Kalaallit Nunaata silaannartaa 2031-mit Kalaallit Nunaannit aqunneqalerumaartoq anguniagaavoq. Kalaallit Nunaatali sortaanit nakkutilliisoqalissava?
Tamanna danskit naalakkersuisuisa naalakkersuisullu isumaqatiginninniutigilerpaat.
Kalaallit Nunaata silaannartaa 2031-mit Kalaallit Nunaannit aqunneqalerumaartoq anguniagaavoq. Kalaallit Nunaatali sortaanit nakkutilliisoqalissava?
Tamanna danskit naalakkersuisuisa naalakkersuisullu isumaqatiginninniutigilerpaat.
Suliffeqarfik Naviair, naalagaaffiup pigisaa, suliassamik tamatuminnga naammassinnissaaq, suliffeqarfiullu naliliinera erseqqippoq: Nuummi nutaamik nakkutilliinermik qitiusumik pilersitsisoqassaaq.
Qaqortoq tikkuaraat
Tamannali naalakkersuisunit kissaatigineqanngilaq.
Qaqortumi inissiisoqarsinnaaneranik misissuisoqassasoq attaveqaasersuutinut naalakkersuisup Hans Peter Poulsenip (S) maajip 28-ani danskit angallannermut ministeriat allaffigaa.
Tamanna Sermitsiap allagaatitigut takunnissinnaaneranit erserpoq.
- Kalaallit Nunaanni timmisartunik nakkutilliinermik qitiusumik allaffeqalissasoq Naalakkersuisut suli kissaatigigaat qularutissaanngilaq. Aammali isumaqarpugut Qaqortumi qitiusumik allaffeqalerneq sumiiffimmut Kalaallit Nunaanullu tamarmut iluaqutaangaassasoq, qitiusumik allaffeqarfiup sumiinnissaata pingaaruteqassusaa pillugu Hans Peter Poulsen allappoq.
Suliffiit nutaat Qaqortumi pilersinneqarsinnaanerisa naleqqunneranut naalakkersuisoq ima tunngavilersuivoq:
Ilinniarnertuunngorniarfeqarlunilu inuussutissarsiornermik ilinniarfeqarmat, Naviair-ip pisariaqartitaanik ilinniartitsinissamut periarfissaqartoqarpoq.
Inissianik pissarsinissamut unammilligassaqarnermut tunngatillugu Naviair Kommune Kujallermik oqaloqateqarpat, assersuutigalugu najugaqarfinnut pilersaarutit sanaartornermullu akuersissutinut tunngatillugu aaqqiissutissanik nassaartoqarsinnaasoq, taakkulu inissialiornerit amerlanerulernissaannut aqqutissiuussisinnaasut, Naalakkersuisut isumaqarput.
Qaqortumi mittarfik nutaaq 2026-mi ammarneqarpat Kalaallit Nunaanni illoqarfiit allat Qaqortullu akornanni timmisartuussisoqarsinnaalissaaq, nunanullu Atlantikup avannaaniittunut timmisartuussisoqarsinnaalissasoq naatsorsuutigineqarpoq. Tamanna sulisoqartitsinissamik periarfissaqalersitsivoq.
- Immap naqqatigut kabelikkut atassuteqaat Qaqortumit aallartippoq.
Qaqortumi sanaartornermi akit Nuummit qaffasinnerunngitsut, immaqali sanaartornermik suliaqartut Nuummi tamakkiisumik suliffigineqarmata appasinnerusut, Naalakkersuisut naliliipput.
Naviairip Nuuk tikkuarpaa
Nuuk periarfissatuatut Naviairip naliliinera Naalakkersuisut „ajoraluartutut“ isigigaat, Naalakkersuisoq Hans Peter Poulsen allakkamini allappoq:
- Kalluunnaveersaartuuneq tunngavigalugu Qaqortup misissornissaa Naviairip misissussagaa Naalakkersuisut naatsorsuutigaat, Hans Peter Poulsen angallannermut ministerimut Thomas Danielsenimut allappoq.
Ukioq manna februaarip arfineq-pingajuani Naviairip naliliinera pillugu angallannermut ministeri allakkamini ima allappoq:
- Naatsumik oqaatigalugu naliliinerup allanngortinneqarnissaa inerniliussamut ataatsimut allannguutaassanngitsoq Naviair isumaqarpoq. Nakkutilliisoqarfik Nuummi inissinneqartariaqarpoq. Kalaallit Nunaata ilarujussuani teknikkikkut attaveqaatit killeqarnerat tamatumunnga ilaatigut pissutaavoq.
- Naviairip illuutinik teknikkimillu ulluinnarni aserfallatsaaliuisinnaaneranut teknikkikkut attaveqaatit pisariaqarput. Tamanna pissutigalugu timmisartunik nakkutilliisoqarfik Nuup avataani inissisimasinnaanngitsoq Naviair ilaatigut naliliivoq. Nuummiinnaq timmisartunik nakkutilliisoqarfimmi sulisussanik naammattunik atorfinitsitsisoqarsinnaasoq Naviair naliliivoq, angallannermut ministerimut allakkami allassimavoq.
Sumiiffissaq isumaqatigiinngissutaasoq pissutigalugu ministerip suliniut unitsikkallarsimavaa.
