Sanasoq takornarialerisorlu Lars Erik Gabrielsen
Facebookimi quppernini atorlugu qineqqusaarutiminut tunngatillugu isummaminik
eqqarsaatiminillu videolianik siammarterivoq, maannamullu takornariaqarnermut
tunngatillugu oqariartuutini siammartereerpaa.
- Avannaata Kommunia takornariaqarnermik
annertunerpaamik iluaqutigisariaqarpaa, tassami nunaqavissut takornariartitsisartut
peqataatitsineq amingarpoq, Lars Erik Gabrielsen oqarpoq.
Sanasoq takornarialerisorlu Lars Erik Gabrielsen
Facebookimi quppernini atorlugu qineqqusaarutiminut tunngatillugu isummaminik
eqqarsaatiminillu videolianik siammarterivoq, maannamullu takornariaqarnermut
tunngatillugu oqariartuutini siammartereerpaa.
- Avannaata Kommunia takornariaqarnermik
annertunerpaamik iluaqutigisariaqarpaa, tassami nunaqavissut takornariartitsisartut
peqataatitsineq amingarpoq, Lars Erik Gabrielsen oqarpoq.
- Eqqagassanut tunngatillugu aaqqiisimaneq
torrallataanngilaq, aningaasarpassuit atorlugit eqqakkanik katerseriarluta
ikuallaannarnagit nutaaliorluta avatangiisinillu eriaginnilluta nutaaliortariaqarpugut
suliffissanilllu pilersitsilluta, taanna oqarpoq.
Aamma meeqqat inuusuttullu ilikkariartornerannut
tunngatillugu eqqarsartaatsikkut peqqissuunissaat ilinniarnissaminnullu
siunnerfeqarluarnissaat pingaartippai.
- Meeqqat inuusuttullu eqqarsartaatsikkut nukittorsaanermut
piffissaq atuiffiusariaqarpoq sakkussanillu ullumikkut amigaataasunik
tuniorarnissaat pillugu meeqqat atuarfiannut nukippassuit atorniarpakka.
Inuusuttorpassuit tamanna peqqutigalugu ajoraluartumik katataaasarput,
imminnullu tatigivallaannginnerat alianarluinnarpoq, Lars Erik Gabrielsen
oqarpoq.
Kommunalbestyrelsemi
politikkeritut sulileqqinnissaminut maanna nukissaqarlualersimavoq. Ukiut 16-it
sinnerlugit kommunalpolitikimiit peqataanngereerpoq, tassa Ilulissat Kommunia
Qaasuitsup Kommunerisimasaanut kattunneqarmat qinigassanngorteqqinnani tunuarnikuugami.
Kommuni annertunerpaamik pissarsiaqassasoq
Avannaata Kommuniani nunaqavissut takornarialerisut
peqataatinneqanngippallaartut, naak Avannaata Kommuniani, Lars Erik Gabrielsen
isumaqarpoq, Naak nunatsinni takornariaqarfissuit annerpaartaani Ilulissani,
Ilulissat Kangia UNESCOmut eriagisassatut allattorsimaffimmut
ilanngunneqarsimasumut soqutiginninneq annertugaluaqisoq.
- Nunaqavissunik takornariartitsisartunik peqataatitsineq
amingarpoq, takornariartitsinermilu piginnittuunermut tunngatillugu kinguussaaqqqavoq.
Assersuutigalugu aasakkut Ilulissani takornariartitsisoqartillugu Kangianut
iluliarsuarnut pisuttuartitsisoqapallattarpoq, Sermermiunut pisuttuartitsisoqapallattarpoq,
nunaqavissut takornarialerisut peqataatinnagit takornariat Kangiata illorsuanut
takornariapallatsinneqartarput, Lars Erik Gabrielsen oqarpoq.
Angallatit takornariartaatit takornarialerisunik
toqqaannartumik suleqateqalersinnaaniassammata akunnermiliuttut agentit
atorunnaarsikkusuppai.
- Umiarsuit takornariartaatit najukkami
takornarialerisut toqqaannartumik suleqatigilertariaqarpaat, tamannalu
misigisassarsiornissamut nutaanik periarfissaqalersitsissaaq, takornariat
taamaalillutik qimminik piginnittunut taakkualu qimmiinut alakkaatinneqarsinnaapput,
kaffillertoqarsinnaavoq. Peqataatitsineq sapinngisamik annertunerpaaq
qulakkeerniarlugu utoqqaat, meeqqat inuusuttullu suleqatigineqarnerisigut, Lars
Erik Gabrielsen oqarpoq.
Ilulissani
mittarfik nutaaq ukiut marlussuit qaangiuppata ammarpat illoqarfimmi
innuttaasut takornariartitsinermik sammisaqarnerat peqataaffigiunnaarnissaallu
isiginnaaginnarnagu iliuuseqarfiginiarpaa.
- Kinguussaagutta isiginnaaginnartuuinnassuugut,
takornariaqarnermullu uanga isiginnaaginnartuunissamut akuerisinngilanga.
Taamaammat nunaqavissut takornariaqarnermik suliaqartut ilinniartinneqarnissaat
sulissutigerusuppara.
- Takornariartitsisartuinnassanngilagut, aammali
takornariaqarnermik qaffasissumik ilinniarsimasunik sulisunik pisariaqartitsivigut,
tamannalu nunaqavissut peqataatinneqarnerisigut aatsaat anguneqarsinnaavoq,
Lars Erik Gabrielsen oqarpoq, taannalu Avannaata Kommuniani takornariaqarnermut
ilinniarfeqalernissaanik tapersersuivoq.
Eqqakkanik isumaginninnermi nutaaliorneq
Eqqakkanik isumaginninnermut atatillugu
aallarnisaanissaq nutaaliornerlu pingaaruteqartoq Siumumi politikeri
isumaqarpoq, taassumalu eqqakkat sanaartornermut atortussatut nutaatut
atorneqarsinnaaniassammata kommuni eqqakkanik isumaginninnermut politikkimik
nutaamik pilersitsillunilu eqqakkanillu katersuisinnaasunik suliffinnik
pilersitsissasoq kissaatigaa.
- Suliffiit pilersinneqarlutillu
naleqarnerulersitsissaaq, illuliortitsinerillu angisuut pisariaqartippavut.
Tassani eqqakkat atorneqarsinnaapput, aallaqqaammut blokkinngorlugit naqillugit
cementimillu ilusilersorneqassallutik. Taakku sanaartornermi atorneqarsinnaapput
allaallu avatangiisinut ajoqutaanngitsumik immamut ilineqarsinnaallutik, Lars
Erik Gabrielsen oqarpoq.
Isumassarsiaq taanna Nalik Venturesimut Avannaata
Kommunianilu soqutigisaqaqatigiinnut saqqummiunneqarsimasoq nassuiaavoq.
Ilisimaneqartutut Avannaata Kommunia Esanimut,
sinerissamiit eqqakkanik Sisimiuni ikuallaavimmut assartuisartussamut,
Avannaata Kommuniata immakkut eqqakkanik assartuisarnissaq isumassaqartinnginagu
peqataanngilaq.
- Avannaata Kommuniani innuttaasunit tamanna
paasiuminaatsinneqarpoq, ukiukkummi sikusartumi najugaqarpugut, ukiukkullu
eqqakkat katersorneqartarlutillu amerliartuinnalertarput - nunaqarfinni
mikinerusuni eqqagassat takussunarsillutik avaanngunasisarput. Taamaammat
sanaartornermut atortussanik nutaanik sanaartornissamut eqqakkanik naqiterivik,
cementimik aalaterut cementimillu kuitsivik eqqakkanik cementiliornissamut
atorneqarsinnaasoq eqqarsaatigineqarpoq, Lars Erik Gabrielsen oqarpoq.
Soorunami eqqakkat ulorianartut
ilaatinneqannginniassammata mianersuunneqassasut naqissuserpaa. Aamma Avannaata
Kommuniani sanaartornerit unittoormata nunaqarfinni sanaartornerup
ineriartortitsinerullu siuarsarneqarnissaat pingaartippaa.
Ilinniartitaanermut tunngatillugu sammiviliinissaq
Qinikkatut meeqqat atuarfianni sulisut imminnut
qaninnerulerniassammata qanimut suleqatigiumavai. Piumasaqaateqartoqaannarani
kisianni qanimut suleqatigiittoqassasoq.
- Meeqqat atuarfiat ukkatarinerussavara. Tassani meeqqat
inuusuttullu eqqarsartaatsikkut peqqissusiat nukittorsarneqarlunilu imminnut
tatiginerat imminullu naleqartinnerat ineriartortinneqassaaq. Meeqqat
inuusuttullu eqqarsartaatsikkut nukittuut pilersinnissaat pisariaqarluinnarpoq,
inuusuttummi amerlasuut inuunermik kipisinissartik ajoraluartumik toqqartarpaat,
Lars Erik Gabrielsen oqarpoq.
Inuusuttut Avannaata Kommuniani inuussutissarsiornemut
inuiaqatigiillu pisariaqartitaannut siunnerfilinnik siusissikkut
ilinniagaqarnissamut aqqutissiuunneqarlutillu siunnersorneqartarnissaat
kissaatigaa.
- Meeqqat angajoqqaamik suliffiannut assingusumik
ilinniagaqartarnerat takusarparput. Taamaammat inuusuttut inuussutissarsiutinut Avannaata Kommuniata sulisussanik
amigaateqarfigisaanut ilinniagaqarniassammata ilinniagaqarnermut tunngatillugu
siunnerfeqarnissaq pingaaruteqarpoq, Lars Erik Gabrielsen oqarpoq.
Aalisarnermi, suliffissuarni takornarialerinermilu
inuusuttut qaffasinnerusumik ilinniagaqarniarnerminni toqqarsinnaasaannik
suliffissarpassuaqartoq nassuiaavoq.
- Takornariartitsisartuuinnassanngilagut,
takornariaqarnerulli iluani qaffasinnerusumik ilinniagaqartariaqarpugut.
Taamatuttaaq aalisakkanik suliffissuaqarfinni, tassani qaffasinnerusumik ilinniagaqarnissamut
periarfissarpassuaqarpoq. Meeqqat atuarfianni atuartut ilinniagaqarnissaat
siusissukkut, suli meeqqat atuarfianni sulinermik misiliitinnagit
aalajangertariaqarparput, meeqqalli inuiaqatigiinnit aallaaveqartumik
ilinniagaqartariaqarput, Lars Erik Gabrielsen isumaqarpoq.
