Station Nordimi ilisimasassarsiortut politiinit misissorneqarput

OBS: Paasissutissat amerlanerusut allaaserisap naqqani ilanngunneqarput nal. 16.00.

Sermitsiap paasisai naapertorlugit ilisimasassarsiortut Kalaallit Nunaata avannarpasinnerusaanit ingerlaartut politiinit unitsinneqarput. Sermitsiap paasissutissaatai naapertorlugit russi pisooq ilisimasassarsiortut ilagaat.

Kalaallit Nunaanni Politiini politikommissærip Malik Olesenip uppernarsarpaa Station Nordimi politiit Illersornissaqarfik suleqatigalugu suliamik ingerlatsisut. Ilisimasassarsiortut suminngaanneernersut oqaatigineqarumanngilaq, aamma kommissærip paasissutissat annikitsualuttortaanik ilisimatitsinissaa killeqarpoq:

- Station Nordimi politiit suliaqarnerat uppernarsarsinnaavarput. Taakku killeqarfinnik nakkutilliissapput Nationalparkenimilu ilisimasassarsiornermut atatillugu akuersissutinik misissuinermik suliaqarlutik. Tamanna politiit suliassaraat nalinginnaasoq.

Illersornissaqarfik suleqatigineqarpoq

- Suliaq maanna ingerlavoq, ilaatigut ilisimasassarsiortut inatsisit naapertorlugit Kalaallit Nunaannut isersinnaanersut misissorneqarluni, Malik Olesen Sermitsiamut oqarpoq nangillunilu:

- Maannamut annertunerusumik paasissutissiisinnaanngilagut. Kalaallit Nunaanni Politiit suliassamut atatillugu Illersornissaqarfik suleqatigaat, tamannalu politiit nunami najugaqarfiusumi suliassaminnik naammassinninneranni nalinginnaavoq.

Malik Olesenip maannamut ilisimasassarsiortut kikkuunersut ilisimatitsissutigisinnaanngilaa.

Russi pisooq peqataasoq

Sermitsialli paasissutissaatai naapertorlugit ilisimasassarsiorneq Transglobal Car Expedition pineqarpoq, tassanilu biilinik immikkut sanaanik Qalasersuarnut marlunnut angalanissaq anguniarneqarpoq.

Ilisimasassarsiortut ilagaat russi Vasily Shakhnovsky, Forbes-ip silarsuarmi pisuujunerpaat allattorsimaffianniittoq. Canadamiit aamma Islandimiit ilisimasassarsiortunik aamma peqataasoqarpoq.

Ilisimasassarsiorlutik angalasut nittartagaat naapertorlugu Qalasersuarmiinnerup kingorna angalasut maanna Kalaallit Nunaata avannarpasinnersaanniipput.

Ukiorpassuarni New Yorkimi piareersarneqareerluni ilisimasassarsiortut angalanerat ukioq manna januaarip 9-anni aallartippoq, nunarsuarlu tamaat kaajallallugu angalanissaq pilersaarutigaat – ilaatigut Kalaallit Nunaat aqqusaarlugu Sermersuaq itivillugu Nuummut angalassallutik, tassanngaanniillu ingerlaqqittussaallutik.

Sermitsiap Naalakkersuisut Siulittaasuata Naalakkersuisoqarfia attaveqarfigisimavaa ilisimasassarsiortut Nationalparkeni ikaarsaariarnissamut itigartinneqarsimanersut paaserusullugu. Naalakkersuisoqarfilli suliaq pillugu politiinut innersuussivoq.

Nunatsinnut tikeqquneqanngitsut

Politiit nal. 16.00 missaani tusagassiorfinnut nalunaaruteqarlutik ilisimatitsipput ilisimasassarsiortut Kalaallit Nunaannut tikinnissaminnut itigartinneqarsimasut.

- Ilisimasassarsiortut nunatsinni angalannginnissaannut itigartitsinermi Naalakkersuisut peqqutigaat ilisimasassarsiortut ajornartuussagaluarpata ikiuiartorfissaq tikikkumiaattussaammat, Kalaallit Nunaata Politiivi allapput nangillutillu:

- Taassuma saniatigut nunanit Schengenip avataaniittunit Kalaallit Nunaannut tikilerneranni, nunap killeqarfiisa ingerlavigineqarnissaanut maleruagassaqarpoq, politiillu tamakku qisuariarfigisariaqarpaat.

Politiit erseqqissarpaat sulinermi Siriusimi angalasut Arktisk Kommandop ataaniittut suleqatigineqarsimasut:

- Ilisimasassarsiorlutik angalasut Kalaallit Nunaata avannarpasinnerpaaffianut tikinnerminni Siriusimit naapinneqarput, Sirius Nationalparkimi illersornissamik politiillu suliaannik suliaqartuuupput. Qimussersut Transglobal Car Ekspedition attaveqarfigaat qulakkeerniarlugu peqataasut oqartussat maleruagassaannik malinninnersut, politiit allapput. Ilisimasassarsiorlutik angalasut tamatuma kingorna Station Nordimukartinneqarput.