Siulittaasoq Trump-ip nalunaaruteqarneranut: Kalaallit Nunaat uagut pigaarput
Naalakkersuisut siulittaasuata Kalaallit Nunaata pigineqarnera pillugu Trump oqaloqatigiumanngilaa. Kalaallit Nunaat uagut pigaarput, oqarpoq.
- Tuniniagaanngilagut aamma tuniniagaalernavianngilagut, Múte B. Egede oqarpoq.
Assiliisoq: Leiff Josefsen
USA-p præsidentissaata Donald Trumpip inuit attaveqaqatigiittarfianni Truth Socialimi allakkamini Kalaallit Nunaata pigineqarnera aqunneqarneralu eqqartorpai, oqaatigaalu pingaaruteqarnerpaasoq.
Naalakkersuisut siulittaasuata Múte B. Egedep (IA) nalunaarut maanna allakkatigut qisuariarfigaa.
Kalaallit Nunaat tuniniarneqanngitsoq erseqqissaqqippaa:
- Kalaallit Nunaat inuiaat Kalaallit pigaat. Tuniniagaanngilagut aamma tuniniagaalernavianngilagut. Kiffaanngissuseq ukiorpassuarni sorsuutigisarput sapangissanngilarput, Múte B. Egede allappoq.
Kalaallit Nunaat suleqatigiinnissamut niuernermullu ammasoq erseqqissarpaa:
- Nunarsuarmioqatitsinnilli suleqateqarnissamut niueqateqarnissamullu suli ammassaagut, pingaartumik nunat sanilerisavut eqqarsaatigalugit. Sunami tamarmi Danmarkikkooqqaarsinnaanngilaq. Suleqateqarnermi puigunngisaannassavarput uagut naleqartitavut tunngavigalugit ingerlasoqassammat. Qaqagumummi inuiaat Kalaallit nunaminnut piginnittuunerat immeraassutaassanngilaq, Múte B. Egede akissuteqarpoq.
