INATSISARTUNI SIUNNERSUUT
Sulinerup nalaani ullut tamaasa minutsit 30-t timigissartarneq
Inatsisartut ilaasortaq, Anna Wangenheim (D) siunnersuuteqarpoq, aningaasatigut allaffissornikkullu qanoq kinguneqassanersoq suliffeqarfinnut namminersortunut aamma pisortat ingerlatsiviinut kiffartuussiviinullu, sulisut ullut tamaasa suliffimmi minutsit 30-t timigissartarnissaannut pisinnaatitaaffeqalissappata. Naalakkersuisulli sulisitsisut sulisullu akornanni pissutsinut akuliunnianngillat, isumaqarlutillu suliffeqarfiit sulisartullu akornanni oqallisigineqarlunilu sammineqartussaasoq.
Assiliisoq: Leiff Josefsen
Anna Wangenheim taamatut siunnersuuteqaarnermini innersuussutigai inooriaatsimik aallaavilimmik nappaatit, pualavallaarneq, uippakajaarneq aammalu minnerunngitsumik napparsimalluni sulisanngitsoortarnerit qaffasinnerujussuat.
- Aalajangiisartutut allatut ajornartumik unammilligassaq taanna ilungersunartutut tigusariaqarparput.
Tassanimi qularutissaanngilluinnarmat, timigissarneq qanorlu inuuneqarneq pingaaruteqartorujussuusoq.
Ulluinnarnili ulapaarfiusumi timigissarnissamut piffissaalatsinarsinnaavoq, sulinerup saniatigut
pisiniarfiliarnerit, iganerit, eqqiaanerit minnerunngitsumillu meeqqat ilaquttallu peqatigilluarnissaanut
piffissaqartussaammat. Unammillernartup taassuma aaqqiissutissarisinnaavaa timigissarnerup sulinerup
nalaani atuutsilersinneqarneratigut.
- Siunnersuutigaara ullormut 30 minutsit, kisianni aamma aaqqiissutinik allaanerusinnaaneranik
eqqarsaateqarpunga soorlu assersuutigalugu nalunaaquttap akunnera ataaseq sapaatip akunneranut
marloriarluni timigissarfiussasoq assigisaanilluunniit. Pingaarneruinnarpoq sulisunik peqqinnerusunik,
nuannaarnerusunik pinngorartitsinerusunillu qulakkeerinninnissaq.
Arsaq sulisitsisut sulisullu akornanniippoq
Naalakkersuisut suliffeqarfinnut sulisunullu arsaq ingerlaannaq ingerlateqqippaat, innersuussutigalugu pissusissamisuussanngitsoq suliffiutillit sulisullu akornanni pissutsinut akuliuttoqassappat.
Tamatuma saniatigut Naalakkersuisut suliniutinut pioreersunut arlalinnut innersuussipput "Aalasa" aamma "suliffeqarfiit peqqinnarnerusut" immikkut taaneqarlutik, suliniutit taakku aqqutigalugit aalanerulernissaq aammalu suliffeqarfiit peqqinnarnerulernissaat aqqutissiuunniarneqarmat.
Kisianni Naalakkersuisut mianersoqqusipput, Inatsisit aqqutigalugit suliffeqarfiit taakkulu sulisui inatsisitigut pisussaaffilerlugit siunnersuutigineqartutut timigissartinneqartalissappata tamanna aningaasarpassuarnik naleqassasoq, taggippaallu minnerpaamik 45 millioner koruuninik akeqassasoq, Naalakkersuisut naliliipput.
Qeqqata Kommuniata "suliffeqarfiit peqqinnarnerusut" pillugit suliniutaa
Qeqqata Kommuniani peqqinnissamut sinniisoqarput, taakkulu pisinnaatitaaffeqarput sulinerup nalaani piffissami aalajangersimasumi suleqatit piumasut periarfissallillu timimik aalatitsinissamut aggersassallugit. Suliniut 2017-imili atuutilernikuuvoq.
Sapaatip akunneranut ataasiarluni piffissami aalajangersimasumi taamaalillutik sulisut yogaqatigiinngikkunik, eqaarsaaqatigiinngikkunik pisuttuaqatigiittarput.
Naalakkersuisullu tunngaviusumik tamatumunnga tapersiipput, suliffeqarfinni timimik aalatitsinissaq sulisut peqqissusaannut naammagisimaarinninnerannullu pingaaruteqarnerarlugu.
- Suliffeqarfiit sulisut tamarmik
peqqissusaannik atugarissaarnerannillu ikorfartuisunik politikkinik piviusunngortitsinissamut
akisussaaffeqarput, aamma suliffeqarfimmi timit atorlugu sammisassanik siuarsaanissamut
suliffeqarfippassuit alloriareerput.
Naalakkersuisullu naggasiillutik erseqqissaatigaat sulisitsisup sulisartullu akornanni pissutsinut akulerunniannginnamik, aamma
sammisap oqallisiginissaannut suliffeqarfimmi illuatungeriit suliassarigaat isumaqarlutik.
Inatsisartuni siunnersuut siullermeerneqassaaq ataasinngornermi oktobarip 21-anni.
