Silap pissusiata allanngoriartornera arfivinnut navianartorsiortitsisoq
Arfiviit aasaanerani najugaqarfiisa 75 procentii angullugit ukioq 2100 nallertinnagu nungussinnaapput, tamanna Københavnip Universitetiani misissuinerup nutaap takutippaa.
Arfeqarfiit immaqa arfiviup angalaffigisinnaajunnaaratarsinnaavai.
Assi: Anders Drud Jordan
Arfivik - nunarsuarmi arferit anginerpaat pisoqaanersallu ilaat - silap pissusiata allanngoriartorneranit navianartorsiortinneqarpoq. Arfiveqarfiit sisamaagaangata pingasut ukiut untritilikkaat uku naatinnagit tammarsimassasut Københavnip Universitetiani ilisimatusarnikkut suliniummi nutaami siulittuutigineqarpoq.
- Misissuisimanerput naapertorlugu ukiut untritillit ukua ingerlaneranni arfiveqarfiit 65-75 procentii tammassapput. Tamanna pissuseqatigiiaat siammarsimanerannut siunissamilu uumaannarnissaannut sunniuteqangaassaaq, Nicholas Freymueller, Globe Institutemi aamma University of Adelaidemi ph.d.-usoq Københavnip Universitetiata nittartagaani tusagassiutitigut nalunaarummi oqarpoq.
Siku aakkiartortoq
Sikup annikilliartornera pissutaanerpaasoq misissuinerup takutippaa. Arfiviit sikuusarfiit toqqissisimanarnerusut ukiuni tusindilinni toqqartarpaat - maannakkulli sikuusarfiit taakkua annikilliartupallapput.
Arfiviit Manerassuarmi avannaata kitaani Okhotskip imartaani uumaffigisaasa pingaarnersaasa ilaasa ukioq 2060 sioqqullugu tammarsimanissaa ilimagineqarpoq, 2100-milu najugaqarfigisinnaasaasa sinneri Issittumi itinerusuni mikinerusunilu nerisassarsiorfiulersimassapput.
Professori Eline Lorenzen, misissuinermik tamatuminnga atuakkioqataasoq, oqaluttuarisaanermi paasissutissat pingaaruteqarnerannik erseqqissaavoq:
- Ujaranngortut, arfanniat nalunaarsugaat ukiullu 11.700-t kingulliit silap pissusianik paasissutissat ataatsimut katersornerisigut arfiviit siunissami qanoq sunnerneqassanersut sumilu suli neriuutissaqarnersut siulittuilluarsinnaanerulissaagut.
Paasisat nutaat nunarsuaq tamakkerlugu uumasunik aqutsinermi atorneqarumaartut ilisimatuut neriuutigaat.
