Arctic Umiaq Line A/S, sinersortaammik Sarfaq Ittummik ingerlatsisoq, periusissiap iluatsinngitsoornera pissutigalugu aningaasatigut ajornartorsiorpoq, tamannalu nunaqavissut angalasartut ikileriarujussuarnerannik kinguneqarpoq.
2025-mut aningaasanut inatsisip aappassaaneerneqarneranut atatillugu oqaaseqaatit nutaat ima paasissutissiipput:
Arctic Umiaq Line A/S, sinersortaammik Sarfaq Ittummik ingerlatsisoq, periusissiap iluatsinngitsoornera pissutigalugu aningaasatigut ajornartorsiorpoq, tamannalu nunaqavissut angalasartut ikileriarujussuarnerannik kinguneqarpoq.
2025-mut aningaasanut inatsisip aappassaaneerneqarneranut atatillugu oqaaseqaatit nutaat ima paasissutissiipput:
Amigartooruteqangaartoq
- Arctic Umiaq Line A/S ukiumi aningaasaqarfiusumi 2024-mi amigartooruteqangaarnissani naatsorsuutigaa. Umiarsuaatileqatigiiffiup ukiumi aningaasaqarfiusumi 2025-mi aningaasaqarniarnermigut tamakkiisumik iluarsiivinnissani naatsorsuutiginngilaa. Umiarsuaatileqatigiiffiup ingerlaqqinnissaanut tapersersuinissaq siunertaralugu Naalakkersuisut amigartooruteqarnissamut qularnaveeqqusiinissamut 15 millionit koruunit tikillugit aningaasaliinissamut piginnaatitaapput.
Nangilluni ima allappoq:
- Sarfaq Ittuup ingerlannissaanut ilaasut tunngaviusut naammanngippata amigartooruteqarnissamut qularnaveeqqusiineq tamakkiisumik ilaannakuusumilluunniit akilerneqarsinnaavoq. Naalakkersuisut amigartooruteqarnissamut qularnaveeqqusiinissamut piumasaqaatit sukumiinerusut pillugit Arctic Umiaq Line A/S-imik isumaqatigiissuteqarsinnaanngortinneqarput.
Pissutaasut pingasut
Naalakkersuisut aningaasaqarnermut ataatsimiititaliamut akissutaanni ilisimatitsissutigineqarpoq umiarsuaatileqatigiiffiup 2025-mi 9,9 millionit koruuninik amigartoornissaq naatsorsuutigigaa, naak 2024-mi ilaasut ikilinerinit aningaasat annaaneqartut sapaatip-akunneranut ataasiarluni kaajallaasarnermik pilersaarutip allanngortinneqarneratigut matussuserneqarsinnaagaluartut.
RAL-ip pisortaanera Niels Clemensen siusinnerusukkut Sermitsiami allaaserisami nassuiaavoq aningaasatigut ajornartorsiornermut pissutaasut pingasuusut:
Hurtigrutenip umiarsuarnik takornariartaatinik atuisunut ininik akisuunik tuniniaanermi Hurtigrutenip nunani tamalaani tuniniaanermik attaveqarfia aqqutigalugu suleqatiginninneq ilimagisatut ininik taakkuninnga tunisaqartitsinngilaq.
Sapaatip-akunneranut ataasiarluni kaajallaasarnermit ulluni 14-ini kaajallaasalernermut allanngortitsisoqarneratigut takornariat illoqarfinnut umiarsuarmik tikinneqartartunut sivisunerusumik misigisaqarnissaminnut periarfissaqalerput, tamannali nunaqavissut angalasartut ikilinerannik kinguneqarpoq.
- Ingerlatseqatigiiffiup bilitsinut akigititaanik nalimmassaaneq nunaqavissut angalasut ikilinerannik kinguneqarpoq, taakkumi taarsiullugu timmisartorniarlutik aalajangertalermata.
Sinneqartooruteqarnermit amigartooruteqarnermut
Arctic Umiaq Line A/S periusissiamik iluatsinngitsumik atuutilersitsinnginnermini ukiumi naatsorsuusiorfiusumi 2022-mi 5,5 millionit koruunit sinnerlugit sinneqartooruteqarpoq. Ukioq periusissiamik nutaamik atuutilerfiusoq ukiumut 300.000 koruunit missaannik amigartooruteqarpoq. Ukiumilu matumani amigartoorutit annertusiartuinnarput.
Siunissami ingerlatsineq angallannermullu pilersaarut qanoq ilusilersorneqassanersoq pillugu RAL-ip immikkoortortaqarfia Namminersorlutik Oqartussanik oqaloqateqarpoq, taamaalilluni pisortanit aningaasaliissutinik pisariaqartitsineq sapinngisamik annikinnerpaaffissaanut appartinneqarsinnaaqqullugu ingerlatseqatigiiffiup aningaasaqarnera ataqatigiissarneqarsinnaaniassammat.
Sapaatip-akunneranut ataasiarluni kaajallaasarneq utertinniarneqartoq
Aningaasaqarnermut ataatsimiititaliamut akissummi allassimavoq Arctic Umiaq Linep “siornatigut ingerlatsinermut periusissiaminut utissalluni naatsorsuutigigaa, tassanilu innuttaasut nunap kitaani najugaqartut angallanneqarluarnissaat pingaartinneqarluni”.
Arctic Umiaq Line A/S-imi pisortap Taitsianguaq Olsenip uppernarsarpaa sapaatip-akunneranut ataasiarluni kaajallaasarneq utertinniarlugu pilersaaruteqartoqartoq.
- Angallassinissamik pilersaarut nutaaq Naalakkersuisunit akuersissutigineqassaaq, naatsorsuutigaarpullu piffissap sivikitsup ingerlanerani aalajangiisoqarumaartoq, Taitsianguaq Olsen Sermitsiamut oqarpoq.
