REKTORIUGALLARTOQ
Suliffimmi atugassarititat pitsaanerulersinniarlugit suliniutit arlallit
Ilisimatusarfimmi pissutsit toqqissisimananngitsut pillugit sulisut kinaassutsiminnik isertuussisut allagaqareersullu Ilinniartitaanermut Naalakkersuisoqarfik isumakuluppoq. Rektoriugallartoq pitsanngorsaaniarluni suliniutinik arlalinnik aallartitsivoq
- Sulisunut atugassarititat pitsanngorsarniarlugit iliuuseqarpugut, Annemette Nyborg Lauritsen oqarpoq.
Ilimmarfik
Sulisut arlallit kinaassutsiminnik
isertuussisut Ilisimatusarfimmi siulersuisut pillugit allakkatigut
isornartorsiutaat Ilinniartitaanermut Naalakkersuisoqarfiup
isumakuluutigaa.
Siulersuisut ersititsinermik ileqqoqarnerat,
annikitsualuit tamaasa aqullugit ingerlatsinermut
ineriartortitsiumanngitsumillu peqqarniitsumik
pissusilersortarnerannik isornartorsiorneqarput.
Ajornartorsiulli pineqartut namminneq
aaqqissuteqarfiginissaannut naalakkersuisoqarfiup akisussaaffik
tunniuppaat:
- Sulisut ilaasa
siulersuisunik tatiginninnginnerat taamaallaat illuatungeriit
akornanni aaqqinneqarsinnaasoq Naalakkersuisoqarfiup isumaqarpoq.
Naalakkersuisoqarfiup siulersuisut sulisut tamaasa
ataatsimeeqatigisimagaat paasivaa, siulersuisullu naapertorlugit
ataatsimiinneq isumalluarnartumik ingerlanneqarsimavoq,
naalakkersuisoqarfik Sermitsiamut allakkatigut akissuteqarluni
allappoq.
Rektoriugallartumut
innersuussisut
Ilisimatusarfimmi
sulinermi avatangiisit suleqatigiinnerlu pitsanngorsarniarlugit
rektoriugallartup Annemette Nyborg Lauritsenip assigiinngitsunik
iliuuseqarfigisimagaa Naalakkersuisoqarfiup innersuuppaa.
- Neriuutigineqarpoq
eqqissisimanerulertoqarumaartoq. Siulersuisut, aqutsisut sulisullu
maanna eqqissillutik suleqqissinnaanngorlutik
ingerlaqqissinnaalissasut neriuutigaarput, naalakkersuisoqarfik
paasissutissiivoq.
Annemette Nyborg Lauritsen
allaaserisap matuma suliarineqarnerani apersorneqarnissamut
periarfissaqarsimanngilaq, mailikkulli ilisimatitsivoq "eqqissilluni
sulisoqartoq, kikkullu tamarmik Ilisimatusarfik eqqortumik
ingerlanissaa anguniarlugu sapinngisaminnik iliuuseqartut“.
Sulinermi tarnikkut atugassarititat nalilerneqassasut
- Suut suliniutigineqarnersut itisilersinnaavigit?
- Sulisunut atugassarititat pitsanngorsarniarlugit aallartippugut.
Arlalinnik suliniuteqarpugut, sulisunut aqutsisut tamarmik sulinermik
ineriartortitsinissamik siunertaqartumik pitsaanerusumik
oqaloqateqarsinnaanissaannik ilaatigut piginnaanngorsaalluta.
Taamaaliornikkut sulisut ataasiakkaat atorfimminni
ineriartornissaannik sakkussaqarluartinniarlugit.
- Tamatuma saniatigut sulisut aqutsisullu attaveqatigiinnerat
nukittorsarniarlugu taama oqaloqatigiittarneq atorneqassaaq.
Immikkoortortat immikkoortortaqarfiillu akornanni suleqatigiinnerup
nukittorsarnissaa siunertaralugu sulisut tamarmik aamma upernaap
ingerlanerani workshoppertinneqassapput. Ukiap ingerlanerani
’Suliffimmi atugassarititanik annikitsumik naliliineq’ pissaaq,
tassani sulinermi tarnikkut atugassarititat sammineqassapput,
Annemette Nyborg Lauritsen akivoq.