– Sinerissap qanittuani aalisartut kiffaanngissusaat uterteqqikkusupparput

- Naalakkersuisut aalisartunut kiffaanngissuseqarnissaannik utertitsinissamik siunertaqarlutik siunnersuuteqarput. Ullumikkut pissutsit itsillugit aalisartut amerlasuut tunisassiorfinnut aalajangersimasunut pituttoqqasarput. Pituttuisarnerlu taanna aalisarnermut inatsisissatut siunnersuummi atorunnaarsinneqassasoq siunertaavoq.

Kielsen taamatut oqarnermini erseqqissaavoq ullumikkut aalisartut ilarpassui tunitsivinnut aalajangersimasunut pituttorneqartartut aningaasatigut pisussaaffeqalertarnertik pissutigalugu, tassa tunitsiviit aalisartut pisaannik pisiortortartut aalisartunut aningaasanik taarsigassarsisitsisarnerminnut atatillugu aalisartut tunitsivimminnut taamaallaat tunisisassasut pituttortarmatigit.

- Aalisartut arlallit periarfissamik atuisariaqarsimapput, ilaatigut aningaaseriviit aalisartunut taarsigassarsisitsiumaneq ajormata.

Naalakkersuisut maanna siunnersuuteqarput aalisartut pisassaannik pisisartut  akornanni aningaasatigut pisussaaffitsigullu pituttuisarnerup inerteqqutaatinneqalissasoq, Naalakkersuisullu isumaqarput tamatuma kingunerisaanik aalisartut siunissami pisinnaatitaaffeqarnerulissasut kiffaanngissuseqarnerulissasullu namminneq aalajangersinnaanngorunikku qanoq aalisarnerminnik ingerlatsissanerlutik.

Taannaavorlu aalisartut namminneq toqqarsinnaaligassaat, tassa pisassiissutit niuerutigineqarsinnaasut (IOK) aamma paggatassiissutinik aalisarnerup arlaata sorliup toqqarneqarsinnaalernissaanik aqqutissiuussiniarneq.

Aqutsiveqarfik 47

Sinerissap sinnerani sinerissamut qanittumi aalisarnerup oqaluttuarisaanera sivisoorsuunngilaqm oqaatigineqarsinnaallunilu suli ineriartortinneqartoq, aqutsiveqarfimmili 47-mi, tassa Qeqertarsuup tunuaniit avannamut Upernaviup nalaata tungaanut aalisarneq ukiuni ikigisassaanngitsuni ingerlarsorpoq.

Aalisarfimmi tassani imartarujussuarmi aqutsiveqarfimmi qaleralinnut pisassat 30.000 tonsit missaanniipput, umiatsiaaqqat 1.100-it missaanniittut angallatillu 6 meterinit anginerusut 150-it missaanniillutik.

Naalakkersuisut siunnersuuteqarput tassani aalisartut namminneq aalajangersinnaatitaassasut IOK-mik tunngaveqarlutik aalisarusunnerlutik imaluunniit paggatassiissutinik aalisarnermik ingerlatsiinnarusunnerlutik.

- Ersarissumik oqaatigissavara, aalisartut nunamut qaqitinneqarnissaat siunertarinngilarput siunertarisimanngisaannarlugulu. Akerlianik aalisartut namminneq aalisarnerminnik ineriartortitsinissaminnut periarfissinneqassapput, tamannalu aalisartut namminneq aalajangissavaat qanoq aalisarnermik ingerlatsiniarnerlutik.

- Taamaattorli kiffaanngissuseq aamma pisussaaffimmik nassataqartarpoq, taannalu malinneqassaaq aalisartut PNNP-mut (Pisassiissutit Niuerutigineqarsinnaasut Nammineq Pigisat) ikaarsaarnissaminnik aalajangissappata. Tassami piumasaqaataalissaaq pisassiissutinit 85 procentii nammineq aalisarneqassasut allanullu tunniunneqassanngitsut. Maluginiarparput aalisartut ilaasa ernumassutigigaat 85 procentimik aalisarsimanngikkunik taanna aqqutigalugu pisassaminnik arsaarneqartalissasoralutik. Pisassaminnik arsaarneqarnavianngillat, kisianni piffissami pisassanik kinguaattoorsimagaanni ukiut pingasut iluanni iluarsiiniartoqarsinnaalissaaq.

Naalakkersuisut isumaqarput, taamaaliornikkut aalisartut namminneq aningaasaqarnikkut pilersaarusiornerminnik aqutsisinnaanerulissasut, taamatuttaaq pisassanik piffissami sivisuumi eqqanaakkanik pigisaqarnermikkut aningaaserivinnut taarsigaassarsiniarnermi naliliuteqarlutik uppernarsaalluarsinnaalissasut, soorlu atortunik nutarterinissamut taarsigassarsiniarnermi pisariaqartitsigunik.

Sinerissami qanittumi raajartassanik tulaassisussaatitaaneq annikillisinneqassaaq

Ullumikkut sinerissamut qanittumi raajarniarnermi amikkitsisoqartarmat ajornartorsiutaasoq oqaatigineqarpoq, tassani 57/43-mik raajartassat avataasiortunut sinerissamilu qanittumi raajarnianut agguaasseriaaseqartoqarpoq. Kisianni naammattusaarisarnermi ukiut tamangajaasa agguataarineq 50/50-mut killikkajunneragaavoq, pisassiissutit niuerutigineqarnerisigut nuunneqarsinnaasarmata.

Sumiiffinni raajarniarlutik aalisartut pisassarititaasunik ukioq naallugu aalisarnerminnik ingerlatsiinnarumallutik kittaarisariaqartartut oqaatigineqarpoq, taakkulu pisarineqartartut tamarmik tamakkiisumik tulaassisussaatitaanermik nassataqarlutik.

- Naalakkersuisunit siunnersuutigaarput tulaassisussaatitaaneq 25 procentinngortinneqassasoq. Raajarniallu namminneq aalajangissavaat sinneruttut 75 procenti toqqaannartumik avammut tunisassiarineqassanersut imaluunniit nunami tunisassiorfinnut tuniniarneqartassanersut.

Inatsisissatut siunnersuut aamma aalisarnermut ataatsimiititaliarsuup isumaliutissiissutaa assigiinngitsuupput

Kielsenip uggorinerarpaa aalisartut ilaasa kattuffiisalu oqallinnermi aalisarnermut ataatsimiititaliarsuup isumaliutissiissutaa najoqqutariniaannavimmassuk aalisarnermullu inatsisissatut siunnersuut aallaavigiumanagu:

- Maluginiarnarpoq aalisarnermut inatsisissatut siunnersuummik naammaginninngitsut akornanni aalisarneq pillugu ataatsimiititaliarsuup isumaliutissiissutaa nittarsaattaqattaartaraat inatsisissatullu siunnersuummut akerliunerminni tunngavilersuutiginiartaraat. Naalakkersuisunit ataasiaannarata erseqqissaatigiuarparput ataatsimiititaliarsuup isumaliutissiissummini innersuussutigisai arlalippassuit Naalakkersuisunit isumaqataaffigineqanngitsut, taamaammallu aalisarnermut inatsisissatut siunnersuutip ilusilersorneqarnerani ilaatinneqanngitsut, taamaattumik inatsisissatut siunnersuut ataatsimiititaliarsuullu innersuussutai assigiinngitsuupput.

- Kisianni sinerissap qanittuani aalisartut isumaqarput aalisarnermut inatsit aalisartunut ajunaarutaassasoq, Naalakkersuisullu isumaqarlutik aalisarnermut inatsissatut siunnersuut pitsanngorsaataassasoq aamma kiffaanngissuseqarnerulersitsissasoq. Aalisartut naammagittaalliortut peqatigalugit inatsisissatut siunnersuut pitsaasumik naammaginartumillu paasisitsiniaaneq annikippallaarsimava?

- Paasinarpoq oqallinneq annertusoq. Tassami nunatsinni inuussutissarsiutit annersaat matumani pineqarpoq, tassalu aalisarneq. Taamaattorli  eqqumaffigisassarput tassaavoq, qanoq iliuuseqarfigisassarput aamma qanoq innuttaasunik oqaloqateqartarnissarput allannguisoqarnissaanik siunertaqarluni siunnersuutigineqartut pillugit, Naalakkersuisut siulittaasuat, Múte Bourup Egede (IA) naggasiilluni akissuteqarpoq aalisarnermut inatsisissatut siunnersuut pillugu tusagassiortunut paasissutissiilluni ataatsimeeqatiginninnermi.