Nutarterneqarpoq
Sisimiuni ujaasisoqartoq - ujaarineqartut ajunngitsut nassaarineqarput
Angut inuusuttoq ilaasualu tammaaneqartut politiinut tallimanngornerup unnuaani nalunaarutigineqarpoq. Arktisk Kommando tallimanngornermi ualikkut ilisimatitsivoq ujaarineqartut ajunngitsut nassaarineqartut, ikiuussimasunullu qujallutik.
Grønlands Politi
OBS. Allaaserisaq nutarterneqarpoq ujaarineqartullu kinaassusaa peerneqarluni. Ujaarineqartut maanna nassaarineqarsimalerput.
Angut inuusuttoq maqaasineqartoq politiinut tallimanngornerup unnuaani nal. 00.40 missaani nalunaarutigineqarpoq.
Angut politiit paasissutissaataat naapertorlugit Sisimiuniit Itilliup tungaanut umiatsiamik angalasimavoq, politiillu paasissutissaatai naapertorlugit Sisimiuniit avalakkami arnamik inuusuttumik ilaasoqarsimalluni.
- Angallatigaa Poca 505 qaqortoq, Suzuki 90-imik motorilik. Umiatsiaaraq aquttarfeeraqarpoq, Kalaallit Nunaata Politiivini pigaartut pisortaat Preben Kleist Sermitsiamut ilisimatitsivoq.
Ujaasineq tallimanngornermi nal. 13.15 taamaatinneqarpoq, ujaarineqartut ajunngitsut nassaarineqarmata. Arktisk Kommando, ujaasinermi aqutsisuusimasoq, ujaasinermi ikiuuttunut tamanut qujassuteqarpoq.
Angalasut nakkutiginneqquneqarput
Politiini pigaartut pisortaat Preben Kleist Sermitsiamut tallimanngornermi ullaap tungaani ilisimatitsivoq ujarneqartut Sisimiuniit sisamanngornermi ullup qanoq ilinerani avalassimanersut ilisimaneqanngitsoq. Taamaammat Sisimiut Itilliullu akornanni angalasut umiatsiamik ippinnarsinnaasumik naammattuuinissamut eqqummaareqquneqarput.
Sisimiuni politiit Targamik attartorlutik unnuaq nal. 02.00 ujaasillutik aallartipput. Maannalu qulimiguulik atorlugu aamma ujaasineq nanginneqarsimavoq. Kajumissutsiminnik peqataasut ujaaseqataalereersimasut politiit ilisimatitsipput.
Sisimiuni politiit attavigineqarsinnaapput oqarasuaat 70 13 22-mut. Kalaallit Nunaanni Politiit attavigineqarsinnaapput oqarasuaat 70 14 48-mut.
