Takorluugaq oqaluttuarisaanermut ilannguttoq

Pipaluk Noahsen Brugsenip oqaluttuarisaaneranut ilannguppoq. 

Kalaallini siullersaalluni Nuummi brugsenimi pisiniarfimmi pisortanngorpoq.

- Akisussaaffik tulluusimaarluni ataqqinnillungalu tiguara. Neriuppunga uanga maligassiuinermi kalaallit inuusuttut anguniagaqarnerminni kajumissuseqalernerannik nassataqassasoq – suminngaanneeraluarunilluunniit, Pipaluk Nohsen LinkedIn-imi quppernermini allappoq.

Taassuma takorluugaraa maanna piviusunngortoq. Pisiniarfimmimi tassani Brugseni Qinngorpumi pisortanngornissi tikillugu pisortamut tullersortaanikuuvoq.

- Meeraagallarama ilaquttakka ilagalugit niuertut sullissilluartut maani ilikkarnikuuakka. Niuertarfinnut soqutiginninnera maani aallartippoq, pisiniarfimmilu ullut ilaanni aqutsisunngornissannik takorluuinera aamma maanngaanneerluni, allataani attortinnartumi atuarneqarsinnaavoq.