Siulersuisuni ilaasortap ataatsip akissarsiaanik qaffaaneq annertooq
NunaGreenimi siulersuisuni siulittaasup akissarsiai 365.000 koruuninit 500.000 koruuninut qaffassimapput, maannalu Namminersorlutik Oqartussat ingerlatseqatigiiffiutaanni siulersuisuni akissarsiaqarnerpaat pingajuattut inissisimalerpoq.
Utoqqarmiut Kangerluarsunnguanni erngup nukinganik nukissiorfiup (assitaliussaq) nutarternissaa aammalu Qeqertarsuup Tunuani erngup nukinganik nukissiorfimmik nutaamik pilersitsinissaq NunaGreenip suliassaraa, tamatumalu kingunerisaanik ingerlatseqatigiiffiup siulersuisuini siulittaasua akissarsiaqarnerulersimavoq.
Leiff Josefsen
Namminersorlutik Oqartussat ingerlatseqatigiiffiutaanni siulersuisunut ilaasortat akissarsiaqarnerulernissartik qilanaarisinnaagaat, nalunaarummi nutaami apriilip aallaqqaataani 2024-mi atuutilersumi atuarneqarsinnaavoq.
Ingerlatseqatigiiffinni namminersorlutik oqartussanit pigineqartuni siulersuisunut ilaasortat akissarsiaannut tunngatillugu Namminersorlutik Oqartussat allannguisimapput.
Ukiut tallimat tamaasa inuiaqatigiinni akit allanngorarnerat naapertorlugu akissarsiat nalimmassarneqartarnissaat aallaqqaammut pilersaarutaavoq. Pilersaarulli tamanna taamaatinneqarpoq, akissarsiallu ukiut tamaasa akit allanngorarnerat naapertorlugit nalimmassarneqartalissapput.
Akiliut ataaseq maluginiarnartoq
Akiliutit ilaat maluginiarnartuuvoq, tassami akissarsiat allanngortinneqarnerat akit allanngornerannut naapertuutinngimmat. NunaGreenimi siulersuisuni siulittaasoq Line Frederiksen 135.000 koruuninik qaffaavigineqarpoq.
Suliniuteqarpallaannginnermit suliassamut oqimaaqisumut, tassa Utoqqarmiut Kangerluani erngup nukinganik nukissiorfimmik alliliinermut Qeqertarsuullu Tunuani erngup nukinganik nukissiorfimmik nutaamik pilersitsinermut, ingerlatseqatigiiffiup ikaarsaarneranik tamanna nassuiarneqarpoq.
Akissarsiat maanna atuuttut takukkit. 2023-mi allannguutit ungaluutini takuneqarsinnaapput.
Najoqqutaq: Namminersorlutik Oqartussat ingerlatseqatigiiffiutaannut akissarsiat pillugit Naalakkersuisut politikkiat pillugu nalunaarut nr. 25, 9. maj 2024-meersoq
