Spejderit atisaliortartup ilusilersugaanik annoraartaartut

Nuummi spejderit atisartaatik ukioq manna inuiattut nalliuttorsiornitsinni ingerlaaqatigiinnermi peqataanerminni tulluusimaaqalutik atorrappaat – naak inuiattut ullorsiornitta ullaakkuani ateriaannaajumallugit containeri taakkuninnga imalik inuiattut ullorsiornissatsinnut aatsaat aqaguttoq ammaqqatarsimagaluaritsik.

Nuummi spejderini suleqatigiinnut aqutsisoq Simon Borgert Olesen taama oqarpoq. Nunatsinni spederinit tamanit atisartaarineqartussat atisaliortartoq Bibi Chemnitz qanimut suleqatigalugu ilusilersugaapput.

- Spejderit atisassaannik aatsaavissuaq atisaliorpunga, spejderilli atisaliuussinnaanerikka aperalunga attavigimmannga soorunami akuersivunga. Suliassaq pissanganarnikooqaaq, nunatsinnilu spejderit kinguaariit nutaartaannut sunniuteqaqataanerput tulluusimaarutigalutigu, Bibi Chemnitz oqarpoq.

Pisatsersorluagaasut

Spederit atisartaavisa ilisserluagaaqqissaagaapput.

- Tungujortumik taartumik atisaqartarmata qanoq qalipaateqassanersut aalajangeruminaannikuunngilaq. Annoraamineq ninngusooq atorparput, ninngusuujummallu atoqattaarnerata kingunerisaanik nungullariartorpasittutut isikkoqalersinnaanera torraqutigiinnartussaavaa, Bibi Chemnitz oqarpoq.

- Ukiorpassuarni kingullerni annoraaliarisartakkatta misilittarluarneqareersuusup nunatsinnilu pinngortitami atugassaqqissuusup ilusaa aallaavigalugu suliaraavut.

- Nunatsinnilu atugassaqqissuunissaat kissaatigigatsigu siorngisigut allatut kaasarfilersorpavut. Tassa marloqiusanik aappaannaalli kisiat nipittartuusanik siittartuusalerlugu tassa velcrolerlugit siorngisigut kaasarfilersorpavut. Tassa assersuutigalugu ukusartoq, allunaasaq pinngortitamiluunniit sakkussatut pisariaqartitaq alla taamaalilluni kaasarfimmiorineqarsinnaavoq.

Spejderit atisartaavi spejderinit nammineq aserfallatsaalineqarsinnaanngorlugit suliaapput.

- Velcrotaat nungullarpata taarseriaannaapput. Spejderit meqqut ujalussiarlu atorlugit nammineerlutik nutaanik velcrolersinnaajumaaraat qularinngilarput – taamaalillutillumi assassornermik aamma piginnaanngorsassammata, Bibi Chemnitz oqarpoq.

- Spejderit ilisarnaataannik nunattalu erfalasuanik saamiup tungaani sakiaasigut pisatsersorpagut –suminngaanneersuunerallu taamaalilluni arajutsisassaanani. Spejderitulli sutigut inissisimanerminnut takussutissanik meqqinillu allanik annoraartaaminnut namminneq mersorlutik kakkissuisinnaapput.

Nammineq ilisarnaatiminik aamma pilerai

Bibi Chemnitzip spejderit atisartaavi nammineq ilisarnaatiminik aamma meqqilerpai.

- Ilisarnaatitsinnik nigaliusumik tunuisigut aamma meqqilersorpavut, tungujortoq taartuummatali erseqqaarippallaanngillat – takussaallutilli, atisaliortartoq oqarpoq.

Nunatsinni spejderit nutaanik atisartaarnissaat Nuummi Spejderit ukiut tallimat matuma siorna pilersinneqarnerisa kingorna pisariaqalersimavoq. Nunatsinni taamanikkut spejdereqaavinngilaq, nunatsinnilu spejderit kattuffiat aamma matuneqarsimalluni.

- Taamaammat naqqaniit aallarteqqippugut, Simon Borgert Olesen oqarpoq.

- Kalaallit Nunaanni spejderit nammineq mersukkanik anoraaqartarsimapput, Sydslesvigimili spejderit atisaasa assinginik 1990-ikkunni atisaqartarsimallutik. Atisat taakkua ilisserluagaanatillu issittumi atugassaqqinngimmata iluatigut tujuulussuaqartariaqakkajussimapput, Simon Borgert Olesen nassuiaavoq.

- Kalaallit angutitaannut annoraaliat misoriarlugit misilerarnikuuagut, qalipaataalli erroreernerini kusanaallisarmata atussaarpavut. Taava Danmarkimi atisaarniarfeqarfik SpejderSport ikiorsinnaaneraatigut aperalugu attavigaarput, 500-nilli ikinnerunngitsunik annoraaliortitsinissarput piumasaqaatigaa – akisuallaassaqimmallu sussakkiiginnarparput.

- Taava tassunga taarsiullugu Bibi Chemnitz aperaarput – taassumalu suliassiissuterput qanoq naammassissanerlugu nalunngilluinnarpaa. Maannalu tassa nammineq pigisatsinnik annoraaqarpugut – tamannalu tulluusimaarutigaarput.

Sunngiffimmi sammisassaqarnissaat pingaartikkaat

Bibi Chemnitz annoraaliortuunissamut nangaarianngivilluni akuersivoq.

- Inunnut allanut immikkuullarissumik ilusilersuineq tamatigut misigisatsialaasarpoq. Inuusuttut sunngiffimmi sammisaqartarnissaat pingaaruteqarluinnartutut isigaarput. Ineriartuutigisarpaat inuunermilu kingusinnerusukkut atorsinnaasaminnik assigiinngitsutigut ”piginnaanngorsaatigisarlugit”. Meeqqammi assamminnik sarliaannartut amerlavallaaqaat, Bibi Chemnitz oqarpoq.

Aallaqqaammut 130-nik annoraaliorpoq. Spejderit annoraasinerminnut 350 koruuneertarput. Aningaasat taakkua annoraaliortitseqqinnissamut atugassanngorlugit kontumut suliniutinut tunngasumut ikineqartarput. Annoraaliortitsineq katillugit 100.000 koruunit missaannik akeqarpoq, suliniummullu tassunga tapiissuteqartut tassaapput Polar Seafoood, Helene aamma Svend Jungep Aningaasaateqarfiat aamma Sct. Georgs Gilderne i Danmark, tassaasoq Danmarkimi spejderit kattuffiat.

Nuummi spejderit 60-it missaanniittut, Ilulissani 15-iusut Sisimiunilu quliusut, Simon Borgert Olesen ilisimatitsivoq.