Soraarnerussutisiaqalernissamut aningaasaateqarfimmut SISA-mut 2024 ukiuuvoq iluatsitsiffiusoq.
Ukiumoortumik nalunaarusiaq naapertorlugu akileraarutit suli ilanngaatiginagit sinneqartoorutit 877,1 mio. koruuniupput, angusarlu tamanna SISA-p naammagisimaarnarluinnartutut taavaa.
Soraarnerussutisiaqalernissamut aningaasaateqarfimmut SISA-mut 2024 ukiuuvoq iluatsitsiffiusoq.
Ukiumoortumik nalunaarusiaq naapertorlugu akileraarutit suli ilanngaatiginagit sinneqartoorutit 877,1 mio. koruuniupput, angusarlu tamanna SISA-p naammagisimaarnarluinnartutut taavaa.
- Ullormiit ullormut iluanaarutit allanngorartuaraluartut ukiup ingerlanerani ingerlalluarpugut, kvartalilli pingajuanni piginneqataassutsit nalingat appariarpoq, annaasagulli sukkasuumik uterteqqippagut, ukiumoortumik nalunaarusiami allassimavoq.
Aningaasaliinissamut aningaasaateqarfiit 16,98 procentinik pissarsiffiusut
SISA-p aningaasaliinissamut aningaasaateqarfiit marluk tunngavigai – Annertusiartortitsineq aamma Aalaakkaasoq. Annertusiartortitsinermi piginneqataassutsit 85 procentit missaanniittut anguniagaapput Aalaakkaasumilu piginneqataassutsit 30 procentit missaanniittut anguniagaallutik.
2024 tamakkerlugu iluanaarutit Annertusiartortitsinermi 16,98 procentiullutillu Aalaakkaasumi 8,38 procentiupput, SISA ukiumoortumik nalunaarusiami allappoq. Ilaasortat ataasiakkaat aningaasaliinissamut anigaasaateqarfinni marluusuni qanoq annertutigisumik piginneqataanerannut qassinik ukioqarneq apeqqutaavoq:
Ilaasortat 60-it inorlugit ukioqartut ileqqaagaat tamarmik Annertusiartortitsinermiipput. Ilaasortaq 60-inik ukioqalerpat taava ilaasortap ileqqaagai SISA-mit nuukkiartortinneqalertarput Annertusiartortitsinermit Aalaakkaasumut, ilaasortap 70-inik ukioqalernissaata tungaanut ingerlasussamik.
Kalaallit Nunaanni angusat naammaginanngitsut — politikkikkut nalorninartoqangaartoq
SISA tamarmiusumik iluanaaruteqarluarsimasoq, Kalaallit Nunaanni aningaasaliissutit assigiinngitsumik inissisimapput:
SISA-P KALAALLIT SULIFFEQARFIUTAANNI ANINGAASALIISSUTAI
Ukiumoortumik nalunaarusiaq naapertorlugu SISA makkunani kalaallit suliffeqarfiutaanni peqataavoq, imaluunniit nammineq aningaasaliissutitut taarsigassarsiatigut:
Usisaat ApS • Amaroq Minerals • Bluejay Mining plc • EMJ-Atcon Greenland A/S • Greenland Anorthosite Mining ApS • Avani Homes ApS • KS Glas ApS (piginnittussaanermut aningaasaliineq) • Kujataani umiarsuaatileqatigiiffik Charter 44
SISA-p aningaasaliinerminit angusarisimasai pitsaagaluartut, Kalaallit Nunaanni soraarnerussutisiaqalernissamut aningaasaateqarfiup aningaasaliinerminit angusarisimasai allaanerupput:
- Ataatsimut isiginnilluni Kalaallit Nunaani aningaasaliissutigisat 2024-mi naammaginartumik angusaqarfiupput, kisianni aningaasaliiffigineqartut ataasiakkaat qanoq iluatsissimanerat assut assigiinngiiaarpoq. Ataasiakkaat annertuumik annaasaqarfiupput, akerlianik allani iluanaarutit annertuujullutik, ukiumoortumik nalunaarusiami allassimavoq, tassanilu SISA-p nunami politikerit kajumissaarpai:
- Taamaattorli aammattaaq paasivarput Kalaallit Nunaanni aningaasaliisarnerit pillugit politikkikkut nalorninartoqartoq. Piffissaq ungasinnerusoq eqqarsaatigalugu aningaaliisartutut SISA-mit pisariaqartinneqarpoq politikkikkut piffissaq ungasinnerusoq eqqarsaatigalugu pilersaarusiortoqartarnissaa atituumik isumaqatigiissuteqarnikkut, naalakkersuinikkut allanngortoqaraangat allanngortussaanngitsunik.
Aalisakkerinermi suliffeqarfimmut aningaasaliisoq
SISA Illuut aamma Permagreen Grønland peqatigalugit Kalaallit Nunaanni suliffeqarfinnut arlalinnut aningaasaliinerup saniatigut Qeqertat A/S-imik piginneqataavoq. Ingerlatseqatigiiffik Royal Greenlandip Nuummi qullersaqarfissaanik sanaartortussaavoq.
SISA tamatuma saniatigut aalisarnermik ingerlatseqatigiiffimmut, Avalleq ApS-imut, Namminersorlutik Oqartussanit pisassinneqarniarsarisumut, ukioq manna 10.000 koruuninik aningaasaliisimasoq saqqummiunneqarpoq. Aalisarnermut naalakkersuisuusimasoq Karl Kristian Kruse aalisarnermik ingerlatseqatigiiffimmi nutaami pisortaavoq, KNR allappoq.
SISA-p ilaasortaminut ileqqaagaqarnermini 6,4 milliardit koruuninik maanna aqutsissuuvoq, 2024-milu angusaqarluarsimagaluarluni 2025-mut tunngatillugu nalorninartorsiungaatsiarpoq, ukiumoortumik nalunaarusiami allassimavoq:
- Aningaasaliissuteqartarnerni iluanaarutaasinnaasut 2025-mi assut suli nalorninartoqarput, aamma tamatumunnga apeqqutaapput Europami aamma Kangiani Qiterlermi sorsuunnerit.
