit ulluinnarni pisariaqartitat Arsummi Pilersuisumut kiisami apuupput.
Royal Arctic Line, Kalaallit Nunaanni illoqarfinnut nunaqarfinnullu pajuttuisartoq, nunaqarfinnut assartuisartuut Arpaarti Arctica marsip 14-ianni Arsummut tikittoq nalunaarpoq. Tassa kingullermik tikinneranit qaammat ataaseq qaangiuttoq.
- Arsummit februaarip 14-ianniit marsip 14-iannut umiarsuarnik assartuisartoqarsimanngitsoq ilumoorpoq. Arsummi sila tamatumunnga pissutaavoq. Arsuk avammut ammaannartumiimmat akulikitsumik ingiulittarpoq, Royal Arctic Linemi pisortap tullia Aviâja Lyberth Lennert ilisimatitsivoq.
Februaarip naanerani nunaqarfimmut umiarsuaq pajuttoq tikittussaagaluarpoq, tamannali sila pissutigalugu taamaatiinnarneqarpoq. Piffissami tamatumani sila pissutigalugu umiarsuaq nunaqarfinnut assartuut allamik tikiffissaqarsinnaasimanngilaq, tassami ingiulinnera annertummat.
Sikorsuaqalingajalersoq
Nunaqarfimmi Arsummi innuttaasut assartuinerup ajornakusoornera pillugu Royal Arctic Linemut maalaaruteqarniarlutik atsiornernik katersuillutik Sermitsiamut ilisimatitsissutigaat.
Maliita Enoksen, Arsummi Pilersuisumi niuertoq, naapertorlugu pisiniarfik nioqqutissanik pingaarnernik soorlu manninik, immummik ulluinnarnilu atortussanik allanik amigaateqarsimavoq. Royal Arctic Lineli ilisimatitsivoq Arsummi Pilersuisoq RAL-ilu ataavartumik attaveqatigiittarsimasut, RAL-ilu nunaqarfimmi Pilersuisumit paasitinneqarsimasoq pajuttaatip tulliata marsip 14-ianni tikinnissaata tungaanut naammattunik nioqqutissaqartoq.
Sikorsuaqalingajalernerani assartuinerup unammillernarsisinnaanera eqqarsaatigalugu Kujataani nunaqarfinnut pajuttuinissamut pilersaarutit allanngortinneqarsinnaanerat maanna misissorneqaleruttortoq Royal Arctic Line ilisimatitsivoq.
- Kujataani sikorsuaqarlertussaanera angallannermut sunniuteqarsinnaanera maanna ilimagisinnaavarput. Tamanna 2024-mi annertuumik pivoq Kujataanilu innuttaasunut akornutaarujussuarluni. Tamatumunnga aaqqiissutissaq Pilersuisup qanimut oqaloqatigineratigut anguneqarsinnaavoq, taakku Royal Arctic Linep angallannermut pilersaarutaanik pingaarnersiuinissaanut aamma allannguinissamut ikiuutaasinnaammata, oqarpoq.
