Sisimiut amerikamiunit tikeraartoqarnissaa assigiinngitsunik isummerfigineqarpoq

Sisimiut sapaammi ullaakkut nalunaaqutaq qulingiluanngoraa Sisimiut silagippoq illoqarfillu inoqarpiarani eqqissisimaqaaq. 

Innuttaasut sapaatip ullaavani eqqissisimasuni ullaakkorsiutisiniarlutik pisiniarput.

Piffissamili qanittumi inuppassuit USA-meersut illoqarfimmiilissapput. Usha Vancemi Mike Waltz peqatigalugu nunatsinnukassaaq.

Innuttaasut Pisiffimmut pisiniartut Sermitsiap naapippai. Ilai ullaakkorsiutisiniarput, ilaalu nunap timaanukassamaarlutik taquarsiniarput.

Nipilersortartoq, Finn Lynge Frederiksen Sermitsiaq aamma naapitaanut ilaavoq. Nutaarsiassaq tusaramiuk pissangaammerpoq, tikeraartussallu pissaaneqaqimmata innuttaasut ataqqinnittumik eqqissisimanissaat neriuutigaa:

- Qangali maaniittareernikuummata qangalilu kammagereernikuullutigit neriuppunga ajunngitsumik siunertaqarlutik maanngarniartut. Pingaartippara iluamik kiinnerfigissagigut. Arlaannik kamassaarinertut pillutalu pinaveersaassasugut neriuppunga. 

- Nunarsuarmi pissaaneqarnerpaapput aamma taanna ataqqisariaqarparput. Naak uagut pingaartitagut aamma pingaartikkaluarlutigit, kisianni aamma ammasariaqarpugut suleqatissatsinnut.

- Tikilluaqqusaapput

Lars Peter Olsen isumaqarpoq kikkut tamaasa tikilluaqqusariaqarigut. 

- Uanga qisuariarpallaanngilanga, isumaqarama nunarsuarmiut tamaasa nunatsinnut tikilluaqqusaasariaqartut. Suna ajorami qimussertunik alakkarterippata. Takornariarlutik tikeraarpata sussagatta akerliuniaannarluta nalunngilagut amerikarmiut akerliuffigitikkaangamik qanoq sakkortutigisunik pisartut. Nunarsuarmi pissutsit taamaatsillugit, taama mikitigaluta sooq taama akerliuniakujutsigissaagut.

Søren Andersen: "Toqqissisimananngilaq"

Kikkulli tamarmik isumalluarpallaanngillat. Søren Andersen akerliuvoq isumaqarlunilu akerlissutsimik takutitsisariaqartugut.

- Toqqissisimanannginnami. Tikilluaqqussasigut isumaqanngilanga.

- Eqqumiippoq

Jimmy Hymøllerip tikeraarnerup siunertaa qularaa, aamma sooq inuit taakkua tikeraarniarlutik aalajangersimanersut eqqarsaatigalugu.

- Imaassinnaavoq tatineqarsimasut, naluarput suna pissutigalugu tikeraarniarnersut, siunertaqarsimassapput, tamannalu eqqumiippallaarpoq.

- Siunissarput sianigissavarput

Miilu Enoksen ernumavoq, nunarsuarmilu pissaaneqarniuttunut akunnermiliuttoqarnissaa ernumagalugu.

- Tusarlugu pakatsinalaarpoq. Pissaaneqarniuttut taakkua avatitsinniittut eqqarsaatigalugit akunnermuliutissagutta nuanniikkunaqaaq. Eqqarsariaammernarpoq feriaannartut atorsimagunikkut politikerimillu naapitsiniarsaraluni pissusissamisoorpalunngilaq. Sunniiniarpasippoq. Isumaqarpunga soqutiginngikkunikku pitsaanerussaaq, siunissarput pillugu mianersortariaqarpugut.