Siulittaasup nassuerutigaa Inatsisartut suleriaasiannik allannguinissaq pisariaqartinneqartoq

- Inatsisartutigoortumilli sulineq sivisusinnaasarpoq, soorlu aamma nutaamik inatsisiliornerit inatsisiliornernik atuuttunik allanngortitsilaarneriinnaalluunniit aamma sivisusinnaasartut, Mimi Karlsen (IA) oqarpoq, Inatsisartuni ilaasortat arlallit siunnersuuteqarniaraluarlutik iluatsitsineq ajulertarneq pillugu naammagittaalliuteqarnerinut akissuteqarluni.

Malittarisassat sukannersut attatiinnarusuppai

Taamaattorli malittarisassanik allannguinissamik suliaqartoqarneraagaluarluni, Mimi Karlsen erseqqissaateqanngilaq Inatsisartut suleriaasiat siunissami qanoq  aaqqissuunneqassanersoq.

Paarlattuanimmi tusagassiuutitigut nalunaarummini erseqqissumik nalunaarpoq, Inatsisartuni ilaasortanut piumasaqaatit, siunnersuuteqaraluarnerminnilu itigassutigisartagaat, sukangasoorujussuit attatiinnarneqassasut:

- Siunnersuutinulli inatsisartuni oqaluuserisassanngortinneqartunut tamatigut

piumasaqaateqartoqartarnissaa tamatuma allanngortinngilaa. Inatsisartuni aalajangiinerit innuttaasut ulluinnarni sulinerannut suliffeqarfiillu ulluinnarni ingerlatsinerannut sunniuteqartarput, taamaattumillu inatsisartuni qanoq aalajangiisoqarnera ilisimaneqaqqissaartariaqarluni, tamatumanilu tassa ilusissanut piumasaqaatinit tamatuminnga qularnaarinneqataasarput.

Teknikkikkut siunnersuineq 

Inatsisartut allattoqarfiata nassuiarneqarnerani allattoqarfik "Inatsisartunut ilaasortanik qaffasissumik pitsaassusilimmik sunniuteqarluartumillu sullissineq aammalu innuttaasunut sammisumik ammasumik ingerlatsinissamik sulissuteqarneq" sulissutigineqarpoq.

Taamaakkaluartoq Mimi Karlsenip erseqqissaatigigaluarlugu Inatsisartunut ilaasortat piginnaasaqarluartumik pitsaasumillu kiffartuunneqartassasut, aamma erseqqissaatigaa allaffeqarfik taamaallaat "teknikkikkut politikkikkullu tunngaviusumik siunnersuisassasoq":

- Inatsisartunut ilaasortat siunnersuutimik naalakkersuinermut tunngasortaat namminneq akisussaaffigisarpaat, allattoqarfimmili sulisunit teknikikkut siunnersorneqarlutillu ikiorneqarsinnaallutik. Taamatut teknikikkut naalakkersuinikkullu illuinnaasiunngitsumik siunnersuisarneq taamaalilluni taamaallaat ilaasortat ikiorniarlugit neqeroorutigineqartarpoq, siunnersuutit killiliussat siulittaasoqarfimmit aalajangersarneqarsimasut iluaniinnissaat qularnaarneqarsinnaaniassammat.

- Taamatut siunnersuinermi assersuutigalugu pineqarsinnaapput aalajangersakkat suut suliassaqarfiup aalajangersimasup iluani pioreernersut imaluunniit qinigaaffiup kingulliup ingerlanerani qulequtaq pineqartoq pillugu Inatsisartuni siunnersuuteqartoqarsimanersoq apeqquteqartoqarsimanersorluunniit pillugit paasissutissat.

Inatsisartunut ilaasortat taamatuttaaq nalilertissinnaavaat siunnersuut kissaatigineqartoq ass. inatsimmut tunngaviusumut, namminersorneq pillugu inatsimmut, nunat tamalaat akornanni isumaqatigiissutinut Kalaallit Nunaata ilannguffigisimasaanut inatsisiliornernulluunniit allanut akerliunersoq.

Ukiut 13-it sinnilaarlugit ingerlanerini sulisussarsiornerit 83-it  

Inatsisartut allattoqarfia sukumiinerusumik misissuiffigilaaraanni sulisussarsiornerit arajutsisassaanngitsut ersersippaat pingaartumik ataatsimiititaliat allattaat nutserisullu annertuumik taarseraattut taakkulu saniatigut aamma allaffissornermik suliaqartut ilanngullutik annertuumik taarseraattut.

Sulisussarsiornerit ilai arlallit arlalissuarnik ataatsikkut sulisussarsiornerusartut aamma arajutsisassaanngilaq. Uani assersuut 2019-meersoq:

Ukiut tamaasa allaffeqarfik ataatsimiititaliat allatsissaannik pissarsiortartut maluginiarnarpoq, ataatsimiititaliallu allattai inatsisartut sulineranni kikkulluunniiuneq ajorput. Taakkuuppummi Inatsisartunut sullissisut qaninnerpaat ataatsimiititaliat aqqutigalugit. Taakkuupput aamma Inatsisartut Naalakkersuisullu akornanni pitsaasumik suleqatigiinnerup aamma - pisariaqartitsisoqarpat - akerleriinnermik aaqqiiniarnermi pisariaqartinneqartut politikkikkullu suliassat annertuut annikinnerusullu pillugit sulinermi ataqatigiissaarinermik annertuumik suliaqartartut, Nunatsinni ataatsimiittarfiit ataqqinarnersaanni ataatsimiinnerup nalaani aammalu ukiumoortumik katersuunnerit avataanni Inatsisartut ulluinnarni sulineranni pisariaqartinneqarluinnartuusut.

Sermitsiap nittartakkatigut nutaarsiassaqartitsiviannit sulissutigaarput Inatsisartut siulittaasuat Mimi Karlsen (IA) oqaaseqartinniarlugu, Inatsisartut allattoqarfianni sulisut taama amerlatigisut taarseraannerannut suna pissutaanersoq, aammalu siulittaasoqarfik qanoq iliuuseqarnersoq Inatsisartuni ilaasortat kiffartuunneqarnerisa pitsaassusaata annertunerpaatinnissaa qulakkeerniarlugu, sulisunik attassiinnarsinnaanermik ajornartorsiuteqartoqarnera ersarissumik takuneqarsinnaammat.