Siulittaasoq Mimi Karlsen misissuititsiniarpoq

Inatsisartoqarfimmi siornatigut sulisut ukiorpassuarni allaffeqarfimmi sulinerminni misigisimasaat ilungersunartut taamatullu atorfimminni ukiut suliffigisimasami amerlassusaannik annaasaqarsimanerannik kinguneqartut saqqummiunneqarmata Inatsisartut siulittaasuat Mimi Karlsen (IA) tupaallappoq.

Siornatigut sulisuusimasut suliffigisimasaminni avatangiisit ajortut, aqutsisut nikanarsaasut, malersuisut, mamarliisartut allarpassuillu nuanniitsut oqaluttuaraat. Qinikkalli suleqatigilluartarsimallugit sulisuusimasut ilanngullugu eqqaavaat.

Politikerit sulisunik malersuisut

Inatsisartut siulittaasuat Mimi Karlsen tupaallannartumik ilimaginngisamillu nutaarsiassaqarpoq, tassa Inatsisartuni ilaasortat ataatsimiititaliani allatsinut ataqqinninnatik pissusilersulersortalersimammata:

- Sulisut atugaat pillugit paasissutissat Inatsisartut Siulittaasoqarfiannut annguttarmata soorunami pissutsit iliuuseqarfigisariaqarpagut. Assersuutigalugu sulisut qanittukkut nalunaarfigaatigut ataatsimiititaliani allatsitut sulinerminni politikerinit naleqqutinngitsumik nuanniitsumillu pineqartarsimallutik, allaallu tusagassiuutitigut nittartakkanilu attaveqaqatigiittarfinni akissuteqarnissamut periarfissaqaratik nittarsaanneqartarsimallutik, tamannalu iliuuseqarfigineqassaaq,

Mimi Karlsen Sermitsiamut oqarpoq. Qinikkat Inatsisartut Siulittaasoqarfianni sulisut sulinerat pillugu naammagittaalliuutissaqarunik saaffiginniffissat eqqortut atortaqqullugit taassuma kajumissaarutigaa. Tassa Siulittaasoqarfimmut tusagassiuutit inuillu attaveqaqatigiittarfii aqqutiginagit.

Uppernarsaatit amigaataapput

Sulisorpassuit tatineqangaarsimasut inuppalaanngitsumillu pineqartarsimasut, taakkualu ilaat sulinerminni atukkatik ajorluinnartut pissutigalugit uippakajaarlersartut, eqqarsaatigalugit Inatsisartut siulittaasuat apeqquteqarfigaarput. Sulisuusimasut ikioqqullutik suaartarneri tusaanngitsuusaarneqartarsimammata siulittaasoqarfimmi maannakkut sulisut qanoq illersorneqarsinnaanersut aperaarput:

- Siulittaasunngunngikkallarama qanoq pisoqartarsimanersoq ilisimanngilara, taamaattumik siulittaasunngunngikkallarama qanoq pisoqarsimanersoq oqaaseqarfigitinnagu uppernarsaatit takoqqaartariaqarpakka, Mimi Karlsen akivoq, nangipporlu:

- Sulisorpassuaqarpugut assigiinngitsunik, ilinniarluarsimasuniit igaffimmiunut. Taamaammat suleqatigiissitamik ataatsimiititaliaqarpugut, sulisullu naapertuilluanngitsumik pineqartutut misigisut ataatsimiititaliaq, sulisut sinniisaat, isumannaallisaanermut ataatsimiititaliaq soorunami aamma kattuffiit aqqutigalugit naammagittaalliorsinnaapput.

Mimi Karlsenip siornatigut sulisut isornartorsiuinerat sakkortooq sooq kattuffiannit qisuariarfigineqarsimannginnersoq tupigusuutigaa.

- Sulisitsisut sulisullu akornanni aaqqiagiinngissuteqartoqaraangat kattuffiit akuliuttarput. Pisumi matumani taakku sumiissimanerpat, aperaaq.

Suliffimmi maanna atuuttut pingaarnerutinneqassapput

- Sulisuusimasut kattuffiat pitsaanerusumik atugaqalernissaq anguniarlugu suleqatiserinninniarsimagaluartoq iluatsinngitsumilli sulisuusimasut oqaluttuarput. Aamma Sullivinnik Nakkutilliisoqarfik suliffeqarfimmi misissuitinniarsimagaluarlugu iluatsissimanngitsumik. Tamatuma kingunerisaanik tunniutiinnarput soraarlutillu. Suliffimmi pissutsit misissuiffigineqarnissaat illit aallartissaviuk?

- Aap, kisianni uanga sioqqullunga pisimasut misissorneqassappata ukiut qassit kingumut uterfigissappat? Piffissami matumani sulinermi pissutsit maannakkut ukkatarinissaat uannut pingaarnerpaapput. Pissutsit eqqartorneqartut uanga siulittaasuunnginnerma nalaaneersuupput, taamaattumik uanga siulittaasuunnginnerma nalaani pisimasut misissorneqassappata allat akisussaaffigissavaat. Ukiut ingerlaneranni pisimasut uppernarsaatissaqannginnama iliuuseqarfigisinnaanngilakka. Taamaattumik qanga pisimasut iliuuseqarfigiuminaapput, qularutigineqassanngilarli maanna atuuttut iliuuseqarfigissagakkit. Tassalu sulisunut qinikkanullu sulinermi atugassarititat pitsaasuunissaat.

- Suliffiup ukiut ingerlanerini nalilersorneqarnerata (APV) misissornissaanut piumassuseqarpit?

- Oqaatigeriikkattut maannakkut unammillernartut ukkatarissavakka. Sulisut sulinermi atukkat pillugit saaffiginninnikuupput, taakkulu soorunami qisuariarfigissavavut, soorluttaaq suliffiit allat tamarmik pissutsinik aaqqiissuteqartariaqartutut saaffiginnittoqaraangat taamaattartut. Siornatigut suliffimmi nalilersuinerit takuneqarnissaat qinnutigineqarpat soorunami taamaaliussaagut.

- Pissutsit eqqaaneqartut kinguneqartinneqassappat?

- Takussavarput. Pissutsit misissussavagut, kisianni soorlu oqareersunga pissutsit maanna atuuttut pingaarnerutissavakka, taakkualu pillugit ingerlaannaq iliuuseqarsinnaavunga. Sulinermi atugassarititaasut Inatsisartunut Inatsisartoqarfimmilu sulisunut pitsaasuunissaat qulakkiissavagut.

- Paasigukku suliffimmi atugassarititaasut ajorneri pissutigalugit sulisut qimarngussimasut taakku utoqqatserfigissavigit?

- Maanna akissuteqarfigisinnaanngilara. Eqqaamajuk septembarimi (2023-mi, aaqq.) Inatsisartunut siulittaasunngornikuugama. Siulittaasuulerninniit arlaannik arajutsisaqarsimanersunga takoqqaalaariartigu.

- Sulisut aalaakkaasut suliffimmi atugassarititat ajorpallaarnerat pissutigalugu soraarniuteqartariaqarsimasut atorfimminni ukiut suliffigisimasami amerlassusaannik annaasaqarsimanerat aamma eqqaaneqarpoq. Maannalu inuusuttut suliffimmi misilittagaqarpianngitsut suliamik pingaarutilimmik maanna kivitsiniarsaripput. Maannakkut pisut kisiisa pinnagit, illilli sioqqullutit pissutsit atuussimasut tunngavigalugit, misissuiffiginissaat ammaaffigaajuk? Taamaaliornikkut qinikkat sulinerminni pitsaasumik sullinneqarnissaat anguneqassammat.

- Pisariaqalissappat, uangalu sioqqullunga qanoq pisoqarsimaneranik misissuisoqarnissaa kissaatigineqassappat, pissutsit pineqartut ilisimasaqarfigineqarsimassapput. Eqqaamasariaqarporli uanga sioqqullunga Inatsisartut allanik siulittaasoqarsimammata. Naluara taakkua suliassatik qanoq suliarisimaneraat, kisianni siulittaasoqarfimmi malittarisassaqarpugut malittariaqartakkatsinnik. 

- Sulisitsisut sulisunut ajorluinnartunik atugassaqartitsisimanerat paasineqarpat — aammaarlunga - tamanna kinguneqartinneqarpa?

- Maannakkut akissutissarsisinnaanngilanga kinguneqartitsisoqassanersoq. Soorlu oqaatigineqareersoq pissutsit allaaserineqartut pillugit tusagaqarsimanngilanga. Misissuinermik aallartitsisoqanngilaq. Pissutsit uanga sioqqullunga atuussimasut ilisimasaqarfiginngilakka, taamaattumik kinguneqartitsisoqassanersoq maannakkut aalajangiisinnaanngilanga, Inatsisartut siulittaasuat Mimi Karlsen oqarpoq.