Siumut: Nunarput tuniniariarneqaqattaarpoq
Partii Siumut nalunaarummik maluginiarnartumik saqqummiussinissalluni aalajangersimavoq, tassani kikkuussagaluarnersut pasinarsarneqarput Kalaallit Nunaat tuniniarniarsarigaat. Sermitsiamit paasiniaavugut nalunaarutip tunuliaqutai suunersut, pingaartumik aamma kikkut nunarput tuniniarniarsarineraat akissutissarsiniarlugu.
Siumup Facebookianit assilisaq
Partiit aallartimisaalerput Inatsisartunut qinersinissamut atatillugu pilersaarutiminnik qinigaaffimmilu tulliuttumi, 2025-2029-mi anguniagassaminnik saqqummiussillattaarlutik.
Qinigaaffimmi tulliuttumi anguniagassatut pilersaarutit partiit amerlanerit suli tamanut takusassiarinngikkaluaraat, maanna malunnarsillualereerpoq partiiit annertuumik nittarsaassinermik ingerlataqartut inuit qarasaasiatigut attaveqaqatigiittarfiisigut, tamanna aamma atuuppoq nunatta partiivisa annersaasa tullianni, Siumumi.
Pasilliutit ilungersunartut paasissutissartaqanngitsulli
Marlunngorneq februaarip 12-ani partiip nalunaarutigaa "Inuiaat Kalaallit qarsullugit Nunarput tuniniariarneqaqattaarpoq, aamma innuttaaqatitsinnit."
Sermitsiaq partiip siulittaasua Erik Jensen attavigaarput paasiniarlugu kikkut nunarput tuniniariaqattaarneraat aamma taamaaliortut suminngaaneersuunersut.
Partiip siulittaasuata akisussamut allamut innersuuppaatigut, tassalu partiip ataqatigiissaarinermut siulittaasuata tullia Hans Peter Poulsen (S) akissuteqassasoq innersuunneqarluni.
Sermitsiamit Hans Peter Poulsenimut apeqqutigaarput kikkut Kalaallit qarsullugit Nunarput tuniniariaqattaarneraat.
Hans Peter Poulsen tigussaasunik taasaqanngilaq tuniniaaniaqattaartutut pasisaminnik, taassumali innersuussutigaa, ajornartuuleruttorfimmi inoqarsimasoq, namminneq aalajangikkaminnik "suliamik namminneq tigusisimasunik" USA-liarsimasunillu.
- Nalunarput matut matoqqasut tunuanni qanoq oqalussimanersut, qularutissaanngilarli tamanna innuttaasut akornanni toqqissisimatitsiunnaarnikuusoq. Taamaattumik Siumumit iliuutsit taamaattut akuersaarnatigit oqariartuutigiinnarparput.
Taamatut allaqqasoqanngilaq saqqummiutassinni. Allaqqavoq nunarput arlaleriarlugu tuniniarniarneqaqattaartoq, uagullu paaserusuinnarparput matumani pasilliummi kikkut pineqarnersut aamma uppernarsaataasinnaasunik takorusuinnarpugut?
- Akissutigeriikkakka innersuussutigiinnassavakka, Hans Peter Poulsen akivoq
Aperineqarami Siumut uppernarsaatinik takutitsisinnaanersoq ilumut arlaata nunarput tuniniarniarsarisimappagu, taassuma kingumut uteqqippaa Siumup akuersaanngikkaa inuit namminneq soqutigisarsorlutik iliuuseqarsimanerat. Taamatut uteqqiivoq, taakku namminneq akisussaaffigisaminnik angalasimasut nunatsinnik tuniniaaniarsarisimassappata, tamassumunnga uppernarsaatinik saqqummiussinani.
Amerikami tusarniaaneq innersuussutigineqarpoq
Saqqummiussami tassani aamma Amerikami tusarniaaneq innersuussutigineqarpoq, Washingtonimi pingasunngornermi ingerlanneqartoq, tassani sammineqarpoq "Issittup aamma Kalaallit Nunaata nunarsuarmi inissisimanerat aallaavigalugu amerikamiut soqutigisaannut qanoq isumaqarnera".
Tusarniaanerup siunertarivaa "Kalaallit Nunaata amerikamiut aningaasaqarniarnerannut nunallu isumannaatsuunissaanut pingaaruteqassusaata misissorneqarnissaa, nunap aatsitassanik qaqutigoortunik peqassusaa amerikamiullu ilisimatusarneranni nunami peqataanerat kiisalu Issittumi Ruslandip Kinallu sunniuteqarnerulernissaata aarlerinartorsiutai."
Amerikamiut senatorii ilisimatusartullu ataatsimiititaliamut saqqummiussipput, amerikamiut soqutigisaat Issittumi Kalaallit Nunaannilu tusarniaanerup ingerlanerani, amerikamiut senatip niuernermut, ilisimatusarnermut angallannermullu aaqqissuussinerani ataatsimiititaliaata tusarniaanerani.
