INATSISARTUT
Siulittaasoqarfiup ataatsimiititaliat arlallit atorunnaarsinniarpai
Inatsisartut Siulittaasoqarfiata ataatsimiititaliat ikinnerusut atorunnaarsinnissaannut, ataatsimiititalianilu ilaasortat 20-nik ikilisinnissaannut piareersimavoq, taamaalilluni ataatsimiititaliani ilaasortat 60-iniit 40-nut ikilisinneqassapput.
Inatsisartut ataatsimiillutik aallartimmata tallimanngorneq 22. september assilisaq. Assimi Hans Aronsen aamma Pipaluk Lynge amigaataapput.
Leiff Josefsen
Partiit siulittaasuinut
nassiunneqaqqammersoq pilersaarut naapertorlugu Inatsisartut siulittaasuata Mimi Karlsenip
inatsisartut suleriaasiannik allannguinissaa iluatsissappat, ukiumut
angalanermut aningaasartuutit 1,3 millionit koruuningajannik ikilissapput.
Mimi Karlsenip partiit siulittaasui pilersaarut nutaaq pillugu
oqaloqatiginissaannut qaaqquai, tassanilu oqaatigineqarpoq “ilaasortat
naalakkersuinikkut suliaqarnermut piffissaminnik pitsaanerusumik
atuisinnaalissasut” siulittaasoqarfiup nalileraa.
- Ataatsimiititaliat marluk UPA24-mi pilersinneqartussat tamarmik immikkut
tallimanik ilaasortaqarlutik pilersinneqassasut siulittaasoqarfiup taamaattumik aalajangerpaa. Tamatumani Aningaasaqarnermut
Akileraartarnermullu Ataatsimiititaliaq aamma Kukkunersiuinermut
Ataatsimiititaliaq pineqarput, Mimi Karlsenip allagaani allassimavoq,
nangipporlu:
- Tamatumunnga atatillugu ataatsimiititaliani allani tamani
ilaasortat tallimanngortinneqarnerisigut ataatsimiititaliat sulinerisa
oqilisarneqarsinnaanerat misissuataarneqassasoq siulittaasoqarfiup aamma
aalajangerpaa. Taamaaliornikkut ilaasortat ataatsimiititaliani arlalinni
issiasut ikilisinneqarsinnaapput.
- Ataatsimiititaliani
ilaasortat amerlassusiisa ikilisinneqarnerisigut qinersisarnerit pillugit
teknikikkut suleqatigiinneq atuuttoq ingerlaannassappat, ataatsimiititaliani
inissat tallimassaat Naleqqap aamma Demokraatit Atassutillu akornanni
makitsissutigineqartariaqassaaq, Mimi Karlsen allappoq,
ilisimatitsissutigiitigivaalu ataatsimiititaliat mikinerusut
ataatsimiititalianut anginerusunut kattunneqarnissaat siulittaasoqarfiup aamma
sulissutigaa.
Malittarisassat nutaat upernaakkut ataatsimiinnerup aallartinnginnerani atuutilernissaat siulittaasoqarfiup siunertaraa, tamannalu partiit siulittaasuinik oqaloqatiginninnissaminnut qaaqqusinermut tunngaviuvoq.
- Ataatsimiititaliat sulinerisa avataatigut aamma naalakkersuinikkut suliaqarnermut piffissaqarnerunissamik ilaasortat kissaataat naammassiniarlugit inatsisartutigoortumik sulinitta aaqqissuussaanerata allanngortinneqarnissaa piffissanngortoq siulittaasoqarfik isumaqarpoq, Mimi Karlsenip qaaqqusissutaani taama allassimavoq.