ULLORMI NALUNAARUT
Takunnittut ujarneqartut: Angutip nukappiaraq qulinik ukiulik sioorasaarpaa
Politiit suliami nukappiaqqap sisamanngornermi atuarfimmiit eqqakkanik katersuinerani angummit sioorasaarneqarneranut tunngasumi paasissutissanik ujartuipput. Tamatuma saniatigut angutip 59-inik ukiullip Maniitsup eqqaani ujarneqarnera taamaatinneqartoq pigaartut pisortaat ilisimatitsivoq
Toqqorsivimmiit assi: Leiff Josefsen
Nukappiaraq qulinik ukiulik Nuussuarmi atuarfiup eqqaani eqqakkanik katersitilluni sioorasaarneqarsimasoq politiit sisamanngornermi ullaap tungaani nal. 11.14 nalunaarfigineqarput.
Angutip 50-it 60-illu akornanni ukiullip nukappiaraq aallaaniarlugu oqarfigisimavaa. Pigaartut pisortaat Poul Kreutzmann taama ilisimatitsivoq.
Politiit angut taanna inuillu pisumut atatillugu paasissutissiisinnaasut maanna ujaaraat:
Pineqartoq pigaartut pisortaata ima isikkoqarnerarpaa:
Angut kalaalerpalaartoq 165-170 centimeterit missaanni angissuseqartoq 50-60-illu akornanni ukiulik.
Sisamanngornermi ullaap tungaani pisup nalaani aalakoorpasippoq.
Taanna nalinginnaasumik angissuseqartutut qeerasaartunillu nujalittut isikkoqarneragaavoq. Igalaasartuumik qorsummik qalipaatilimmik ilulleqarlunilu qaamasunik qarleqarpoq. Aamma Pisiffimmit puussiamik tungujortumik qaamasumik qalipaatilimmik nassataqarpoq.
Angut tillinniarsimasutut tigusarineqartoq
Sioorasaarinerup saniatigut angut 21-nik ukiulik Nuummi arlaleriarluni tillinniarsimasutut pasineqarluni sisamanngornermi ulluni 28-ni tigummigallarneqartoq, pigaartut pisortaat oqaluttuarpoq.
Angut taanna sisamanngornermi ullaakkut tillinniartoqarnerani tigusaasut marluk ilagaat.
Ujaasineq taamaatinneqartoq
Angummik 59-inik ukiulimmik Maniitsup eqqaani ujaasineq taamaatinneqartoq pigaartut pisortaat aamma oqarpoq.
Angut ataasinngornermi umiatsiaminut, Draco 2000-mut qaqortumut anorimut illersuutilimmut qasertumut Mercury-mik 150 hestekræfterimik motoorilimmut, ingerlaartilluni kingullermik takuneqarpoq.
Ilaqutaasut angummik maqaasineqartumik ujaasinertik ingerlatiinnaraat Poul Kreutzmann oqaluttuarpoq, suliamullu atatillugu paasissutissaateqartut politiinut
70 14 48-mut suli saaffiginneqquneqarput.
