Siusinaartumik soraarnerussutisiallit akitsuinernut akerliullutik takutitsipput
Siusinaartumik soraarnerussutisiallit atugaat pillugit naammagisimaarinnginnertik takutinniarlugu akerliussutsimik takutitsisoqarpoq.
Demonstrationip aallartiffia katersortarfimmit Inatsisartunut ingerlaarpoq.
Assi: Oscar Scott Carl
Siusinaartumik soraarnerusutisiallit 30-t missaanniittut ataasinngornermi ullup-qeqqata kingornatigut ilaatigut nioqqutissanik allanillu akitsuisoqartaarnera pillugu Nuummi akerliussutsimik takutitsipput.
Akerliussutsimik takutitsisut erseqqissarpaat siusinaartumik soraarnerusutisiaqarnermi ikiorsiissutaasinnaasut naammanngitsut. Akitsuisoqartaarnerani ilaatigut qaammammut nerisassarsiutissat naammagunnaarluinnarput, atisarsiutissat nungulluinnarput meeraqaraannilu meeqqanut aningaasat aamma naammagunnaartut oqariartuutigineqarpoq.
Demonstranterit Naalakkersuisut ilaasortanut marlunnut oqariartuuteqarput.
Assi: Oscar Scott Carl
Akerliussutsimik takutitsisut aamma oqaluttuarput kommunimut aningaasatigut ikiorserneqarnissamik qinnuteqaateqarnermi sapaatip-akunneri arlallit utaqqisoqaqqaartartoq, aningaasanik tunineqassagaanni, assersuutigalugu atisanik pisinissamut.
Naalakkersuisoq paasinnittoq
Naalakkersuisut marluk, Maasi Pedersen (IA) aamma Bentiaraq Ottosen (A), Nuummi Inatsisartut ataatsimiittarfiata silataani akerliussutsimik takutitsisut oqariartuutaannut tusarnaarput.
Bentiaraq Ottosenip najuuttunut demonstranterinut oqalugiarpoq, paasinnilluarlunilu oqariartuuteqarpoq.
Assi: Oscar Scott Carl
- Paasilluarsinnaavassi. Aaqqiissutissanik suliaqarnissami peqataatikkusuppatsigit. Aaqqissuusseqqinnerit ilusilersorpavut. Erseqqissaatigerusuppalu suliami tamatumani puigorneqassannginnassi, isumaginninnermut naalakkersuisoq Bentiaraq Ottosen oqarpoq nangillunilu:
- Paasilluarpara ilissi akitsuisoqarnerani eqqugaalluinnartartusi. Aaqqiissutissanik ilusilersuinissaq soqutigivarput, tamatumalu suliarineqarnerani ilissi innuttaasut kommunillu peqataatikkusuppavut. Paasilluarpara aamma suliat suliarineqarnerat sivisusinnaammat, taamaattumillu ilissinnut iluaqutaasussanik aaqqissuusseqqikkusuppugut.
Akerliussutsimik takutitsisut katersortarfimmiit Inatsisartut ataatsimiittarfiata tungaanut ingerlaaqatigiipput.
