– Soorlu ilukkut savimmik kapineqaannarluni. Naalliutsinneqarnertut misinnarpoq.

Soorlu ilukkut savimmik kapineqarluni. Nilleq. Naalliutsinneqarnertut misinnarpoq. Spirali uannut ikkunneqartoq ernereernikunut atorneqartarpoq. 14-inik ukioqarpunga sulilu atoqateqarnikuunngisaannarlunga.

Atuartut ukiumoortumik misissortissammata atuarfimmiit napparsimmavimmukaqquneqarpugut. Ilinniartitsisut arlaannik ilisimasaqarsimassapput.Ilinniartitsisut nakorsallu ilinniartitsisut inaanni ataatsimiissimasut kingorna paasitinneqarpunga, tassanilu qallunaat ilinniartitsisut suleqatigiillutik nakorsamukaqqunissarput aaqqissuussimavaat. Nakorsamukarnissaq annilaanganaqaaq. Annilaanganera eqqaamavara. Pisumit eqqaamasakka ersarlupput.

Nallaviup isuani nakorsaq piareersimalluni nikorfavoq. Suli atoqateqarnikuunngisaannarlluni nukappiaqqanilluunniit eqqarsaateqartuunani allaannissaq killissamik qaangiinerujussuuvoq. Nakorsap ilusiuinermini atortagai eqqaamaqqissaarpakka, taakku niviarsiaraallunga timinnut angivallaarujussuartutut misinnarput. Nakorsap kiinaa eqqaamanngilara. Kiillaali puigukkiunnikuuara.

Annernarsuaarpoq. Tamatuma kingorna aaqaraangama anniarujussuartalerpunga atuarfimmiillu angerlartariaqartalerlunga. Eqqaamavara nammineq pisuusutut misigalungalu kanngusulluga, tamannali arlaannaanulluunniit oqaatigisinnaanagu. Nakorsamit qimaasinnaasimannginnera kanngusuutigaara. Tamatuma kingorna annilaangasalerpunga. Killiliisinnaanera ajornakusoortilerpara. Kingusinnerusukkut journalinni atuarpara spiralilerneqarninni mannissaqarfima aqqutaata aappaa ajoqusersimasoq.

Angajoqqaama tamanna naluaat. Angajoqqaannit paarilluarneqarlunga peroriartorpunga. Qatanngutigiit quliuvugut. Ataatama innuttaasutut iliuuseqanngitsutut inissisimaannarata nunatsinnik nammineq aqutsisussatut kajumissaarluta perorsarpaatigut. Meerartaartinnata ilinniaqqaassaagut. Naalagaaffimmit qulagerneqarluta naalakkersorneqanngitsuugutta angajoqqaama isumagilluartorujussuugaluarpaatigut.

Misigisara ukiuni 40-ni naqisimavara. Iluma sukangasutut ittarnera malugisarpara, naluarali sooq. Ukioqqortusiartorninni ikaarsaalerama misiginikuusama timima qisuariarfigalugu aallartippaa. Aaqarujussuartalerpunga atoqateqarninnilu anniartalerlunga. Sunerlunga ukiuni arlalinni paasiuminaatsippara. Ilunni kræftinnguussinnaasumik nappaateqalersimallunga paasivara. Misigerluuteqarsimanermik kingunerluutilinnut 2017-imi katsorsaasunngorniarninni eqqaamasakka puttallarput.

Misigivunga timera nunasiaatigineqartoq, taamaanneqarunnaarumallungalu danskit naalagaaffiat taarsiissuteqaqqullugu eqqartuussivimmut suliassanngortippara. Danmarkimi kalaaleqativut assigalugit akuerineqarnissamut naligineqartutullu pineqarnissamik pisinnaatitaaffeqarpugut. Neriuppunga eqqartuussivikkuunngikkaluarluta naapertuutinngitsumik pineqarsimanerput nassuerutigineqassasoq. Timitsinni naleqarnerpaaq kinguaariinnik tulliuttunik pilersitsisussaq pineqarpoq. Kinguaariiuvugut amerlasuut kinguaasiorsinnaajunnaarsimasut.

Armerlasuut piumassuserinngisaminnik naartusinnaajunnaarsinneqarnikut. Arnat danskit naalagaaffiannik eqqartuussivimmut suliassanngortitsisut pingajorarterutaat inuunertik naallugu meerartaarsinnaajunnaarnikuupput, arnallu 143-t spiralilerneqarnikuunertik pissutigalugu tarnikkut nanertuutigilernikuullugu.

Arnaqatikkalu ataatsimoorfeqalernerput isumaqartorujuuvoq. Kisimiilluni qaangiiniarneq ajornakusoorneruvoq, maannalu ataatsimoorluta ingerlariaqqinnissatsinnik periarfissaqalerpugut. Tapersersoqatigiippugut. Allanut maligassiuisoorusuppugut.

Aqqusaarnikuusama nammassinnaanerannut nammineerlunga piumassuseqarnera pissutaavoq.

Naja Lyberth, 63-inik ukiulik.