Sivdlek’ ukiut 33-t qaangiuttut matuvoq – Sisimiuni piffissaq naavoq
Sisimiuni innuttaasut aviisi akeqanngitsoq allakkanut nakkartitsivimmiit tigusarunnaarpaat. Illoqarfiup aviisia, Sivdlek' ukiut 33-it qaangiutilersullu matuvoq. Tamanna akisussaasutut aaqqissuisup, Hans Henrik Petersenip uppernarsarpaa.
Foto: Ânâ-Grethe Klein
Sivdlek' Sisimiut Aviisiat, novembarip aallaqqaataani 1991-imiilli Sisimiuni innuttaasunut akeqanngitsumik agguaanneqartarpoq. Tamannali oqaluttuaannanngorpoq.
Sivdlek' ukiuni taakkunani illoqarfimmi innuttaasunut nutaarsiassanik, paasissutissanik, allaatigisanik, ussassaarutinik, pilluaqqussutsinik allanillu paasissutissanik pajuttarpoq.
Illoqarfimmi aviisip matunera, akisussaalluni aaqqissuisup, Hans Henrik Petersenip Sermitsiamut uppernarsarpaa.
Matusariaqalerneranut pissutaasoq piffissami matumani oqaatigisinnaannginnerarpaa.
