Siumut: Qeqertarsuaq Kommune Qeqertalimmit avissaartinneqassaaq

Siumut Qeqertarsuaq pilersaaruteqarpoq. Tassalu Qeqertarsuaq Kommune Qeqertalimmit avissaartinniarlugu atsiornernik katersinissamik aallartitsinissaq:

- Siumut Qeqertarsuaq februaarimi ataatsimeersuarmat aalajangerneqarpoq Qeqertarsuup Kommune Qeqertalimmit avissaartinniarlugu sulissutiginnittoqassasoq, tamannalu suliniutigalugu aallartissavarput atsiornernik katersinermik aallartitsinitsigut kommunalbestyrelsimut qinersineq naammassiniariarpat, Siumut Qeqertarsuarmi siulittaasoq, Larseeraq Berthelsen, Sermitsiamut oqarpoq.

Larseeraq Berthelsen aamma oqaluttuarpoq Qeqertarsuarmi partiit allat sassartitaat Siumumut isumaqataasut, taannalu qineqqusaarnermi ersittoq:

- Kommunimut qinersereernerup kingorna tapersersorneqarnissaa attanneqaannassanersoq pissangavunga, taanna oqarpoq.

"IA-p Aasiaat salliuppaa illoqarfiit nunaqarfiillu allat tunulliullugit"

Siumut Qeqertarsuaq sakkortuumik avoqqaarinnippoq kommunit kattunnerisa kingorna ineriartorneq qanoq ingerlanersoq pillugu, minnerunngitsumillu Qeqertarsuarmut qanoq sunniuteqarsimanersoq pillugu.

- Kommunit kattunnerisa kingorna Qeqertarsuaq ammuinnaq ingerlavoq, tamannalu innuttaasut ikiliartornerannik suliffeqarfiillu matoorarnerannik kinguneqarpoq, Larseeraq Berthelsen oqarpoq nangillunilu:

- Aasianniit innuttaasunik kiffartuussineq kigaatsorujussuuvoq innuttaasunullu paasiuminaatsorujussuulluni, minnerunngitsumillu qanimut oqartussaaqataaneq sanngiillerujussuartinneqarpoq, taamatullu innuttaasut qinikkanik oqaloqatiginnissinnaanerar ajornakusoorsilluni.

Illoqarfik illersorneqassaaq

Larseeraq Berthelsen isumaqarpoq Qeqertarsuup Kommune Qeqertalimmit avissaartineqarnissaa utaqqissunneqarsinnaajunnaartoq:

- Maani sutigut tamatigut kinguariartuinnavippugut. Qeqertarsuaq illersorniarutsigu, taava illoqarfik nammineq kommuninngortariaqarpoq, taamaaliornikkut Aasianni qanoq pisoqarnissaa utaqqiinnartariaarutissagatsigu. 

- Innuttaasut illoqarfitsinniigunnaarsimasut angerlaqqinnissaannik kajumilersitserusuppugut, taamatullu innuttaasut amerlisikkusuppagut, kiisalu minnerunngitsumik qanimut oqartussaaqataaneq aqqutigalugu inuussutissarsiornermik ingerlataqartut sikkeqaqqilernissaat isumagerusupparput.

Siumut Qeqertarsuup siulittaasua Larseeraq Berthelsen isumaqarpoq Kommune Qeqertalimmit avissaarnissaq Qeqertarsuarmut iluaqutaaginnassasoq:

- Periarfissarpassuaqarpugut Qeqertarsuarmi najugaqarusussutsip pilerseqqinnissaanut, taamatullu inuussutissarsiornermik ingerlataqartut amerliartoqqilernissaanut periarfissaqarluarpoq, Siumullu isumaqarpoq Qeqertarsuaq nammineq kommuninngussappat aningaasaqarnikkut iluaqutaaginnassasoq, taanna naggasiivoq.