Suliareqqitassanut eqqartuussivik: Trump atuakkiortumut millionilinnik taarsiissaaq

USA-p præsidentia Donald Trump atuakkiortumut E. Jean Carollimut nikanarsaasimasutut 83,3 millionit dollarinik akiliissasoq, USA-mi suliareqqitassanngortinneqartunut eqqartuussivimmi ataasinngornermi aalajangerneqarpoq.

Nutaarsiassaqartitsivik Reuters allappoq.

Trumpip New Yorkimi Bergdorf Goodmanimi misiliisarfimmi Carol 1996-imi pinngitsaalisimannginnerarnera eqqartuussivimmut suliassanngortitsinermut pissutaavoq.

Carollip Trump pinngitsaaliisimasutut tamanut saqqummiullugu unnerluutiginikuuaa.

Trumpip Caroll pillugu kingorna oqaaserisai nakkarsaataallutillu nikanarsaataasut, suliareqqitassanngortitanut eqqartuussivimmi aalajangerneqarpoq.

Trump E. Jean Carollimut 83,3 millionit dollarit (530 millionit koruunit) akilissagai New Yorkimi eqqartuussivik 2024-mi januaarimi aalajangerpoq.

- Sakkortuumik nikanarsaasoqarsimallunilu killissamik qaangiilluni pissusilersortoqarsimanera tunngavigalugu taarsiinissamik aalajangertoqarnikuunera eqqartuussisut isumaqatigiittut naleqquttutut isigaat, eqqartuussisut isumaqatigiittut suliaq siusinnerusukkut aalajangiiffigineqarnikoq pillugu allapput.

Trump præsidentitut eqqartuunneqarsinnaannginnermik illersorneqarluni isumaqarpoq, januaarimilu 2024-mi aalajangiineq suliareqqitassanngortinnikuullugu.

/ritzau/