KL

DK

REJSERAPPORT

Sulisut aalajaatsut kalaalimerngillu utoqqaat maqaasivaat

Utoqqaat oqaasertartuata Qeqqata Kommuniani angalanermini nalunaarusiaani atuarneqarsinnaavoq utoqqaat angerlarsimaffiini Maniitsumiittumi Sisimiuniittumilu pitsanngorsagassaqartoq. Sulisut aalajaatsut kalaalimerngillu utoqqarniit maqaasineqartut, ilaatigut nalunaarusiami allassimavoq.

Tôrtia Reimer-Johansen
Journalist
Offentliggjort

Utoqqaat oqaaseqartartuat, Kiista P. Isaksen Qeqqata Kommuniani utoqqaat aasaq manna tikeraarpai.

Utoqqaat atukkaminnik annerusumik iluarisimaarinnikkaluarlutik sulisut aalajaatsut kalaalimerngillu utoqqaat angerlarsimaffiini maqaasigaat, nalunaarusiami allassimavoq.

Maniitsumi tikeraarnermini sulisut ilinniarsimasut ilinniarsimanngitsulluunniit amigaataasut paasivaa. Sulinngiffeqarnermi sulinngitsoortarnermilu sulineq tatineqartarpoq.

-  Eqqartueqatigiinnermi saqqummiunneqartut ilagivaat utoqqaat illuanni sulisut amigartut, taamatullu ilinniarsimasut aamma amigaatigineqarlutik. Pisariaqartitsinerup nalaani, sulinngitsoortoortoqarneratigut feeriartoqarneratigulluunniit paarlattaasinnaasunik sulisussanik aamma amigaateqartartut oqaatigineqarpoq. Tamatumunnga tunngatillugu najugaqartut eqqaavaat nunanit allaneersunik sulisoqalernissaq ammaffigalugu, toqqissisimanartumik sullinneqarnissaq salliullugu pingaartinneqarmat, Utoqqaat oqaaseqartartuat nalunaarummi allappoq.

Nalunaarusiami aamma allassimavoq utoqqaat angerlarsimaffiini inissaaleqisoqartoq, allaat tarnimikkut napparsimasut puigortunngortullu najugaqartinneqarput, utoqqarnut toqqissisimajunnaartitsisumik.

- Tarnimikkut napparsimasut arfineq marluk allami ineqartussaagaluit utoqqaat illuanni najugaqartinneqartut inissaminiinngitsut, taakkununnga utoqqarnullu ajorluinnartoq, pissutsillu taammaattut akuerineqarsinnaanngitsut, Kiista P. Isaksen nalunaarummi allappoq.

Kalaalimerngit amigaatigineqartut

Sisimiuni utoqqaat nerisaqarnermut tunngasut annerusumik oqaluuseraat. Ataasiakkaarilluni oqaloqatiginninnermi ataatsimoornermilu utoqqaat kalaaliminertornerunissamik kissaateqarput, ilaatigut meeraanerminni nerisarisartakkatik maqaasillugit.

    -  Utoqqaat apuukusutaat ataatsimut isigalugu annerpaamik nerisaqarnermut tunngassuteqarput, pinngitsoortoqaratik tamarmik tamanna annerusumik minnerusumilluunniit eqqartormassuk. Kisimeeqatigalugit oqaloqatigisagut, ataatsimoorlunilu ataatsimiisitsinitsinni peqataasunit tamanit nerisaqarneq pillugu allanngortoqarnissaa kissaatigaat. Amigaatigilluinnarpaat kalaallit nerisassaataat kalaalimerngit, ilitsoqqussat, nalunaarummi allassimavoq.

Sulisut aalajaatsut misigisallu nuannersut

Naak kalaalimerngit Sisimiuni utoqqarnit maqaasineqaraluartut, sulisullu aalajaatsut Maniitsumi maqaasineqaraluartut Sisimiuni nuannersumik eqqartuisoqarpoq. Sisimiuni utoqqaat angerlarsimaffianni sulisut aalajaatsuusut najugaqartuni unnersiutigineqarput, tassani sammisassaqartinneqarlutillu aliikkusersorneqartaramik.

Qeqqata Kommuniani kommunalbestyrelsi ataatsimiikkami Utoqqaat oqaaseqartartuata angalanermini nalunaarutaat saqqummiunneqarpoq, tusaatissatut tiguaat ilanngullugulu oqaatigalugu utoqqaat pisinnaatitaaffii paasititsiniutigineqaqqissasut.

inuiaqatigiit samfund

ATORFIIT Se alle jobs

Powered by Labrador CMS