OBS: Allaaserisami takunnissimasut oqaluttuarisaanni nassuiarneqartut sakkortusinnaapput, oqaluttuarineqartut nakuusernermut kinguaassiutitigullu atornerluinermut tunngasuupput. Atuartumut tamanna eqqumaffigeqquneqarpoq.
Ullumi marlunngornermi juunip ulluisa 18-anni angutit inuusuttut pingasut persuttaasaqattaarsimanertik pillugu eqqartuussivilersuunneqarnerat nangeqqinneqarpoq.
OBS: Allaaserisami takunnissimasut oqaluttuarisaanni nassuiarneqartut sakkortusinnaapput, oqaluttuarineqartut nakuusernermut kinguaassiutitigullu atornerluinermut tunngasuupput. Atuartumut tamanna eqqumaffigeqquneqarpoq.
Ullumi marlunngornermi juunip ulluisa 18-anni angutit inuusuttut pingasut persuttaasaqattaarsimanertik pillugu eqqartuussivilersuunneqarnerat nangeqqinneqarpoq.
Eqqartuussinerli tamaanaannaq unitsinneqarpoq, eqqartuussisooqataasoq eqqartuussinerup ingerlanerani nalunaaqutaq marlunngortoq meriarluni aallartimmat.
Ullumikkut eqqartuussinermi ilisimannittut arlallit eqqartuussivimmi nassuiaasinneqarput.
Persuttaaneq sakkortooq
Ilisimannittoq siulleq angutaavoq. Taassuma eqqartuussivimmi nassuiaasinneqarami oqaluttuarpoq kammalaatini unnukkut illoqarfimmeeqatigisimallugit. Sisimiuni illoqarfimmiinnerminni imerniartarfiup Starlightip silataani tassanngaannaq nakuuserfigineqarsimavoq.
Taassuma paasinngilaa sooq nakuuserfigineqarnerluni. Niaqqumigut arlaleriarluni tilluarneqarlunilu isimmittarneqarsimavoq, timimigullu aamma isimmittarneqarsimalluni.
Nakuuserneq ima sakkortutigaaq, allaat tallumigut marlunnik napisimalluni. Pinerlineqartoq Danmarkimi Rigshospitalimi suliarineqartariaqarsimavoq, qaammallu ataaseq napparsimasimalluni. Ulloq manna tikillugu suli ippigisaqarluni eqqartuussivimmi nassuiaavoq.
- Naluakka kikkuunersut, aamma naluara sooq saassunneraannga.
Unnerluutigineqartut ilaannakortumik nassuerput.
- Uumarusuppunga...
Ilisimannittut aappaa nassuiaanermini unnerluutigineqartut inimeeqatigerusunnagit piumasaqarpoq. Taassuma unnerluutigineqartut inimi isersimaqatiginissaanut toqqissisimannginnerarpoq. Unnerluussut malillugu nakuuserfigineqarsimavoq siorasaarneqarsimallunilu.
Eqqartuussisut ataatsimeereerlutik aalajangerput unnerluutigineqartut inimiit anissasut, inillu aappaaniit televideokkut malinnaassallutik.
Pinerlineqartoq nassuaanermini pissangarpasippoq eqqissiveqaranilu. Taassuma nassuiaatigaa unnerluutigineqartut marluk taassuma inissiaaanukarsimasut toqqusassisimallugulu. Toqqusassineqarnermini aneersaartorsinnaasimanngilaq taartissimallunilu. Taassuma aamma nassuiaatigaa angutinit savilersorfigineqarsimalluni. Savik naavinut qungasianullu kapputingajallugu siorasaarsimammassuk inuunerminik annilaangassuteqalersimanerarpoq.
- Aperivaannga uumarusunnersunga toqorusunnersungaluunniit...Uumarusuppunga, pinerlineqartoq eqqartuussivimmi nassuiaanermini oqaluttuarpoq.
Aneersaartorsinnaanngitsoq
Ilisimannittut pingajuat arnaavoq. Unnerluussut malillugu pinngitsaalillugu atoqatigineqarsimavoq ilisimannittutullu siorasaarneqarsimalluni. Taassuma aamma kissaatigaa angut unnerluutigineqartoq inimit anissasoq.
Angut inimut allamut eqqunneqarpoq, televideokkullu malinnaasinneqarluni.
Arnaq nassuiaasinneqarami nassuiaavoq siullermik atoqatiginissaanut akuersisimalluni, akuersininili atorunnaartikkumallugu unikkumasimalluni. Unnerluutigineqartup atoqatigiinnerup unitsinneqarnissaa ataqqisimanngilaa.
Arnaq eqqartuussivimmi nassuiaanermini annilaangarpasippoq ersillunilu. Unnerluutigineqartoq immikkoortumi pinngitsuunerarpoq.
Tassanngaannaq
Ilisimannittut sisamaat aamma arnaavoq. Taassuma nakuuserfigineqarsimanini aamma oqaluttuaraa. Tassani ikinngutinilu alla arnaq tassanngaannaq nakuuserfigineqarsimallutik oqaluttuaraa. Oqaluttuarpoq kammalaatini qiserneqarmat angut qisersisoq aperisimallugu sooq taamaaliornersoq. Aperimmagulu tassanngaannaq sakkortuumik tillunneqarpoq, tillunneqarnerminilu nunamut uppilluni. Nakuuserfigineqarnera angummit kammalaatiminik unitsinneqarsimasoq taassuma oqaluttuaraa.
- Angut taanna takunikuunngisaannarpara oqaluunnikuunngisaannarlugu. Naluara kinaasoq.
Eqqartuussineq meriartoqarnerani unitsinneqartoq.
Ullumikkut eqqartuussineq piffissaanngitsukkut unitsinneqarpoq, eqqartuusseqataasoq iluaallerluni meriarmat. Eqqartuussineq taamaalilluni unitsinneqarpoq, naatsorsuutigineqarlunilu augustip qaammataani nangeqqinneqassasoq. Ulloq kingusinnerusukkut inissinneqassaaq.
Unnerluutigineqartut saviminernik paffequserneqarlutik eqqartuussivimmiit anninneqarput.
