Siumumi ilaasortat marluk tunuarput
Siumumi ilaasortat marluk, tassaasut Jens Immanuelsen aamma Ilatsiaq Markussen partiimit tunuarnertik Sermitsiamut uppernarsarpaat.
Fotograf: Leiff Josefsen.
Politikerit nuimasut partiimi ilaasortaajunnaarput.
Jens Immanuelsenip, Aalisarnermut Piniarnermullu naalakkersuisuusimasup, Siumumi ilaasortaajunnaarnini nammineq Sermitsiamut uppernarsarpaa. Sunali peqqutigalugu ilaasortaajunnaarnini maannakkut oqaatigerusunnginnerarpaa.
Ilatsiaq Markussenip Uummannameersup aamma Siumumi ilaasortaajunnaarnini Sermitsiamut aamma nammineq uppernarsarpaa:
- Aalisarnermut inatsissap eqqartorneqarnerani Parti Siumut ilisarisinnaannginnakku. Susassaqartunut kattuffinnut, atuisunut eqqornerlunneqartussanullu allanut Siumup upperinnikkunnaarsimanera, allaallu akerliussutsimik takutitsisunut soqutinginninngilluinnarnera aallaavingaara.
Siulittaasup ilaasortanik annaasaqarnissani naatsorsuutigigaa
Siumup siulittaasua, Erik Jensen, ilaasortat partiimit anisimasut pillugit Sermitsiamit apersorneqarpoq:
- Aalisarnermut inatsisissat naammassineqarnissaanut uagut tunuliaquttagut siammasinnerpaarpaamik akuuteqqissaarnissaat naalaaqqissaarnissaat pingaartittorujussuusimavarput. Taamaattumillu nalornissutiginagu soorunami inuiaat kalaallit aalisartullu nunaqarfiillu illersorlugit taasinissarput siunnerfigalutigu eqqartuilluarnikuuvugut.
- Sunniutigisinnaasai aamma kingunerisinnaasai tamaaviisa takusinnaasimavagut, kisianni inuit nammineq kiffaanngissuseqarput qanoq qisuariassanerlutik, Erik Jensen Sermitsiamut nassuiaavoq.
